ភ្នំពេញ៖ ក្រុមការងារចម្រុះដែលត្រូវបានរៀបចំដោយរដ្ឋាភិបាលបានរកឃើញថា មានការបំពាន និងការកេងប្រវ័ញ្ចជាច្រើនលើពលករស្របច្បាប់កម្ពុជាក្នុងប្រទេសម៉ាឡេស៊ី។
កាលពីថ្ងៃទី២ដល់ថ្ងៃទី៥ខែធ្នូ គណៈកម្មការចំរុះដែលមានសមាជិកសរុប២២រូបរួមមាន តំណាងរបស់ក្រសួងមហាផ្ទៃ ក្រសួងការងារ សមាគមទីភ្នាក់ងារជ្រើសរើសពលករ អង្គការក្រៅរដ្ឋាភិបាល និងអង្គការសហប្រជាជាតិសម្រាប់ស្ត្រី បានចុះទៅស៊ើបអង្កេតស្ថានភាពការងាររបស់ស្ត្រីកម្ពុជាដែលកំពុងបម្រើការតាមផ្ទះនៅម៉ាឡេស៊ី។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាប្រធានក្រុមការងារចម្រុះថ្លែងថា ក្រុមការងាររបស់លោកស្រីបានរកឃើញករណីរំលោភបំពានពលករខ្មែរចំនួនបួនប្រភេទធំៗ។
«វាមានការរងគ្រោះដោយការកេងប្រវ័ញ្ចផ្លូវភេទ ការជួញដូរជនទេសន្តរប្រវេសន៍ ការរំលោភម៉ោងការងារ និងការកេងប្រវ័ញ្ចប្រាក់កម្រៃការងារដោយបង្ខំ។»
ការរកឃើញនេះស្របគ្នានឹងការរកឃើញរបស់អង្គការជំនួយផ្នែកច្បាប់សម្រាប់ស្ត្រីនិងកុមារ មជ្ឈមណ្ឌលអប់រំច្បាប់សម្រាប់សហគមន៍ និងអង្គការលីកាដូដែលបានចុះទៅពិនិត្យស្ថានភាពពលករកម្ពុជានៅប្រទេសម៉ាឡេស៊ីដែរ។
លោក សំលៀង សីលា នាយកប្រចាំប្រទេសនៃអង្គការសកម្មភាពដើម្បីកុមារ (APLE) ដែលបានចូលរួមក្នុងគណៈប្រតិភូនេះដែរ បានបញ្ជាក់បន្ថែមថា ស្ថានភាពរំលោភសិទ្ធិពលករនៅប្រទេសម៉ាឡេស៊ីមានច្រើនសណ្ឋាន។
«ពលករមួយចំនួនត្រូវបានម្ចាស់ផ្ទះធ្វើបាប វាយដំ ប្រើអំពើហិង្សា ហើយមួយចំនួនទៀតគឺថៅកែមិនបើកប្រាក់ខែឱ្យទៀងទាត់ ហើយគេត្អូញត្អែរថា ពិបាកស្វែងរកជំនួយផ្លូវច្បាប់ ដោយគាត់យល់ឃើញថា ទី១មិនអាចឈ្នះក្តីដោយសារគាត់អត់មានលុយកាក់។ ទី២ វាត្រូវចំណាយពេលវេលាច្រើនទៀត។ អញ្ចឹងជនរងគ្រោះមួយចំនួនក៏ត្រលប់មកកម្ពុជាវិញដោយពុំមានការដោះស្រាយត្រឹមត្រូវ។»
ក្រៅពីបញ្ហារំលោភបំពានទាំងនេះ គណៈប្រតិភូកម្ពុជាក៏បានរកឃើញការបញ្ជូនក្មេងស្រីជាអនីតិជនទៅធ្វើការនៅបរទេស។ ជាក់ស្តែងនៅពេលចុះធ្វើទស្សនកិច្ចផ្ទះសុវត្ថិភាព ដែលជាមណ្ឌលសង្គ្រោះពលករបរទេសរងគ្រោះដែលក្នុងនោះមានពលករខ្មែររងគ្រោះចំនួន១៣នាក់កំពុងស្នាក់នៅ ក្រុមការងារបានប្រទះឃើញកុមារីអាយុត្រឹម១៧ទៅ១៨ឆ្នាំ ដែលត្រូវបានបញ្ជូនមកធ្វើការនៅម៉ាឡេស៊ីជាងពីរឆ្នាំដោយមិនបានទទួលបៀវត្សរ៍អ្វីទាំងអស់។
ក្រុមការងារចម្រុះបានជួបជាមួយតំណាងរដ្ឋាភិបាលម៉ាឡេស៊ី សមាគមនិយោជក ស្ថានទូតខ្មែរប្រចាំប្រទេសម៉ាឡេស៊ី អង្គការក្រៅរដ្ឋាភិបាល ពលករខ្មែរបម្រើការតាមផ្ទះចំនួនបួននាក់ និងជួបជនរងគ្រោះនៅមជ្ឈមណ្ឌលការពារជនរងគ្រោះរបស់ម៉ាឡេស៊ីចំនួន១៣នាក់។
កាលពីខែតុលា ឆ្នាំ២០១១ រដ្ឋាភិបាលកម្ពុជាបានហាមការជ្រើសរើសនិងបញ្ជូនពលករកម្ពុជាទៅធ្វើការនៅម៉ាឡេស៊ី ក្រោយពីលេចឮករណីបំពានធ្ងន់ធ្ងរនិងមានជនរងគ្រោះបាត់បង់ជីវិត។
របាយការណ៍របស់អង្គការឃ្លាំមើលសិទ្ធិមនុស្ស (Human Right Watch) ដែលត្រូវបានចេញផ្សាយកាលពីខែវិច្ឆិកាមុននេះ រកឃើញថាមុនពេលរដ្ឋាភិបាលសម្រេចផ្អាកបញ្ជូនពលករទៅម៉ាឡេស៊ី មានកុមារអាយុតិចត្រឹម១៣ឆ្នាំត្រូវបានជ្រើសរើសដោយទីភ្នាក់ងារជ្រើសរើសពលករនិងមេខ្យល់ដើម្បីបញ្ជូនទៅប្រទេសម៉ាឡេស៊ី។ អង្គការនេះបានកត់ត្រាឃើញមានពលករអាយុក្រោម១៨ឆ្នាំចំនួនប្រាំបីករណី។
តាមរបាយការណ៍របស់គណៈប្រតិភូក្នុងជំនួបជាមួយលោកស្រី អ៊ុំ បុប្ផា អគ្គទីប្រឹក្សាអមស្ថានទូតកម្ពុជាប្រចាំប្រទេសម៉ាឡេស៊ី លោកស្រីបានត្អូញត្អែរថា ក្រសួងការងារហាក់ដូចជាព្រលែងពលករទៅដោយមិនយកចិត្តទុកដាក់តាមដាន ពុំមានប្រព័ន្ធទិន្នន័យគ្រប់គ្រងពលករឱ្យបានត្រឹមត្រូវ និងភាពមិនប្រក្រតីរបស់ទីភ្នាក់ងារជ្រើសរើសពលករដូចជាការបញ្ជូនអនីតិជនមកធ្វើការ និងមិនបានបណ្តុះបណ្តាលពលករឱ្យបានត្រឹមត្រូវជាដើម។
លោកបណ្ឌិត អន ប៊ុនហាក់ ប្រធានសមាគមទីភ្នាក់ងារជ្រើសរើសពលករកម្ពុជា ដែលមាន២៥ក្រុមហ៊ុនជាសមាជិក បានចូលរួមក្នុងដំណើរទស្សនកិច្ចនេះដែរ។ លោកទទួលស្គាល់ថា កន្លងមកពិតជាមានករណីមួយចំនួនដូច្នេះមែន។
«ការបណ្តុះបណ្តាលឥតបានគ្រប់គ្រាន់។ ដូច្នេះពេលគាត់ទៅគឺមានការមិនយល់គ្នា ការនិយាយភាសា ដូចជាការប្រើឱ្យយកចានមកហូបបាយបែរជាទៅយកកន្ថោរ ឧបមាអញ្ចឹង។ វាធ្វើឱ្យមានការខឹងពីថៅកែហើយឈានទៅរកអំពើហិង្សា។»
ប៉ុន្តែលោកនិយាយថា ចំពោះករណីបញ្ជូនពលករជាអនិតិជនគឺមានតែមួយចំនួនតូចតែប៉ុណ្ណោះ ហើយក្រុមហ៊ុនទាំងនោះក៏ត្រូវបានបិទនិងឃាត់ខ្លួនដោយសមត្ថកិច្ចអស់ហើយដែរ។
មានពលករខ្មែរទាំងស្របច្បាប់និងខុសច្បាប់ប្រហែល៥ម៉ឺននាក់កំពុងបម្រើការងារតាមផ្ទះ តាមភោជនីយដ្ឋាន និងរោងចក្រនៅប្រទេសម៉ាឡេស៊ី។ ជាមធ្យមពួកគេទទួលបានប្រាក់ខែពី១៣៣ដុល្លារទៅ២០០ដុល្លារ។
លោកស្រី ជូ ប៊ុនអេង មានប្រសាសន៍ថា អវត្តមានយន្តការតាមដាន និងត្រួតពិនិត្យរបស់ទីភ្នាក់ងារជ្រើសរើសពលករក៏ជាផ្នែកមួយធ្វើឱ្យមានការបំពានពលករកម្ពុជាផងដែរ។
«យើងខ្វះការតាមដានត្រួតពិនិត្យ។ កន្លងមកយើងបញ្ជូនពលករបន្តដៃ។ ពីនេះទៅយើងមានក្រុមហ៊ុន ចេញពីក្រុមហ៊ុនប្រទេសយើង ទៅក្រុមហ៊ុនប្រទេសមួយទៀត។ ក្រុមហ៊ុនមួយទៀតទៅនិយោជក។ ដូច្នេះការបន្តដៃបែបនេះជាការទទួលខុសត្រូវកម្រិតណា។»
លោកបណ្ឌិត អន ប៊ុនហាក់ ទទួលស្គាល់កង្វះខាតយន្តការតាមដានរបស់ក្រុមទីភ្នាក់ងាររបស់លោក។ ដូច្នេះការផ្អាកនេះ ជាពេលដ៏ល្អមួយសម្រាប់ក្រុមហ៊ុនពួកលោកកែលម្អកង្វះខាតទាំងនេះ៕
