គណបក្សបេះដូងជាតិដែលមន្ត្រីគណបក្សកាន់អំណាចសង្ស័យថាមានទំនាក់ទំនងជាមួយក្រុមអ្នកនយោបាយដែលស្និទ្ធនឹងមេដឹកនាំបក្សជំទាស់លោកសម រង្ស៊ីនៅថ្ងៃសុក្រនេះបានដាក់ពាក្យបណ្តឹងប្រឆាំងនឹងសេចក្តីសម្រេចរបស់ក្រសួងមហាផ្ទៃដែលមិនអនុញ្ញាតឲ្យគណបក្សនេះបានចុះបញ្ជី។
កាលពីដើមខែវិច្ឆិកា ឆ្នាំ២០២១ក្រសួងមហាផ្ទៃសម្រេចមិនអនុញ្ញាតឲ្យគណបក្សថ្មីថ្មោងមួយនេះបានចុះបញ្ជីក្រោមហេតុផលថាគណបក្សនយោបាយនេះក្លែងបន្លំស្នាមមេដៃសមាជិកគណបក្ស។
អមដំណើរដោយមេធាវីគឺលោក សំ សុគង់ ស្ថាបនិកគណបក្សបេះដូងជាតិលោកសៀមភ្លុកបាននាំយកពាក្យបណ្តឹងមួយច្បាប់ដាក់ទៅកាន់តុលាការកំពូលនារសៀលថ្ងៃសុក្រនេះ។
នៅក្នុងពាក្យបណ្តឹងនោះលោកសៀមភ្លុកបានប្រាប់តុលាការកំពូលថាគណបក្សបេះដូងជាតិបានដាក់ពាក្យស្នើសុំចុះបញ្ជីនៅថ្ងៃទី៩ខែកក្កដាឆ្នាំ២០២១ទៅក្រសួងមហាផ្ទៃតាមនីតិវិធីហើយក្រសួងក៏បានចេញលិខិតជូនដំណឹងឲ្យគណបក្សកែសម្រួលលក្ខន្តិកៈចំនួន៣ដងរួចមកហើយ ប៉ុន្តែក្រសួងមិនបានជូនដំណឹងអំពីបញ្ហាស្នាមមេដៃរបស់សមាជិកនោះទេហើយគណបក្សបេះដូងជាតិបានកែសម្រួលតាមការណែនាំរបស់ក្រសួងមហាផ្ទៃដោយមិនដែលអាក់ខានម្តងណាឡើយ។ ក្រោយមកទៀតក្រសួងនៅតែសម្រេចមិនទទួលស្គាល់គណបក្សបេះដូងជាតិដដែល។
លោក សៀម ភ្លុក ប្រាប់វីអូអេនៅក្រៅរបងតុលាការកំពូលថា ក្រសួងមហាផ្ទៃនៅបន្តលើកយកភាពមិនប្រក្រតីនៃស្នាមមេដៃនិងកង្វះឯកសារពាក់ព័ន្ធផ្សេងទៀតដែលលោកថានេះជា«លេស»ដើម្បីច្រានចោលសំណើសុំចុះបញ្ជី។
ហេតុដូច្នេះលោកក៏សម្រេចចិត្តប្តឹងមកតុលាការកំពូលដើម្បីរកយុត្តិធម៌និងបើកផ្លូវឲ្យគណបក្សនយោបាយរបស់លោកបានក្លាយជាគណបក្សជំទាស់ថ្មីមួយដើម្បីចូលរួមការប្រកួតប្រជែងក្នុងការបោះឆ្នោតនៅពេលខាងមុខ។
លោកបញ្ជាក់ថា៖ «ខាងខ្ញុំចូលរួមបង្កើតគណបក្សប្រឆាំងដើម្បីប្រជែងជាមួយគណបក្សកាន់អំណាច»។
លោក សៀម ភ្លុក ដែលអះអាងថាមិនធ្លាប់ជាសមាជិកអតីតគណបក្សសង្គ្រោះជាតិរំពឹងថាតុលាការកំពូលនឹងពិចារណាអំពីការបដិសេធរបស់ក្រសួងមហាផ្ទៃ។ ប៉ុន្តែលោកថាដោយសារសំណុំរឿងចុះបញ្ជីគណបក្សនយោបាយនេះជារឿងនយោបាយនោះមានតែឆន្ទៈរបស់អ្នកនយោបាយទេដែលអាចទម្លាយភាពទ័លច្រកនៃការស្នើសុំចុះបញ្ជីគណបក្សនយោបាយរបស់លោកបាន។
អ្នកនយោបាយរូបនេះបន្ថែមថាលោកមិនខ្វល់នឹងការលើកឡើងនានាថាគណបក្សរបស់លោកមានទំនាក់ទំនងជាមួយអតីតមេដឹកនាំគណបក្សសង្គ្រោះជាតិលោកសម រង្ស៊ីដែលកំពុងនិរទេសខ្លួននៅក្រៅប្រទេសនោះទេ។
លោកថ្លែងថា៖ «ច្បាប់គេមិនបានហាមឃាត់ថា អ្នកដែលធ្លាប់គាំទ្រគណបក្សសង្គ្រោះជាតិឬអ្នកនយោបាយនៅក្នុងសង្គ្រោះជាតិមិនអាចធ្វើនយោបាយបានឯណា។ខ្ញុំអត់មានអ្នកនយោបាយជាប់បម្រាមរឿងអីដែលពួកខ្ញុំធ្វើនយោបាយមិនបាន?»
ការត្រៀមបង្កើតគណបក្សនយោបាយរបស់លោក សៀម ភ្លុក ធ្វើឡើងនៅពេលមានការបង្កើតគណបក្សនយោបាយថ្មីៗបន្ថែមទៀតដោយអតីតមន្ត្រីជាន់ខ្ពស់របស់គណបក្សសង្គ្រោះជាតិក្នុងនោះមានគណបក្សកែទម្រង់កម្ពុជារបស់លោកអ៊ូ ច័ន្ទរ័ត្នអតីតតំណាងរាស្ត្រមណ្ឌលខេត្តតាកែវនិងគណបក្សកម្ពុជានិយមរបស់លោកយ៉ែមប៉ុញ្ញាឫទ្ធិដែលជាអ្នកនយោបាយមកពីក្រុមលោក កឹម សុខាមេដឹកនាំគណបក្សជំទាស់មួយរូបទៀតដែលកំពុងជាប់បម្រាមនយោបាយ។
លោក សំ សុគង់ ដែលជាមេធាវីការពារក្តីឲ្យគណបក្សបេះដូងជាតិប្រាប់វីអូអេនៅថ្ងៃសុក្រថាពាក្យបណ្តឹងទៅកាន់តុលាការកំពូលរបស់កូនក្តីលោកធ្វើឡើងស្របតាមច្បាប់ស្តីពីគណបក្សនយោបាយត្រង់មាត្រា២៥ដែលចែងពីករណីដែលក្រសួងមហាផ្ទៃមិនអនុញ្ញាតឲ្យចុះបញ្ជី។
លោកថ្លែងថា៖«ក្រសួងមហាផ្ទៃបដិសេធមិនព្រមចុះបញ្ជីឲ្យហ្នឹងគឺនៅក្នុងមាត្រា២៥នៃច្បាប់ស្តីពីវិសោធនកម្មច្បាប់ស្តីពីនយោបាយហ្នឹងគឺតម្រូវឲ្យអ្នកដាក់ពាក្យសុំដែលជាស្ថាបនិកគណបក្សអាចដាក់ពាក្យប្តឹងមកតុលាការកំពូលឲ្យពិនិត្យឡើងវិញ។ អ៊ីចឹងហើយបានយើងយោងទៅតាមច្បាប់យើងគោរពច្បាប់អ៊ីចឹងហើយបានកូនក្តីក៏សម្រេចចិត្តដាក់ពាក្យបណ្តឹងមកតុលាការកំពូល»។
ទាក់ទិនការដាក់ពាក្យបណ្តឹងរបស់គណបក្សបេះដូងជាតិទៅតុលាការកំពូលលោកនាយឧត្តមសេនីយ៍ខៀវ សុភ័គអ្នកនាំពាក្យក្រសួងមហាផ្ទៃបដិសេធមិនអត្ថាធិប្បាយអំពីមូលហេតុដែលក្រសួងច្រានចោលការចុះបញ្ជីរបស់គណបក្សបេះដូងជាតិចំនួន៣លើកមកហើយនេះទេនៅពេលវីអូអេសាកសួរតាមទូរស័ព្ទកាលពីរសៀលថ្ងៃសុក្រ។
លោកបញ្ជាក់យ៉ាងខ្លីថា៖ «គាត់ដាក់ពាក្យប្តឹងហើយ ពូសុំមិនជម្រាបប្រាប់តាមសារព័ត៌មានទេ ចាំទៅដល់កន្លែងសវនាការតែម្តងទៅ»។
អ្នកវិភាគនយោបាយលោកសេង សារីយល់ថាទាក់ទិននឹងការចោទប្រកាន់មកលើគណបក្សបេះដូងជាតិថាមានលោកសម រង្ស៊ីនៅពីក្រោយខ្នងនោះជាការចោទប្រកាន់ដែលមិនមានភស្តុតាងជាក់លាក់នៅឡើយទេ។ លោកមើលឃើញថាគណបក្សបេះដូងជាតិនៅតែពុះពារក្នុងការទាមទារឲ្យបានសិទ្ធិក្នុងការចុះបញ្ជីក្នុងគណបក្សនយោបាយសម្រាប់ប្រកួតប្រជែងជាមួយគណបក្សកាន់អំណាចនៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ក្នុងឆ្នាំ២០២២និងការបោះឆ្នោតថ្នាក់ជាតិនៅឆ្នាំ២០២៣ខាងមុខ។
លោកមានប្រសាសន៍ថា៖ «អ្វីដែលខ្ញុំបានដឹងកន្លងមកយើងឃើញថាស្នាមមេដៃនេះវាជាបញ្ហាចុងក្រោយដែលតាមពិតទៅក្រសួងគួរតែប្រើយន្តការនៅក្នុងការឲ្យគណបក្សបេះដូងជាតិកែសម្រួលជាជាងការប្រើប្រាស់យន្តការតុលាការឬក៏បដិសេធ»។
លោកបន្ថែមថា៖ «ក្នុងករណីប្រសិនបើមានភាពមិនច្បាស់លាស់ឬក៏ស្នាមមេដៃមិនមានគុណភាពអី ហ្នឹងយើងអាចដាក់កែទៅព្រោះអីកន្លងមកយើងឃើញក្រសួងមហាផ្ទៃបានអនុវត្តនីតិវិធីហ្នឹងឲ្យគណបក្សបេះដូងជាតិកែសម្រួលលក្ខន្តិកៈស្របទៅតាមច្បាប់។ប៉ុន្តែនៅក្នុងការស្នើឲ្យមានការកែនោះមិនបានរួមបញ្ចូលនៅក្នុងការឲ្យគណបក្សបេះដូងជាតិអាចកែសម្រួលស្នាមមេដៃឬក៏ជំនួសស្នាមមេដៃអីផ្សេងទេក៏មានការបដិសេធតែម្តង» ។
យ៉ាងណាក៏ដោយលោកមិនទាន់អាចប៉ាន់ប្រមាណពីកម្លាំងគាំទ្ររបស់គណបក្សបេះដូងជាតិដែលចូលខ្លួនមកជំនួសគណបក្សសង្រ្គោះជាតិនោះទេ។
គិតចាប់តាំងពីការរំលាយគណបក្សសង្គ្រោះជាតិកាលពីឆ្នាំ២០១៧មានគណបក្សនយោបាយបង្កើតដោយក្រុមអតីតសមាជិកជាន់ខ្ពស់នៃគណបក្សនេះយ៉ាងតិច៦គណបក្សហើយ។ប៉ុន្តែមានតែគណបក្សបីបួនប៉ុណ្ណោះដែលទទួលបានសុពលភាពឲ្យដំណើរការជាផ្លូវការពីក្រសួងមហាផ្ទៃ។ នេះបើតាមអ្នកនយោបាយមួយចំនួនដែលបានបង្កើតគណបក្សថ្មីៗសម្រាប់ចូលរួមការបោះឆ្នោតនៅឆ្នាំក្រោយ៕
