ភ្ជាប់​ទៅ​គេហទំព័រ​ទាក់ទង

ពន្ធនាគារ​បញ្ជូន​កម្មករ​ជាប់​ឃុំឃាំង​មក​ពន្ធនាគារ​ព្រៃស​រង់​ចាំ​សវនាការ

  • ហេង រស្មី

តុលាការ​ក្រុង​ភ្នំពេញ​នៅ​ថ្ងៃ​សុក្រ ទី​២៥​ ខាង​មុខ​នេះ​នឹង​បើក​សវនាការ​ពេញ​អង្គសេចក្តី​ លើ​ករណី​លោក​ វ៉ន់ ពៅ​ និង​ក្រុម​កម្មករ​ចំនួន​២២​នាក់​ផ្សេង​ទៀត​ពីបទ ​«ញុះញុង​និង​បំផ្លេច​បំផ្លាញ​ដោយ​ចេតនា»។
លោក វ៉ន់ ពៅ​ ប្រធាន​សមាគម​ប្រជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ ក្រុម​កម្មករ​ និង សកម្មជន​ដីធ្លី​នៅ​តំបន់​បឹងកក់​ចំនួន​២០​នាក់​ផ្សេង​ទៀត​ត្រូវ​បាន​អនុរក្ស​ពន្ឋនាគារ​ត្រពាំង​ថ្លុង​ដឹក​បញ្ជូន​មក​ឃុំឃាំង​នៅ​ពន្ធនាគារ​ព្រៃស​វិញ​ដើម្បី​រង​ចាំ​ជំនុំ​ជម្រះ​ទោស។

ក្រុម​មន្ត្រី​សិទ្ឋិ​មនុស្ស​បាន​អះអាង​ថា ការ​ផ្លាស់​ប្តូរ​នៃ​ការ​ឃុំ​ខ្លួន​នេះ​អាច​ជា​សញ្ញា​មួយ​ថា ពួក​គេ​អាច​នឹង​ត្រូវ​បាន​ដោះ​លែង​ឲ្យ​មាន​សេរីភាព​វិញ​ក្នុង​ពេល​ឆាប់​ៗ​ខាង​មុខនេះ។

តុលាការ​ក្រុង​ភ្នំពេញ​នៅ​ថ្ងៃ​សុក្រ ទី​២៥​ ខាង​មុខ​នេះ​នឹង​បើក​សវនាការ​ពេញ​អង្គសេចក្តី​ លើ​ករណី​លោក​ វ៉ន់ ពៅ​ និង​ក្រុម​កម្មករ​ចំនួន​២២​នាក់​ផ្សេង​ទៀត​ពីបទ ​«ញុះញុង​និង​បំផ្លេច​បំផ្លាញ​ដោយ​ចេតនា» ពាក់​ព័ន្ឋ​នឹង​ការ​បង្ក្រាប​ដោយ​អំពើ​ហិង្សា​កាល​ពី​ដើម​ខែ​មករា​នៅ​រោង​ចក្រ​យ៉ាកជិង​ ស្ពាន​ស្ទឹង​មានជ័យ​ និង​សួន​ឧស្សាហកម្ម​កាណាឌីយ៉ា។ តុលាការ​ក្រុង​ភ្នំពេញ​បាន​បំបែក​សំណុំ​រឿង​នេះ​ចំនួន​បួន​ករណី​ផ្សេងៗ​គ្នា​គឺ​សំណុំ​រឿង​ពីរ​នៅ​ផ្លូវ​វេង​ស្រង​ ដែល​មាន​ជន​ជាប់​ចោទ​ចំនួន​១១នាក់​ សំណុំ​រឿង​មួយ​នៅ​គល់​ស្ពាន​ស្ទឹង​មាន​ជ័យ​ ដែល​មាន​ជន​ជាប់​ចោទ​ពីរ​នាក់​ និង​សំណុំ​រឿង​មួយ​ទៀត​នៅ​រោង​ចក្រ​យ៉ាក​ជីង​ ដែល​ មាន​ជន​ជាប់​ចោទ​១០​នាក់។

លោក​ អំ សំអាត​ ប្រធាន​ក្រុម​ស៊ើប​អង្កេត​របស់​អង្កការ​សិទ្ធិមនុស្ស​លីកាដូ​បាន​បញ្ជាក់​ថា ជន​ជាប់​ចោទ​ទាំង​២១​នាក់​ត្រូវ​បាន​ដឹក​បញ្ជូន​មក​ដល់​ពន្ឋនាគារ​ម៣​ហើយ​ដើម្បី​រង់ចាំសវនាការ។ លោក​បាន​បញ្ជាក់​ថា ជនជាប់​ចោទ​ទាំង​អស់​មិន​មាន​ទោស​កំហុស​ទេ​ហើយ​ការ​ជាប់​ពន្ធនាគារ​រយៈ​ពេល​កន្លង​មក​គឺ​ជា​ហេតុផល​នយោបាយ​ដែល​ធ្វើ​ឲ្យ​អ្នកទាំង​អស់​គ្នា​ក្លាយ​ជាឧបករណ៍​របស់​អ្នក​នយោបាយ​តែ​ប៉ុណ្ណោះ។​

«ទាក់​ទង​នឹង​ស្ថានភាព​នយោបាយ​ក្តី​ទាក់​ទង​និង​ស្ថាន​ភាព​នៃ​ការ​បញ្ជួន​ អ្នក​ទាំង​អស់​មក​សវនាការ​ក្តី យើង​នៅ​តែមាន​សង្ឃឹម​ថា តុលាការ​នឹង​ដោះលែង​អ្នក​ទាំង​អស់​ឲ្យ​មាន​សេរីភាព​នៅ​ថ្ងៃ​ទី​២៥»។

លោក គុយ ប៊ុន​សន​ អគ្គនាយក​នៃ​អគ្គនាយក​ដ្ឋាន​ពន្ឋនាគារ​ក្រសួង​មហា​ផ្ទៃ​មិន​អាច​ស្នើ​សុំ​សេចក្តី​អត្ថាធិប្បាយ​បំភ្លឺ​បាន​ទេ។​

សមាគម​សិទ្ធិមនុស្ស​អាដហុក​ បាន​ស្នើ​សាលា​ដំបូង​រាជធានី​ភ្នំពេញ​ ឲ្យ​ទម្លាក់​ចោល​ការ​ចោទ​ប្រកាន់​និង​ដោះ​លែងលោក វ៉ន់ ពៅ​ និង​តំណាង​កម្មករ​ចំនួន​២២​នាក់​ផ្សេង​ទៀត​បន្ទាប់​ត្រូវ​បាន​ចាប់​ខ្លួន​កាល​ពី​ដើម​ខែមករា។​

សេចក្តី​ថ្លែង​ការ​ណ៍​របស់​សមាគម​សិទ្ធិមនុស្ស​អាដហុក​បង្ហាញ​ថា យោង​តាម​ការ​អង្កេត​និង​ស្រាវ​ជ្រាវ​ជន​ជាប់​ចោទ​ទាំង​២៣​នាក់​ មិន​បាន​ប្រព្រឹត្តបទ​ល្មើស​ដូច​ការ​ចោទ​ប្រកាន់​របស់​តុលាការ​ទេ​ ហើយ​ត្រូវ​ស៊ើប​អង្កេត​ជា​បន្ទាន់​ និង​ចាប់​ខ្លួន​អ្នក​ដែល​បាន​ប្រព្រឹត្ត​ខុស​ច្បាប់​ដើម្បី​ផ្តន្ទាទោស​តាម​ច្បាប់។​

លោក​ វ៉ន់ ពៅ​ និង​ក្រុម​កម្មករ​ចំនួន​២២​នាក់​ផ្សេង​ទៀត​ត្រូវ​បាន​អាជ្ញាធរ​របស់​រដ្ឋាភិបាល​ចាប់​ខ្លួន​ដាច់​ដោយ​ឡែក​ៗ​ពី​គ្នា។ នៅ​ក្នុង​ការ​បង្ក្រាប​ដោយ​អំពើ​ហិង្សា​មួយ​នៅ​រោង​ចក្រ​យ៉ាកជីង​ ​សួន​ឧស្សាហកម្ម​កាណា​ឌីយ៉ា​ តាម​បណ្តោយ​ផ្លូវ​វ៉េង​ស្រេង​ និង គល់​ស្ពាន​ស្ទឹង​មាន​ជ័យ។​

ការ​បាញ់​បង្ក្រាប​នោះ​បណ្តាល​ឲ្យ​មនុស្ស​យ៉ាង​តិច​ប្រាំមួយ​នាក់​ស្លាប់​និង​រង​របួស​ជា​ច្រើនាក់។ ជន​រង​គ្រោះ​ដីធ្លី​មក​ពី​តំបន់​បឹងកក់​ បូរីកីឡា​ និង​សហគមន៍​ផ្សេងៗ​ទៀត​ ព្រម​ទាំង​អង្កការ​ក្រៅ​រដ្ឋាភិបាល​នៅ​ថ្ងៃ​ពុធ​នេះ​បាន​រៀប​ចំពិធី​បង្ហោះ​ប៉េង​ប៉ោង​នៅ​មុខ​ពន្ឋនាគារ​ព្រៃ​ស។ កញ្ញា​ សុង ស្រី​លាភ​ តំណាង​អ្នក​ភូមិ​បឹងកក់​បាន​បញ្ជាក់​ថា ពិធីនេះ​និង​អាច​ជួយ​ដល់​អ្នក​ជាប់​ឃុំ​ឲ្យ​មាន​សេរីភាព​វិញ៕
XS
SM
MD
LG