ស្ថិរភាពនយោបាយនិងម៉ាក្រូសេដ្ឋកិច្ច ការបើកចំហសេដ្ឋកិច្ចសម្រាប់អ្នកវិនិយោគដោយគ្មានការរើសអើង កម្លាំងពលកម្មមានភាពសម្បូរបែបនិងវ័យក្មេង ហើយកម្ពុជាស្ថិតលើទីតាំងយុទ្ធសាស្ត្រនៃតំបន់អាស៊ាន។ នេះគឺជាសាររបស់លោកនាយករដ្ឋមន្ត្រីហ៊ុន សែនដើម្បីស្រូបយកចំណាប់អារម្មណ៍ពីក្រុមអ្នកជំនួញរបស់ប្រទេសនេប៉ាល់ក្នុងវេទិកាធុរកិច្ចកម្ពុជា-នេប៉ាល់នៅរាជធានីភ្នំពេញ នាថ្ងៃអង្គារនេះ។
«ក្នុងនាមរាជរដ្ឋាភិបាល ខ្ញុំសូមធានាជូនអ្នកវិនិយោគគ្រប់រូបនូវបរិស្ថានគ្រប់បែបយ៉ាងដែលអនុគ្រោះនិងជួយជំរុញដល់ការវិនិយោគ ពិសេសគឺសន្តិភាព សន្តិសុខ និងស្ថិរភាពនយោបាយ ក៏ដូចជាស្ថិរភាពម៉ាក្រូសេដ្ឋកិច្ច ក្របខណ្ឌច្បាប់និងស្ថាប័នដែលប្រកបដោយប្រសិទ្ធភាព តម្លាភាព គណនេយ្យភាពនិងភាពអាចប៉ាន់ប្រមាណបាន»។
វេទិកាធុរកិច្ចកម្ពុជានេប៉ាល់ធ្វើឡើង ខណៈដែលនាយករដ្ឋមន្ត្រីនេប៉ាល់ លោកខាត់ហ្គា ប្រាសាត សាម៉ា អូលី(Khadga Prasad Sharma Oli)កំពុងបំពេញទស្សនកិច្ចនៅប្រទេសកម្ពុជាឈានដល់ថ្ងៃទី២នៅថ្ងៃនេះ។
វេទិកាធុរកិច្ចនេះស្ថិតក្រោមអធិបតីភាពនៃប្រមុខរដ្ឋាភិបាលនៃប្រទេសកម្ពុជានិងនេប៉ាល់និងមានការចូលរួមដោយក្រុមពាណិជ្ជករធំៗនៃប្រទេសទាំងពីរ។
នៅក្នុងឱកាសនេះដែរ លោកនាយករដ្ឋមន្រ្តីហ៊ុន សែនបានថ្លែងទៅកាន់ធុរកិច្ចជនកម្ពុជា ដោយលើកទឹកចិត្តដល់អ្នកវិនិយោគកម្ពុជាឲ្យពិចារណាប្រទេសនេប៉ាល់ជាគោលដៅនៃការបណ្តាក់ទុករកស៊ីរបស់ខ្លួនផងដែរ។
ដោយឡែក លោកខាត់ហ្គា ប្រាសាត សាម៉ា អូលី នាយករដ្ឋមន្ត្រីនេប៉ាល់ ថ្លែងថា លោកស្វាគមន៍អ្នកវិនិយោគបរទេសទៅកាន់ប្រទេសរបស់លោក។ដំណាលគ្នានេះ លោកបានអំពាវនាវដល់សហគមន៍ធុរកិច្ចនៃប្រទេសកម្ពុជាឲ្យស្វែងរកឱកាសធុរកិច្ចនៅប្រទេសនេប៉ាល់។
លោកអូលីនឹងត្រូវបញ្ចប់ទស្សនកិច្ចរយៈពេលបីថ្ងៃរបស់លោកនៅកម្ពុជានៅថ្ងៃពុធស្អែកនេះ។
ក្នុងដំណើរទស្សនកិច្ចនេះ កម្ពុជា និងនេប៉ាល់បានចុះកិច្ចព្រមព្រៀងចំនួនពីរគឺកិច្ចព្រមព្រៀងស្តីពីពាណិជ្ជកម្ម និងវិនិយោគ និងអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការទ្វេភាគីរវាងសភាពាណិជ្ជកម្មនេប៉ាល់ និងសភាពាណិជ្ជកម្មកម្ពុជា។ ក្រៅពីនោះកម្ពុជា និងនេប៉ាល់ក៏កំពុងពិចារណាបង្កើតឲ្យមានស្ថានទូតនៃប្រទេសទាំងពីរប្រចាំប្រទេសរៀងៗខ្លួន និងចង់ឲ្យបង្កើតជើងហោះហើរដោយផ្ទាល់ផងដែរ។ ប្រទេសនេប៉ាល់ និងកម្ពុជាពុំមានស្ថានទូតរៀងខ្លួនចាប់តាំងពីអំឡុងពេលដែលកម្ពុជាមានសង្គ្រាមស៊ីវិលដ៏តានតឹង។
លោកបណ្ឌិតឈាង វណ្ណារិទ្ធ អ្នកវិភាគកិច្ចការតំបន់ ប្រាប់ VOA នារសៀលថ្ងៃអង្គារនេះថា អ្នកវិនិយោគពីកម្ពុជាអាចមានលទ្ធភាពក្នុងការវិនិយោគផ្នែកគ្រឹះស្ថានមីក្រូហិរញ្ញវត្ថុ និងទេសចរណ៍ នៅប្រទេសនេប៉ាល់។ លោកបន្តថា អ្នកវិនិយោគនេប៉ាល់អាចនឹងមានលទ្ធភាពវិនិយោគជាមួយកម្ពុជាតាមរបៀបសហប្រតិបត្តិការប៉ុណ្ណោះ។
«សហគ្រិនភាពរបស់នេប៉ាល់មើលទៅនៅទាបជាងខ្មែរ ក៏ប៉ុន្តែវាអាចជា Join Venture ណាមួយជាមួយគ្នាបាន បើយើងមើលទៅ។ ក៏ប៉ុន្តែ បើនិយាយពីសក្តានុពល វានៅទាបនៅឡើយ។ និយាយឲ្យចំទៅ ដូចភូមាអ៊ីចឹង។ ភូមាជាមួយយើង សក្តានុពលហ្នឹងនៅមានកម្រិតទាប។ ប៉ុន្តែជាចំណុចចាប់ផ្តើមមួយ។ អាហ្នឹងជារបត់ថ្មីមួយដែរ លំហូរពាណិជ្ជកម្មនៃប្រទេសក្រនិងប្រទេសក្រ»។
ទំនាក់ទំនងពាណិជ្ជកម្មរវាងកម្ពុជានិងនេប៉ាល់នៅមានចំនួនតិចតួចនៅឡើយ។ ចាប់ពីឆ្នាំ២០១៤រហូតដល់រយៈពេល៦ខែដើមឆ្នាំ២០១៨ ទំហំពាណិជ្ជកម្មរវាងប្រទេសទាំងពីរមានជិត១៧ម៉ឺនដុល្លារអាមេរិក។ ក្នុងនោះកម្ពុជានាំចេញទៅនេប៉ាល់មានជាង១២ម៉ឺនដុល្លារ ហើយកម្ពុជានាំចូលពីនេប៉ាល់មកវិញមានជាង៤ម៉ឺនដុល្លារអាមេរិក។ ការផ្លាស់ប្តូរមុខទំនិញគ្នាភាគច្រើនគឺទំនិញសម្លៀកបំពាក់ និងវត្ថុធាតុដើមសម្រាប់ផលិតសម្លៀកបំពាក់។ នេះបើតាមរបាយការណ៍របស់ក្រសួងពាណិជ្ជកម្មកម្ពុជា។
កាលពីខែធ្នូឆ្នាំ២០១៨ កម្ពុជានិងនេប៉ាល់បានចុះហត្ថលេខាលើកិច្ចព្រមព្រៀង និងអនុស្សរណៈចំនួនបួន រួមមាន កិច្ចព្រមព្រៀងស្តីពីការលើកលែងទិដ្ឋាការលើលិខិតឆ្លងដែនការទូត និងផ្លូវការ កិច្ចព្រមព្រៀងស្តីពីសេវាកម្មដឹកជញ្ជូនតាមផ្លូវអាកាស អនុស្សរណៈនៃការយោគយល់គ្នាស្តីពីការពិគ្រោះយោបល់រវាងក្រសួងការបរទេសប្រទេសទាំងពីរ និងអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើវិស័យវប្បធម៌៕
