ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

នាយក​រដ្ឋមន្ត្រី​នេប៉ាល់​ចាប់​ផ្តើម​ទស្សនកិច្ច​នៅ​កម្ពុជា​ បន្ទាប់​ពី​វៀតណាម


នាយក​រដ្ឋ​មន្ត្រី​ប្រទេស​នេប៉ាល់ លោក​ខាត់ហ្គា ប្រាសាត​ សាម៉ា អូលី (Khadga Prasad Sharma Oli) ដើរអមលោកនាយករដ្ឋមន្ត្រី ហ៊ុន សែន កាន់ក្បួនព្យុហយាត្រា នៅក្នុងជំនួបពិភាក្សាគ្នាមួយ នៅវិមានសន្តិភាព រាជធានីភ្នំពេញ ថ្ងៃទី១៣ ខែឧសភា ឆ្នាំ២០១៩។ (REUTERS/Samrang Pring)

ក្រោយពី​​ដំណើរ​ទស្សនកិច្ច​រយៈ​ពេល​បួន​ថ្ងៃ​នៅ​ប្រទេស​វៀតណាម នាយក​រដ្ឋ​មន្ត្រី​​នេប៉ាល់​បាន​មក​ដល់​ប្រទេស​កម្ពុជា​នៅ​ថ្ងៃ​ចន្ទ​នេះ​ ដើម្បី​ចាប់​ផ្តើម​ទស្សន​កិច្ច​រឹត​ចំណង​ទ្វេ​ភាគី។ ក្រៅ​ពី​ជួប​ជាមួយ​ថ្នាក់​ដឹកនាំ​​របស់​កម្ពុជា នាយក​រដ្ឋ​មន្ត្រី​នេប៉ាល់​នឹង​​ចូលរួម​វេទិកា​ធុរកិច្ចកម្ពុជា-នេប៉ាល់​រ។

នាយក​រដ្ឋ​មន្ត្រី​ប្រទេស​នេប៉ាល់ លោក​ខាត់ហ្គា ប្រាសាត​ សាម៉ា អូលី (Khadga Prasad Sharma Oli) បាន​ចាប់​ផ្តើម​ដំណើរ​ទស្សន​កិច្ច​ជា​ផ្លូវ​ការ​នៅ​ប្រទេស​កម្ពុជា​នៅ​ថ្ងៃ​ចន្ទ​នេះ ​សម្រាប់​រយៈពេល​បីថ្ងៃ ដើម្បី​ពង្រឹង​កិច្ច​សហ​ប្រតិបត្តិការ​ទ្វេភាគី។ នេះ​បើ​យោង​តាម​សេចក្តី​ប្រកាស​ព័ត៌មាន​របស់​ក្រសួង​ការបរទេស​កម្ពុជា។

ក្នុង​ដំណើរ​ទស្សនកិច្ច​នេះ​ លោក​ អូលី​ ត្រូវ​ជួប​សន្ទនា​ជាមួយ​លោក​នាយក​រដ្ឋ​មន្ត្រី​ ហ៊ុន​ សែន ​លោក​ សាយ​ ឈុំ ប្រធាន​ព្រឹទ្ធសភា​ និង​លោក ហេង សំរិន​ ប្រធាន​រដ្ឋសភា។

នាយក​រដ្ឋ​មន្ត្រី​កម្ពុជា លោក ហ៊ុន សែន អធិប្បាយ​តាម​ទំព័រ​ហ្វេសប៊ុក​របស់​លោក​នៅ​ថ្ងៃ​ចន្ទ​នេះ​ដែរ​ថា ​ដំណើរ​ទស្សនកិច្ច​របស់​លោក​នាយក​រដ្ឋមន្រ្តី​នេប៉ាល់ លោក ​ខាត់​ហ្គា ប្រាសាត​ សាម៉ា អូលី មក​កាន់​កម្ពុជា​នា​ពេល​នេះ «នឹង​ពង្រឹង​នូវ​ចំណង​មិត្តភាព​នៃ​ប្រទេស​ទាំងពីរ​ឲ្យ​កាន់​តែ​រឹងមាំ​ថែម​ទៀត រួម​ជាមួយ​នឹង​កិច្ច​សហប្រតិបត្តិការ​លើ​វិស័យ​សេដ្ឋកិច្ច ពាណិជ្ជកម្ម ទេសចរណ៍ និង​វប្បធម៌​រវាង​ប្រទេស​ទាំងពីរ​ឲ្យ​កាន់​តែ​ស៊ី​ជម្រៅ​ដែល​នាំ​មក​នូវ​ផល​ប្រយោជន៍ជា​ច្រើន​សម្រាប់​ប្រជាជាតិ​នៃ​ប្រទេស​ទាំង​ពីរ»។

យោង​តាម​សេចក្តី​ប្រកាស​ព័ត៌មាន​របស់​ក្រសួង​ការបរទេស ដំណើរ​ទស្សនកិច្ច​របស់​នាយក​រដ្ឋមន្ត្រី​នៃ​ប្រទេស​នេប៉ាល់​មក​កាន់​កម្ពុជា​ថ្ងៃ​នេះ​គឺ​ដើម្បី ​«ពង្រឹង​ឱ្យ​កាន់​តែ​រឹងមាំ​ថែម​ទៀត នូវ​ចំណង​មិត្ត​ភាព និង​លើក​តម្កើង​កិច្ច​សហប្រតិបត្តិការ​លើ​វិស័យ​សេដ្ឋកិច្ច ពាណិជ្ជកម្ម ទេសចរណ៍ និង​វប្បធម៌​រវាង​ប្រទេស​ទាំង​ពីរ»។

លោក ​ខាត់​ហ្គា ប្រាសាត​ សាម៉ា អូលី ចាប់​ផ្តើម​បំពេញ​ទស្សនកិច្ច​នៅ​ប្រទេស​វៀតណាម​រយៈ​ពេល​បួន​ថ្ងៃ​កាល​ពី​ថ្ងៃទី៩ ខែឧសភា មុន​នឹង​មក​ដល់​ប្រទេស​កម្ពុជា។

​នេះ​ជាលើក​ទី​មួយ​ហើយ​ដែល​លោក​នាយក​រដ្ឋមន្ត្រី អូលី មក​បំពេញ​ទស្សនកិច្ច​នៅ​កម្ពុជាចាប់តាំង​ពី​លោក​បាន​ឡើង​កាន់​អំណាច​ជាថ្មី​កាល​ពីខែ​កុម្ភៈ ​ឆ្នាំ​២០១៨។

ក្នុង​ដំណើរ​ទស្សនកិច្ច​នេះ​លោក​នឹង​ថ្លែង​សុន្ទរកថា​គន្លឹះ នៅ​ក្នុង​វេទិកា​ធុរកិច្ច​កម្ពុជា-នេប៉ាល់។

ពុំ​មាន​សេចក្តី​រាយការណ៍​ស្តីពី​គម្រោង​ចុះ​ហត្ថលេខា​លើ​កិច្ច​ព្រម​ព្រៀង​ណាមួយ​រវាង​ប្រទេស​ទាំង​ពីរ​នោះ​ទេ។

កាល​ពី​ខែធ្នូ​ ឆ្នាំ​ ២០១៨ កម្ពុជា ​និង​នេប៉ាល់ ​បាន​ចុះ​ហត្ថលេខា​លើ​កិច្ច​ព្រម​ព្រៀង​ និង​អនុស្សា​រណៈ​ចំនួន​បួន​ រួម​មាន​ កិច្ច​ព្រមព្រៀង​ស្តីពី​ការ​លើក​លែង​ទិដ្ឋាការ​លើ​លិខិត​ឆ្លង​ដែន​ការទូត​ និង​ផ្លូវការ​ កិច្ច​ព្រម​ព្រៀង​ស្តីពី​សេវាកម្ម​ដឹក​ជញ្ជូន​តាម​ផ្លូវ​អាកាស​ អនុស្សារណៈ​នៃ​ការ​យោគ​យល់​គ្នា​ស្តីពី​ការ​ពិគ្រោះ​យោបល់​រវាង​ក្រសួង​ការបរទេស​ប្រទេស​ទាំងពីរ​ និង​អនុ​ស្សា​រណៈ​នៃ​ការ​យោគ​យល់​គ្នា​ស្តីពី​កិច្ច​សហ​ប្រតិបត្តិការ​លើ​វិស័យ​វប្បធម៌។

VOA ​មិន​ទាន់​អាច​សុំ​ការ​អធិប្បាយ​ពី​លោក​ កេត សោផាន់​ អ្នកនាំពាក្យ​ក្រសួងការ​បរទេស​កម្ពុជា​បាន​ទេ រហូត​ដល់​ល្ងាច​ថ្ងៃ​ចន្ទ​នេះ។

​ក្រុម​អ្នក​តាម​ដាន​កិច្ច​ការ​នយោបាយ​កម្ពុជា​ធ្លាប់​បាន​អធិប្បាយ​ជាមួយ VOA ​ថា​ទស្សនកិច្ច​របស់​ប្រមុខ​រដ្ឋាភិបាល​ប្រទេស​នេប៉ាល់​ ដើម្បី​ស្វែងរក​ការ​ពង្រឹង​ទំនាក់​ទំនងសេដ្ឋកិច្ច ​និង​ការ​គាំទ្រ​នយោបាយទាំង​ទ្វេភាគី​ និង​សម្រាប់​លើ​ឆាក​អន្តរជាតិ៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG