ក្រុមហ៊ុន ដែលនំាពលករក្នុងប្រទេសកម្ពុជាទៅធ្វើការនៅក្រៅប្រទេស កំពុងរង់ចាំការបញ្ជាក់ពីរដ្ឋាភិបាលកម្ពុជាចំពោះការបញ្ជូនពលករចេញទៅធ្វើការនៅប្រទេសកាតា ដែលគ្រោងធ្វើជាម្ចាស់ផ្ទះនៃការប្រកួតបាល់ទាត់ដណ្តើមពានពិភពលោកឆ្នាំ២០២២។ នេះបើតាមការបញ្ជាក់ពីអ្នកគ្រប់គ្រងរបស់សមាគម និងក្រុមហ៊ុននាំពលករកម្ពុជាចេញទៅធ្វើការនៅក្រៅប្រទេស។
ពួកគេបានប្រាប់វីអូអេនៅថ្ងៃពុធនេះថា ពួកគេមិនទាន់អាចនិយាយបានទេថា តើនឹងត្រូវបញ្ជូនពលករចេញនៅពេលណានោះឡើយ ដោយក្រសួងការងារនៃប្រទេសកម្ពុជាពុំទាន់ចេញសេចក្តីជូនដំណឹងណាមួយដើម្បីអនុញ្ញាតនាំយកពលករកម្ពុជាទៅធើ្វការនៅប្រទេសកាតានៅឡើយទេ ខណៈពេលដែលរដ្ឋាភិបាលកម្ពុជាពុំទាន់បានបញ្ជាក់ឲ្យដឹងថា តើនៅពេលណា ទើបរដ្ឋាភិបាលនឹងចុះអនុស្សរណៈជាមួយប្រទេសកាតាអំពីការបញ្ជូនពលករនោះទេ។
អ្នកស្រីអ៊ឹង ស៊ាងរិទ្ធី ប្រធានសមាគមភ្នាក់ងារជ្រើសរើសពលករកម្ពុជា បានឲ្យដឹងថា អ្នកស្រីពុំទាន់ទទួលបានដំណឹងអ្វីទាំងអស់ទាក់ទងនឹងការអនុញ្ញាតពីរដ្ឋាភិបាលឲ្យក្រុមហ៊ុននាំពលករទៅធ្វើការនៅប្រទេសកាតាទេ។
អ្នកស្រីមានប្រសាសន៍ថា៖ «មិនទាន់ទេអូន ខាងផ្នែកកាតា ដូចជាអត់ទាន់មានបញ្ជូនផង។ អត់បានបញ្ជូនទេផ្នែកកាតា។ សំខាន់អូនអាចទៅសួរក្រសួងការងារបាន គ្រាន់តែខ្ញុំដឹងតែមួយមុខថា នៅកាតាហ្នឹងដែលលក្ខខណ្ឌការងារគាត់ដាក់មក ដូចជាប្រាក់ខែវាតិច ប្រាក់ខែតិចជាងនៅថៃផង»។
កាតាគឺជាប្រទេសដែលមានជាងគេបំផុតតាមរយៈការផលិតប្រេងក្នុងតំបន់អារ៉ាប់ ហើយត្រូវបានបណ្តាញព័ត៌មានអន្តរជាតិ និងក្រុមអង្គការសិទ្ធិមនុស្សជាច្រើនរាយការណ៍ថា ប្រទេសនេះបានរំលោភធ្ងន់ធ្ងរទៅលើសិទ្ធិមនុស្ស និងសិទ្ធិការងាររបស់ពលករ ដែលនាំមកពីបណ្តាប្រទេសផ្សេងៗនៅក្នុងតំបន់អាស៊ី ក្នុងពេលដែលការដ្ឋានកសាងអគារកីឡា និងស្តាតធំៗជាច្រើនកំពុងដំណើរការ នៅមុនការមកដល់នៃការប្រកួតដណ្តើមពានបាល់ទាត់ពិភពលោកក្នុងពេល៧ឆ្នាំខាងមុខនេះ។
លោកខែម ហួរ នាយកក្រុមហ៊ុន CATM Asia Manpower Cooperation Co., Ltd. ក៏ពុំទាន់ទទួលបានព័ត៌មានច្បាស់លាស់ទាក់ទងនឹងការបញ្ជូនពលករ កម្មករកម្ពុជាទៅធ្វើការនៅប្រទេសកាតាដែរ ប៉ុន្តែលោកពន្យល់ថា ក្រុមហ៊ុនរបស់លោកនឹងពិចារណាលើការបញ្ជូនពលករទៅទីនោះ អាស្រ័យទៅតាមតម្រូវការទីផ្សារការងារ។
លោកនិយាយថា៖ «អាហ្នឹងអាស្រ័យលើទីផ្សារដែរ។ បើសិនណាទីផ្សារតម្រូវការ អាហ្នឹងខាងខ្ញុំប្រហែលជានឹងសម្រេចគិតឡើងវិញ»។
ទោះជាពុំទាន់មានការបញ្ជាក់ពីរដ្ឋាភិបាលកម្ពុជាក្នុងការអនុញ្ញាតឲ្យបញ្ជូនពលករទៅធ្វើការនៅប្រទេសកាតាក៏ដោយ ក៏ក្រុមហ៊ុនកូរ៉េមួយឈ្មោះ KCTC Manpower Supply Co.,ដែលទទួលបានអាជ្ញាបណ្ណពីរដ្ឋាភិបាលកម្ពុជា កាលពីខែសីហាឆ្នាំ២០១៤ដើម្បីជ្រើសរើសពលករកម្ពុជាទៅធ្វើការនៅប្រទេសកាតា និងគូវ៉េត កំពុងទទួលយកពាក្យសុំធ្វើការពីពលរដ្ឋកម្ពុជាបណ្តើរៗហើយ។
កញ្ញាលឹម សុភា បុគ្គលិករដ្ឋបាលរបស់ក្រុមហ៊ុន KCTC នេះ បានបដិសេធមិនប្រាប់ពីចំនួនអ្នកមកដាក់ពាក្យនោះទេ ដោយបង្វែសំណួរទាក់អស់ទៅអ្នកគ្រប់គ្រងនៃក្រុមហ៊ុននេះ។ កញ្ញាសុភាក៏ពុំព្រមផ្តល់លេខទំនាក់ទនងនៃអ្នកគ្រប់គ្រងក្រុមហ៊ុននេះដែរ ដោយកញ្ញានិយាយថា៖ «គាត់អត់នៅទេ។ និយាយទៅទាល់តែមកចាំជួបគាត់ខ្លួនឯងតែម្តងទៅ ព្រោះខ្ញុំក៏អត់សូវច្បាស់ពីគាត់ដែរ»។
VOA ពុំអាចទាក់ទងលោកហេង សួ អ្នកនាំពាក្យក្រសួងការងារបានទេដោយសារទូរស័ព្ទរបស់លោកពុំមានអ្នកទទួល។ រីឯលោកហែម ប៊ុន្នី ប្រធាននាយកដ្ឋានពលករ និងការងារនៃក្រសួងការងារ បានបដិសេធពុំធ្វើអធិប្បាយទេ។
គួរបញ្ជាក់ផងដែរថា កាលពីខែកុម្ភៈ លោកអ៊ុច បូរិទ្ធ រដ្ឋលេខាធិការនៃក្រសួងការបទេសកម្ពុជា បានជួបប្រជុំជាមួយលោក Mohamed Bin Abdulla Al-Rumaihi ឧបការីរដ្ឋមន្ត្រីការបរទេសនៃប្រទេសកាតាពិភាក្សាអំពីកិច្ចព្រមព្រៀងបញ្ជូនពលករទៅធ្វើការនៅប្រទេសកាតា។ នេះបើយោងតាមការផ្សព្វផ្សាយកន្លងមករបស់កាសែត Phnom Penh Post៕
