ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កម្ពុជា-នេប៉ាល់ ​កំពុង​ដំណើរ​ការ​រដ្ឋបាល​ដើម្បី​បង្កើត​ជើង​ហោះហើរ​ត្រង់​និង​បើក​ស្ថានទូត


នាយក​រដ្ឋ​មន្ត្រី​នេប៉ាល់​លោក ​ខាត់ហ្គា ប្រាសាត​ សាម៉ា អូលី (Khadga Prasad Sharma Oli)  ជួប​ជាមួយ​លោក​នាយករដ្ឋមន្រ្តី​ ហ៊ុន សែន​នៅសណ្ឋាគារសុខា​ភ្នំពេញ​ នៅ​​ថ្ងៃ​ទី​១៤ ខែ​ឧសភា ឆ្នាំ​២០១៩។​ (Facebook/Samdech Hun Sen, Cambodian Prime Minister)

បន្ទាប់​ពី​លោក​នាយក​រដ្ឋមន្រ្តី​ប្រទេស​នេប៉ាល់​បាន​​បញ្ចប់​ដំណើរ​ទស្សនកិច្ច​ជា​ផ្លូវ​ការ​​រយៈ​ពេល​បី​ថ្ងៃ​នៅ​កម្ពុជា​ នៅ​ថ្ងៃ​ពុធ​នេះ ​កម្ពុជា​និង​នេប៉ាល់​បាន​ចេញ​សេចក្តី​ថ្លែងការណ៍​រួម​មួយ​ ដោយ​​លើក​ឡើង​អំពី​ការ​ប្តេជ្ញា​បង្កើត​ស្ថានទូត ​និង​ជើង​ហោះ​ហើរ​ត្រង់​រវាង​ប្រទេស​ទាំង​ពីរ។

ប្រទេស​កម្ពុជា​ និង​នេប៉ាល់​កំពុង​ដំណើរ​ការ​ផ្នែក​រដ្ឋបាល​ដើម្បីជំរុញ​ការ​បង្កើត​ជើង​ហោះ​ហើរ​ត្រង់​កម្ពុជា-នេប៉ាល់​និង​បើក​ស្ថានទូត​នៃ​ប្រទេស​ទាំង​ពីរក្នុង​គោល​ដៅ​ពង្រឹង​សហ​ប្រតិបត្តិ​ការទ្វេរ​ភាគី។​ ​នេះ​បើ​តាម​ការ​បញ្ជាក់​របស់អ្នក​នាំ​ពាក្យ​រដ្ឋាភិបាល​កម្ពុជា​នៅ​ថ្ងៃ​ពុធ​នេះ។​

ការ​ប្តេជ្ញា​ជំរុញ​ឲ្យ​មាន​ជើង​ហោះហើរ​ត្រង់​ និងបើក​ស្ថានទូត​ទៅ​វិញ​ទៅ​មក​របស់​ប្រទេស​ទាំង​ពីរ​នេះ​ធ្វើ​ឡើងក្នុង​ឱកាស​ដែល​លោកនាយក​រដ្ឋមន្រ្តី​ប្រទេស​នេប៉ាល់​ខាត់​ហ្គា ប្រាសាត​ សាម៉ា អូលី (Khadga Prasad Sharma Oli)​ មក​បំពេញ​ទស្សន​កិច្ច​ជាលើក​ដំបូង​នៅ​កម្ពុជា។ ទស្សន​កិច្ច​របស់​លោក​បាន​បិទ​បញ្ចប់​នៅ​ថ្ងៃ​ពុធ​នេះ។​

លោក​ផៃ ស៊ីផាន​ អ្នកនាំ​ពាក្យ​ទីស្តីការ​គណៈ​រដ្ឋមន្រ្តី​ ប្រាប់​ ​VOA​ នា​រសៀល​ថ្ងៃ​ពុធ​នេះ​ថា​ ដំណើរ​ការ​រៀប​ចំបង្កើត​ឲ្យ​ចេញ​ជារូប​រាង​នូវ​ជើង​ហោះហើរ​ត្រង់​រវាង​កម្ពុជា​និង​នេប៉ាល់និង​ការ​បង្កើត​ស្ថានទូត​នៃ​ប្រទេស​ទាំង​ពីរ​កំពុង​ស្ថិត​ក្នុង​កម្រិត​រដ្ឋបាល​នៃ​ប្រទេស​រៀងៗ​ខ្លួន។​

លោក​ផៃ ស៊ីផាន​បញ្ជាក់​ថា ប្រសិន​បើ​ប្រទេស​ទាំង​ពីរ​បង្កើត​ស្ថានទូត និង​បង្កើត​ជើង​ហោះ​ហើរ​ត្រង់​រៀង​ខ្លួន​ នោះ​នឹង​ជំរុញ​ផល​ប្រយោជន៍​ផ្នែក​សហការ​ការ​ទូត​ និង​ពាណិជ្ជ​កម្ម។​

«ការ​ងារ​ទូត​ជា​ការងារ​ទំនាក់​ទំនង​ល្អ​ និង​កិច្ច​សហ​ប្រតិបត្តិការ​អន្តរជាតិ។​ ហើយ​ជា​គោល​ការណ៍​របស់​សម្តេច​អគ្គ​មហា​សេនា​បតី​តេជោហ៊ុន​ សែន​ហ្នឹង​ ​សមាហរណ​កម្ម​ជាមួយ​នឹង​តំបន់​ក៏​ដូចជា​ប្រទេស​នានា​នៅ​ក្នុង​សកល​លោក អា​ហ្នឹង​ដើម្បី​សម្រួល​ពាណិជ្ជ​កម្ម ​សម្រួល​ការងារ​អី​ដទៃ​ទៀត»។​

ទោះ​យ៉ាង​ណា​ លោក​មិន​ទាន់​អាច​បញ្ជាក់​ថា​ តើ​ការ​បង្កើត​ឲ្យ​មាន​ជើង​ហោះ​ហើរ​ត្រង់​និង​ការ​បើក​ស្ថានទូត​នេះ​នឹង​ចាប់​ផ្តើម​ពេល​ណា​ឲ្យ​ប្រាកដ​នៅ​ឡើយ។​

កម្ពុជា​ និង​នេប៉ាល់ចាប់​ផ្តើម​មាន​ទំនាក់​ទំនង​ជាមួយ​គ្នា​តាំង​ពី​ឆ្នាំ​១៩៦៤​មក​ ​ប៉ុន្តែ​ទំនាក់​ទំនង​នេះ​ត្រូវ​ផ្អាក​មួយ​រយៈ​ដោយ​សារ​បញ្ហា​សង្គ្រាម​ស៊ីវិល​នៅ​កម្ពុជា។ ​យ៉ាងណា​ក្តី​ ទំនាក់​ទំនង​ការ​ទូត​រវាង​ប្រទេស​ទាំងពីរ​ត្រូវ​បាន​ភ្ជាប់​ឡើង​វិញ ​នៅ​ខែ​កញ្ញា​ឆ្នាំ​១៩៩៩។​

ក្រោយ​បញ្ចប់​ដំណើរ​ទស្សន​កិច្ច​រយៈពេល​បី​ថ្ងៃ​របស់​នាយក​រដ្ឋមន្រ្តី​នេប៉ាល់នៅ​ថ្ងៃ​ពុធ​នេះ​ ​ប្រទេស​ទាំង​ពីរ​បាន​ចេញ​សេចក្តី​ថ្លែង​ការណ៍​រួម​មួយ ​ដោយ​បញ្ជាក់​អំពី​លទ្ធផល​នៃ​ដំណើរ​ទស្សន​កិច្ច​នោះ។​

សេចក្តី​ថ្លែង​ការណ៍​រួម​បាន​បង្ហាញ​ពី​ការ​ប្តេជ្ញា​ចិត្ត​រូម​នៃ​ប្រមុខ​រដ្ឋា​ភិបាល​ទាំង​ពីរ​កម្ពុជា​នេប៉ាល់​ក្នុង​ការ​ពង្រឹង​ទំនាក់​ទំនង​ និង​ជំរុញ​កិច្ច​សហ​ប្រតិបត្តិការ​ផ្នែក​ពាណិជ្ជ​កម្ម ​ទេស​ចរណ៍ ​វប្បធម៌ ​និង​ការ​អប់រំ។

សេចក្តី​ថ្លែង​ការណ៍​រួម​នោះ​បានបង្ហាញ​ពី​សារៈ​សំខាន់នៃ​ការ​ភ្ជាប់​ជើង​ហោះ​ហើរ​ត្រង់ ដែល​នឹង​«មាន​សារៈ​សំខាន់​ក្នុង​ការ​ជំរុញ​ធុរកិច្ច​ និង​ទេសចរណ៍»។ ​សេចក្តី​ថ្លែង​ការណ៍​បញ្ជាក់​ថា ​នាយក​រដ្ឋ​មន្ត្រី​កម្ពុជា​ ​និង​នេប៉ាល់​ឯកភាព​ថា គួរ​សហការ​ជិតស្និទ​លើ​វេទិកា​តំបន់ ​អន្តរជាតិ ​និង​សហ​ប្រជាជាតិដើម្បី​សន្តិភាព​ ស្ថិរភាព​ ការ​អភិវឌ្ឍដោយ​ចីរភាព​ និង​វិបុលភាព។

លោក​បណ្ឌិត​ឈាង វណ្ណារិទ្ធ ​នាយក​វិទ្យាស្ថាន​ចក្ខុ​វិស័យ​អាស៊ី ​បាន​កត់​សម្គាល់​ក្នុង​គេហទំព័រ​របស់​វិទ្យាស្ថាន​ថា ​ក្នុងន័យ​នយោបាយ ​និង​យុទ្ធសាស្ត្រ ​បណ្តា​ប្រទេស​ទន់ខ្សោយ​នៅ​ក្នុង​តំបន់ ​ដូចជា​កម្ពុជា​ នេប៉ាល់ ​ឬ​ក៏​ភូមា​ជាដើម ​កំពុង​តែ​ខំប្រឹង​រួបរួម​គ្នា​ដើម្បី​ទប់ទល់​នឹង​ឥទ្ធិពល​ពី​ខាង​ក្រៅ​ ​ខណៈ​ប្រទេស​ទាំង​នេះ​មាន​ស្ថានភាព​ប្រហាក់​ប្រហែល​គ្នា​ ហើយ​រង​សម្ពាធ​ពី​ខាង​ក្រៅ​ដូច​គ្នា។​

ពាក់ព័ន្ធ​នឹង​បំណង​ជំរុញ​ឲ្យ​មាន​ជើង​ហោះ​ហើរ​ត្រង់ និង​ការ​បើក​ស្ថានទូត​នៃ​ប្រទេស​ទាំង​ពីរ​លោក​បណ្ឌិត​ឈាង វណ្ណារិទ្ធ​ប្រាប់ ​VOA​ ​ថា​ ​ប្រទេស​ទាំង​ពីរ​អាច​ចាប់​ផ្តើម​ការ​សាក​ល្បង​ការ​ហោះ​ហើរ​ត្រង់​បាន ​ប៉ុន្តែ​លោក​ថា ​ការ​ហោះហើរ​នេះ​មិន​អាច​ធ្វើ​បាន​ជារៀង​រាល់​ថ្ងៃ​នោះ​ទេ។​

លោក​ឈាង វណ្ណារិទ្ធ​ក៏​បាន​បញ្ជាក់​អំពី​ផល​ប្រយោជន៍​នៃ​ការ​បើក​ស្ថានទូត​រវាង​ប្រទេស​ទាំង​ពីរ​ថា៖​

«ការ​បង្កើត​ស្ថានទូត​ហ្នឹង​វា​មិន​ត្រឹម​តែ​ជួយ​ខាង​សេដ្ឋ​កិច្ច​ទេ​ ក៏​ជួយ​ផ្នែក​វប្បធម៌​ដែរ។​ ការ​ទំនាក់​ទំនង​ប្រជាជន​ហ្នឹង​ឲ្យ​ស្គាល់​គ្នា។​ ព្រោះអី​ខ្មែរ​យើង​ទៅ​គោរព​កន្លែង​ព្រះ​កើត​ហ្នឹង​ ទៅ​ទេសចរណ៍​លក្ខណៈ​សាសនា​ហ្នឹង ​ខ្មែរ​យើង​ក៏​ចាប់​អារម្មណ៍​ទៅ​នេប៉ាល់ច្រើន​ដែរ។ ​អ៊ីចឹងទេ​បើ​មាន​ស្ថានទូត​អី​ហ្នឹង​ក៏​អាច​ផ្សព្វ​ផ្សាយ​អំពី​ពុទ្ធ​សាសនា​ Cultural, Civilization Exchange​ [ការ​ផ្លាស់​ប្តូរ​វប្បធម៌ ​ផ្លាស់ប្តូរ​អរិយធម៌] ​ផ្លាស់​ប្តូរ​គ្នា​ទៅ​វិញ​ទៅ​មក​ក៏​ជា​ការ​ល្អ​ដែរ»។​

បើ​តាម​របាយ​ការណ៍​របស់​ក្រសួង​ពាណិជ្ជ​កម្ម​កម្ពុជា​ ​ទំនាក់​ទំនង​ពាណិជ្ជ​កម្ម​រវាងកម្ពុជា​និង​នេប៉ាល់នៅ​មាន​ចំនួន​តិចតួច​នៅ​ឡើយ។ ​ចាប់​ពី​ឆ្នាំ​២០១៤​រហូត​ដល់រ​យៈពេល​៦​ខែ​ឆ្នាំ​២០១៨​ ទំហំ​ពាណិជ្ជ​កម្ម​រវាង​ប្រទេស​ទាំងពីរ​មាន​ជិត​១៧​ម៉ឺន​ដុល្លារ​អាមេរិក។ ​ក្នុង​នោះ​ការ​ផ្លាស់​ប្តូរ​មុខ​ទំនិញ​គ្នា​ភាគ​ច្រើន​គឺ​ជុំវិញ​ទំនិញ​ជាសម្លៀក​បំពាក់​និង​វត្ថុធាតុ​ដើម​សម្រាប់​ផលិត​សម្លៀក​បំពាក់៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG