ភ្នំពេញ៖ លោកស៊ែហ្ស៍ ម៉ូសទុយរ៉ា (Serge Mostura) ឯកអគ្គរដ្ឋទូតបារាំងដែលទើបតែងតាំងថ្មីបានថ្លែងប្រាប់ក្រុមអ្នកយកព័ត៌មាននៅថ្ងៃអង្គារនេះថា ប្រទេសបារាំងសម្តែងការសោកស្តាយចំពោះការយាងសោយទិវង្គតរបស់អតីតព្រះមហាក្សត្រនរោត្តម សីហនុ។ ក៏ប៉ុន្តែលោកបានបញ្ជាក់អះអាងថា មិត្តភាពនិងទំនាក់ទំនងបារាំង និងកម្ពុជានឹងនៅតែបន្តរឹងមាំ។
សេចក្តីថ្លែងការណ៍របស់លោកស៊ែហ្ស៍ ម៉ូសទុយរ៉ា ក្នុងទីក្រុងភ្នំពេញ ធ្វើឡើងមួយថ្ងៃប៉ុណ្ណោះក្រោយពីព្រះរាជពិធីថ្វាយព្រះភ្លើងដល់ព្រះបរមកោដ្ឋសម្តេចសីហនុ។
«យើងសោកស្តាយចំពោះមរណភាពនៃសម្តេចនរោត្តម សីហនុ។ ប៉ុន្តែទំនាក់ទំនងរវាងបារាំងនិងកម្ពុជានឹងនៅតែបន្ត»។
ប្រទេសកម្ពុជាធ្លាប់ស្ថិតនៅក្រោមអាណានិគមនិយមរបស់ប្រទេសបារាំងអស់រយៈពេល៩០ឆ្នាំ។ ហើយកម្ពុជាបានទទួលឯករាជ្យពេញបរិបូរពីបារាំងនៅខែវិច្ឆិកាឆ្នាំ១៩៥៣ ក្រោមព្រះរាជតម្រិះដឹកនាំការតស៊ូរបស់សម្តេចព្រះបាទនរោត្តម សីហនុ។ ហើយគិតមកទល់ពេលនេះ កម្ពុជានិងបារាំងបានភ្ជាប់ទំនាក់ទំនងជាមួយគ្នាជាង១០០ឆ្នាំហើយ។
លោកឯកអគ្គរដ្ឋទូតបារាំងបញ្ជាក់ថា «វាមានសារៈសំខាន់ក្នុងការថែរក្សាទំនាក់ទំនងនេះ» ដោយលោកស្រង់សម្តីរបស់លោកនាយករដ្ឋមន្រ្តីខ្មែរហ៊ុន សែន ក្នុងជំនួបជាមួយសមភាគីបារាំងលោកហ្សង់ម៉ាក អាយរ៉ូ កាលពីថ្ងៃច័ន្ទ។
«វាមានសារៈសំខាន់ណាស់។ ដំបូងបំផុតសម្រាប់ប្រទេសកម្ពុជា ពីព្រោះដូចលោកនាយករដ្ឋមន្រ្តីហ៊ុននិយាយថា វត្តមានរបស់ប្រទេសបារាំង ភាសាបារាំង វប្បធម៌បារាំង វត្តមានរបស់ក្រុមហ៊ុនបារាំង និងវត្តមានរបស់ការបណ្តុះបណ្តាលនានាផ្តល់ដោយប្រទេសបារាំងក្នុងប្រទេសកម្ពុជា បានបង្កើតឲ្យមានគុណប្រយោជន៍មួយដល់កម្ពុជាក្នុងសហគមន៍អាស៊ាន។ ហើយយើងចង់ឲ្យបន្តនិងធ្វើឲ្យកាន់តែជ្រាលជ្រៅថែមទៀតភាពជាដៃគូ»។
លោកបណ្ឌិតឡៅ ម៉ុងហៃ អ្នកវិភាគឯករាជ្យកម្ពុជាយល់ថា ថ្វីបើអតីតព្រះមហាក្សត្រសោយទិវង្គតក្តី ក៏ទំនាក់ទំនងរវាងកម្ពុជានិងបារាំងនឹងវិវត្តទៅរកភាពវិជ្ជមានជាងមុនដែរ។
«ខ្ញុំថា មានការកែប្រែទៅរកវិជ្ជមាន និងល្អសម្រាប់ប្រទេសទាំងពីរ។ ថ្មីៗនេះ ខ្ញុំឃើញថា មន្ត្រីជាន់ខ្ពស់រដ្ឋាភិបាលបានអញ្ជើញទៅប្រទេសបារាំងដើម្បីពង្រឹងចំណងទាក់ទងខាងពាណិជ្ជកម្ម ខាងសេដ្ឋកិច្ចជាដើម។ ឥឡូវនេះ ខាងនាយករដ្ឋមន្ត្រីបារាំងមកទៀត។ ខ្ញុំថា ជាឱកាសមួយដើម្បីពង្រឹងចំណងមិត្តភាព។ ហើយប្រទេសកម្ពុជាក៏ត្រូវការរឹតចំណងហ្នឹងដែរ»។
លោកឡៅ ម៉ុងហៃមើលឃើញថា ប្រទេសបារាំងបានជួយ ជាពិសេសផ្នែកវប្បធម៌យ៉ាងច្រើនដល់ប្រទេសកម្ពុជា៕
ព័ត៌មានចុងក្រោយជារូបភាពតាម Storify៖
ព័ត៌មានចុងក្រោយជារូបភាពតាម Storify៖
