តុលាការរាជធានីភ្នំពេញ កាលពីថ្ងៃព្រហស្បតិ៍ បានសម្រេចឃុំខ្លួនជនជាតិចិន៥នាក់ ក្រោមការចោទប្រកាន់ពីបទបង្ខាំងជំរិតទារប្រាក់ជនជាតិចិនគ្នាឯង ចំនួន១០លានដុល្លារអាមេរិក។ នេះបើតាមអ្នកនាំពាក្យតុលាការរាជធានីភ្នំពេញ លោក អ៊ី រិន្ទ។
លោក អ៊ី រិន្ទ ប្រាប់វីអូអេតាមរយៈប្រព័ន្ធទំនាក់ទំនងតេឡេក្រាមកាលពីថ្ងៃព្រហស្បតិ៍ថា៖ «ចៅក្រមស៊ើបសួរសម្រេចឃុំខ្លួនជនជាតិទាំង៥នាក់ បណ្តោះអាសន្ន នៅក្នុងមណ្ឌល១[ពន្ធនាគារព្រៃស]»។
ចំណែកអ្នកនាំពាក្យរបស់សាលាដំបូងរាជធានីភ្នំពេញម្នាក់ទៀត លោក ប្លង់ សុផល ប្រាប់វីអូអេតាមរយៈប្រព័ន្ធទំនាក់ទំនង WhatsApp កាលពីថ្ងៃព្រហស្បតិ៍ថា៖ «ករណីជនជាតិចិនខាងលើ តំណាងអយ្យការបានសម្រេចបើកការស៊ើបសួរពីបទបង្ខាំងមនុស្សដោយខុសច្បាប់ ធ្វើទារុណកម្មដើម្បីជំរិតទារប្រាក់ និងកាន់កាប់អាវុធដោយគ្មានការអនុញ្ញាត»។
ប្រធាននាយកដ្ឋានចារកម្មនៃអគ្គស្នងការដ្ឋាននគរបាលជាតិ លោក ហ៊ុន សំណាង បដិសេធមិនអត្ថាធិប្បាយ ដោយស្នើឱ្យទាក់ទងទៅកាន់អ្នកនាំពាក្យអគ្គស្នងការដ្ឋាននគរបាលជាតិវិញ។
វីអូអេមិនទាន់អាចសុំការអត្ថាធិប្បាយពី លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិបាននៅឡើយទេ។
វីអូអេក៏មិនទាន់អាចសុំការអត្ថាធិប្បាយពីស្ថានទូតចិនប្រចាំនៅកម្ពុជា តាមសារអ៊ីមែលបានដែរ។
សារព័ត៌មានដែលស្និទ្ធនឹងរដ្ឋាភិបាល Freshnews បានចុះផ្សាយថា ជនជាតិចិន៥នាក់នោះបានបង្ខាំងជំរិតទារប្រាក់ចំនួន ១០លានដុល្លារពីជនចិនដូចគ្នា។ សារព័ត៌មានបន្ថែមថា ក្រុមជនជាតិចិននោះក៏ប្រដាប់ដោយអាវុធគ្រប់ដៃផងដែរ។ សមត្ថកិច្ចបានចុះបង្រ្កាប កាលពីថ្ងៃទី១៣ ខែមេសា ឆ្នាំ២០២៣ ក្រោយទទួលបណ្ដឹងពីក្រុមគ្រួសារជនរងគ្រោះ។ នេះបើតាមសារព័ត៌មាន Freshnews។
នាយករងទទួលបន្ទុកកម្មវិធីឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត ជំរុញឱ្យអាជ្ញាធរកម្ពុជាអនុវត្តទៅតាមច្បាប់ និងបន្តបង្រ្កាបបទល្មើសបែបនេះ។
លោកបន្ថែមទៀតថា៖ «អ៊ីចឹងអ្វីដែលអាជ្ញាធរកម្ពុជាត្រូវធ្វើនោះ គឺការអនុវត្តទៅតាមច្បាប់នៃកម្ពុជា ហើយនិងការបង្ក្រាប ការទប់ស្កាត់ ដើម្បីកុំឱ្យមានបទល្មើសទាំងអស់នោះកើតមកលើទឹកដីកម្ពុជា ពីព្រោះទោះបីជាបរទេសឬមិនបរទេសក៏វាបង្ក ទីមួយគឺភាពភ័យខ្លាចរបស់បងប្អូនប្រជាពលរដ្ឋ ទីពីរធ្វើឱ្យមានការរិះគន់អំពីបទល្មើសដែលកើតឡើងនៅក្នុងប្រទេសកម្ពុជា»។
លោកបញ្ជាក់ថា បទល្មើសរវាងជនបរទេស និងជនបរទេសកើតមានច្រើននៅក្នុងទឹកដីកម្ពុជា ដូចជាការចាប់ជំរិត ការជួញដូរតាមប្រព័ន្ធអនឡាញ ការជួញដូរមនុស្ស ការជួញដូរកម្លាំងពលកម្ម និងបទល្មើសផ្សេងៗទៀត។
មួយរយៈចុងក្រោយនេះ ប្រទេសកម្ពុជាត្រូវបានប្រើប្រាស់ជាកន្លែងបោកបញ្ឆោតតាមប្រព័ន្ធអ៊ីនធឺណិត (Scam) ដោយប្រើប្រាស់កម្លាំងពលកម្មបរទេសធ្វើការនៅតាមអគារខ្ពស់ៗនៅក្នុងប្រទេសកម្ពុជា រហូតមានសេចក្តីរាយការណ៍អំពីការបង្ខាំងទុកពួកគេមិនឱ្យមានសេរីភាព ការធ្វើទារុណកម្ម និងការជំរិតទារប្រាក់ជាដើម។ ឧក្រិដ្ឋជន ដែលភាគច្រើនជាជនបរទេស បានជួលអគារ ឬទីតាំងពីអ្នកជំនួញដែលជាជនជាតិខ្មែរដើម្បីប្រព្រឹត្តអំពើទាំងនោះ។
គិតចាប់តាំងពីខែសីហា ឆ្នាំ២០២២ ដែលមានការចុះបង្រ្កាបពាក់ព័ន្ធនឹងការជួញដូរកម្លាំងពលកម្មបរទេស និងការបង្ខាំងមនុស្សក្នុងប្រទេសកម្ពុជា ជនបរទេសសរុបប្រមាណ ២.១០០នាក់ត្រូវបានជួយសង្រ្គោះតាមរយៈពាក្យបណ្តឹងមករដ្ឋមន្រ្តីក្រសួងមហាផ្ទៃ។ នេះបើយោងតាមសារដែលបង្ហោះនៅលើហ្វេសប៊ុករបស់ លោក ស ខេង រដ្ឋមន្រ្តីក្រសួងមហាផ្ទៃ កាលពីថ្ងៃទី៧ ខែមេសា ឆ្នាំ២០២៣។ ជនបរទេសទាំងនោះ មាន ១៦សញ្ជាតិ ហើយភាគច្រើនជាជនជាតិចិន វៀតណាម និងឥណ្ឌូណេស៊ី៕
