ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋមន្ត្រី​ការពារ​ជាតិ​ថា​កងទ័ព​មិន​ឲ្យ​ក្រុម​ជំទាស់​ធ្វើ​អ្វី​បាន​ទេ​ នៅ​ថ្ងៃ​លោកសម រង្ស៊ី​កំណត់​ធ្វើ​មាតុភូមិនិវត្តន៍​ជា​ថ្មី


លោក​ឧបនាយករដ្ឋមន្ត្រី ​ទៀ​ បាញ់ រដ្ឋមន្ត្រី​ការពារ​ជាតិ (ឆ្វេង) និង លោក សាយ ឈុំ ប្រធាន​ព្រឹទ្ធសភា​ ក្នុង​អំឡុង​ខួប​ទី​៦៦ នៃ​ទិវា​បុណ្យ​ឯករាជ្យ​ជាតិ​កម្ពុជា​នៅ​រាជធានី​ភ្នំពេញ​កាល​​ពី​ថ្ងៃ​ទី​៩ ខែ​វិច្ឆិកា ឆ្នាំ​២០១៩។ (ហ៊ុល រស្មី/VOA)

អាជ្ញាធរ​បាន​បង្កើន​សន្តិសុខ​និង​កម្លាំង​ប្រដាប់​អាវុធ​នៅ​តាម​ជាយដែន​ដែល​ជា​ខេត្ត​ជាប់​ព្រំដែន​ថៃ​ ជាពិសេស​ដូច​ជា​ច្រក​បោយប៉ែត​ និង​ បណ្តា​ខេត្ត​មួយ​ចំនួន​ ​ស្រប​ពេល​មាន​ការ​រៀបចំ​ពិធី​បុណ្យ​អំទូក​​​​​ និង​អក​អំបុក​ទូទាំង​ប្រទេស​នោះ។

រដ្ឋមន្ត្រី​ការពារ​ជាតិ​លោក​ឧបនាយករដ្ឋមន្ត្រី ​ទៀ​ បាញ់​ ​បាន​ អះអាង​ថា ​កង​ទ័ព​ដែល​ត្រូវ​ដាក់​ពង្រាយ​នៅ​តែ​បន្ត​ការពារ​សនិ្តសុខ​ សុវត្ថិភាព​នៅឡើយ​ នៅ​ពេល​លោក​ លោក​សម រង្ស៊ី ​មេដឹកនាំ​ក្រុម​ជំទាស់​ដែល​ កំពុង​និរទេស​ខ្លួន​នៅ​ក្រៅ​ប្រទេស​ដាក់​គម្រោង​ការ​ជាថ្មី​ក្នុង​ការ​ធ្វើ​ដំណើរ​មាតុភូមិ​និវត្តន៍​មក​កម្ពុជា​នៅ​ថ្ងៃ​ទី​៩ ​វិច្ឆិកា​របស់​លោក​ដែល​មន្ត្រី​រដ្ឋាភិបាល​បាន​ចោទ​ប្រកាន់​ថា ​ជា​ការ​ប៉ុនប៉ង​ដឹកនាំ​ពលករ​ចំណាក​ស្រុក​និង​ប្រជាពលរដ្ឋ​ ដើម្បី​ផ្តួល​រំលំ​លោក​នាយករដ្ឋមន្ត្រី​ ហ៊ុន​ សែន ​ដែល​កាន់​អំណាច​ជាង​៣៤​ឆ្នាំ។

ថ្លែង​ប្រាប់ ​VOA ​ក្រោយ​ពី​បុណ្យ​ឯករាជ្យ​ជាតិ​ដែល​មាន​ព្រះរាជ​វត្តមាន​របស់ព្រះមហាក្សត្រ​ខ្មែរ​ព្រះ​បាទ​ សម្តេច​ព្រះ​ នរោត្តម​ សីហមុនី​ លោក ​ទៀ បាញ់ ​លោក​បាន​បញ្ជាក់​ថា៖

«រឿងនេះ​វា​ពិបាក​នឹង​និយាយ​មុន ​វា​ពិបាក​ណាស់ ​ព្រោះ​កិច្ចការ​ទាំង​នេះ​ តាម​វោហាសាស្ត្រ​របស់​គេៗ​បាន​សម្រេច​ចិត្ត​ប្រឹងប្រែង​ខ្លាំងក្លា​ណាស់​ទោះ​ជា​យើង​មើល​ឃើញ​ថា​ស្ថានភាព​នេះ ​វា​មិន​អាច​ទៅ​របៀប​ហ្នឹង​កើត​ទេ​ គឺ​ថា​រដ្ឋ​មួយ​មិន​អាច​ឲ្យ​ អ្នក​មួយ​ចំនួន​ក្រៅ​ច្បាប់​ហ្នឹង​មក​ធ្វើអ្វី​ងាយៗ​ស្រួល​ដូច​គេ​បាន​គិត​នោះ​ទេ​ រដ្ឋ​មួយ​ គេ​មាន​ឧបករណ៍​ មាន​អំណាច​ការពារ​រដ្ឋ​របស់​គេ​ផង​ដែរ»។

លោក​បាន​អះអាង​ថា ​ការ​ថមថយ​ឬ​តានតឹង​នៅ​តាម​ព្រំដែន​ក្តី​វា​ ជា​ស្ថានការណ៍​ មិនអាច​ទាយ​ទុក​បាន​ តែ​អាជ្ញាធរ​នៅ​តែ​ការពារ​សន្តិសុខ​ម្មត់ចត់​ តាម​គោលដៅ​ និង​កន្លែង​បំពេញភារកិច្ច​របស់​ខ្លួន​ ជាពិសេស​ដើម្បី​ការពារ​សន្តិសុខ​ សណ្តាប់ធ្នាប់​ នៅ​ពេល​មាន​ពិធី​បុណ្យ​អំទូក​ អកអំបុក​ សពះ​ព្រះខែ​ចាប់ផ្តើម​នៅ​ថ្ងៃ​ស្អែក​នេះ។

លោក ​ទៀ បាញ់ បន្ថែម​ថា៖ «ការ​បន្ថែម​កម្លាំង​អីមួយ​ចំនួន​ហ្នឹង​គឺ​វា​កំណត់​ទៅ​លើ​ស្ថានភាព​ជាក់ស្តែង​នោះ​ ទី​កន្លែង​នោះ​វា​មាន​ការវិត្ត​យ៉ាងណា​នោះទេ​ ចំណែក​សមត្ថកិច្ច​ធម្មតា​ដែល​គេ​ បំពេញ​សមត្ថកិច្ច​របស់​គេ​រៀងៗ​ខ្លួន​នោះ​គឺ​គេ​បំពេញ​កិច្ច​ការងារ​គេ​ធម្មតា​ អត់​ មាន​ស្អី​ទេ»។

ក្រុម​អាជ្ញាធរ​បាន​បង្កើន​សន្តិសុខ​និង​កម្លាំង​ប្រដាប់​អាវុធ​នៅ​តាម​ជាយដែន​ដែល​ជា​ខេត្ត​ជាប់​ព្រំដែន​ថៃ​ ជាពិសេស​ដូច​ជា​ច្រក​បោយប៉ែត​ និង​ បណ្តា​ខេត្ត​មួយ​ចំនួន​នៅ​ស្រប​ពេល​មាន​ការ​រៀបចំ​ពិធី​បុណ្យ​អំទូក​ ទទួល​ទាន​អំបុក​ទូទាំង​ប្រទេស​នោះ។

លោក​ សម រង្ស៊ី ប្រធាន​ស្តីទី​គណបក្ស​សង្គ្រោះជាតិ ​ក្នុង​ពេល​លោក​ កឹម ​សុខា​ ស្ថិត​នៅ​ក្នុង​ការ​ឃុំខ្លួន​ក្នុង​ផ្ទះ​ ត្រូវ​គេ​រាយការណ៍​មក​ថា ​បាន​ធ្វើ​ដំណើរ​តាម​ជើង​ យន្តហោះ​ពី​ប្រទេស​បារាំង​មក​ប្រទេស​ម៉ាឡេស៊ី​បន្ទាប់​ពី​លោក​បាន​ប្រកាសថាលោក​នឹង មក​ដល់ប្រទេសកម្ពុជា​នៅ​ថ្ងៃ​ទី​៩​វិច្ឆិកា។ លោក​អះអាង​ថា ​មាន​គេ​លួច​ប្តូរ​ជើង​យន្តហោះ​របស់​លោក និង​ថា​ មាន​ការ​បញ្ជា​មិន​ឲ្យ​ដឹក​រូប​លោក​មក​កាន់​ប្រទេស​ថៃ​ដែល​ជា​កន្លែង​លោក​ មាន​គម្រោង​ការ ​ប្រមូល​ផ្តុំ​ជាមួយ​អ្នក​គាំទ្រ​របស់​លោក​ និង​ពលករ​ចំណាក​ស្រុក។

លោក​ សម រង្ស៊ី ដែល​ដាក់​គម្រោង​ការ​មក​កម្ពុជា​នៅ​ថ្ងៃ​ឆាប់ៗ​ខាង​មុខ​នេះ​ បាន​ស្តី​បន្ទោស​រដ្ឋាភិបាល​លោក ​នាយក​រដ្ឋមន្ត្រី ​ហ៊ុន​ សែន ​ពី​ការ​ចង់​រារាំង​ដំណើរ​របស់​ លោក​ដោយ​ខ្លាច​វត្តមាន​លោក​ផ្ទាល់​នៅ​លើ​ទឹកដី​កម្ពុជា។

សមាជិក​សភា​អាមេរិក​ និង​ សមាជិក​ព្រឹទ្ធសភា​អាមេរិក​ សម្តែង​ការ​ព្រួយ​ បារម្ភ​ចំពោះ​អំពើ​ហិង្សា​លើ​លោក ​សម រង្ស៊ី ​ដែល​កំពុង​តស៊ូ​ធ្វើ​ឲ្យ​គណបក្ស​ សង្គ្រោះជាតិ​រស់​ឡើងវិញ​ក្រោយ​ពី​ការ​រំលាយ​មិន​បាន​ចូលរួម​ការ​បោះឆ្នោត​កាល​ពី​ឆ្នាំ​២០១៨​ ដើម្បី​តស៊ូ​ធ្វើ​ឲ្យ​មាន​ការ​បោះឆ្នោត​ឡើងវិញ​និង​ទាមទារ​ឲ្យ ​មាន​ការ​ដោះលែង​លោក​ កឹម​ សុខា​ ដើម្បី​លោក​មាន​សេរីភាព​ធ្វើ​នយោបាយ​ឡើងវិញ​ ដូច​ជា​អតីតមន្ត្រី​គណបក្ស​សង្គ្រោះ​ជាតិ​ដទៃ​ដែរ។

នៅ​ក្នុង​លិខិត​របស់​អ្នក​តំណាង​រាស្ត្រ​សហរដ្ឋ​អាមេរិក​ដ៏​មាន​ឥទ្ធិពល​ចំនួន​៨​រូប​ ដែល​បាន​ផ្ញើ​ជូន​លោក​នាយក​រដ្ឋ​មន្ត្រី​ហ៊ុន​ សែន​ តាម​រយៈ​ស្ថានទូត​កម្ពុជា​ ប្រចាំ​រដ្ឋធានី​វ៉ាស៊ីនតោន​ បាន​សម្តែង​ការ​ព្រួយ​បារម្ភ​ពីសុវត្ថិភាព​ថ្នាក់ដឹកនាំ​គណបក្ស​ប្រឆាំង​ដែល​គ្រោង​នឹងវិល​ទៅដល់​ប្រទេស​កម្ពុជា​នៅ​ថ្ងៃ​សៅរ៍​ឬ​ក៏​ថ្ងៃ​ឆាប់ៗ​ខាង​មុខ​នេះ។​

លិខិត​របស់​អ្នក​តំណាង​រាស្ត្រ​ដែល​បាន​ចេញ​ផ្សាយ​នៅ​ថ្ងៃ​សុក្រ​ ហើយ​ដែល​ VOA​ ទទួល​បាន​ បញ្ជាក់​ថា៖

«យើង​ព្រួយ​បារម្ភ​យ៉ាងខ្លាំង​នឹង​អត្ថាធិប្បាយ​របស់​រាជ​រដ្ឋាភិបាល​កម្ពុជា​ដែល​បាន​គំរាម​កំហែង​និង​បណ្តោយ​ឱ្យមាន​អំពើ​ហិង្សា​ប្រឆាំង​នឹង​អ្នក​ទាំងនេះ​ នៅ​ពេល​ដែល​ពួកគេ​ត្រឡប់​ទៅ​វិញ‍»។

ក្រុម​អ្នក​តំណាងរាស្ត្រ​បាន​បញ្ជាក់​បន្ថែម​ថា៖

«យើង​ថ្កោល​ទោស​រាល់​ទម្រង់​នៃ​អំពើ​ហិង្សា​នយោបាយ​នៅ​កម្ពុជា។ ការ​អនុញ្ញាត​ឱ្យ​គណបក្ស​ប្រឆាំង​ធ្វើ​សកម្មភាព​ដោយ​សេរី​ក្នុង​ប្រទេស​កម្ពុជា​ ដោយ​គ្មាន​ការ​ភ័យខ្លាច​ការ​សងសឹក​នយោបាយ​គឺ​ជា​ការ​ចាំបាច់​សម្រាប់​ស្តារ​លទ្ធិ​ប្រជាធិបតេយ្យ»។

អ្នក​តំណាងរាស្ត្រ​ទាំង​៨​រូប​មកពី​គណបក្ស​ទាំងពីរ​នៅ​ក្នុង​សភាតំណាងរាស្ត្រ​គឺ​គណបក្ស​ប្រជាធិបតេយ្យ​និង​គណបក្ស​សាធារណរដ្ឋ​ រួមមាន​លោក​អាឡាំង ឡូវឹនសល លោក​ស្ទីវ ឆាបុត្រ​ លោក​អ៊ីលៀត អ៊ីងហ្កល លោក​ថេត យូហូ លោក​ប្រែដ សឺមឹន លោកជែម ម៉ាក់ហ្កូវឺន លោក​ស្រី​ឡូរី ត្រាហាន់ និង​លោក​ជេរ៉ល ខូណូលី។

​សកម្មជន​និង​អតីត​មន្ត្រី​គណបក្ស​សង្គ្រោះជាតិ​ជាង​៥០​នាក់​ត្រូវ​បាន​ចាប់​ឃុំឃាំង ​ក្រោយពី​ការ​ប្រកាស​ធ្វើ​មាតុភូមិនិវត្តន៍​របស់​លោក​សម​រង្សី​ កាល​ពី​ខែ​សីហា។

​លោក សម រង្ស៊ី​ និង​ថ្នាក់​ដឹកនាំ​ព្រមទាំង​មន្ត្រី​គណបក្ស​ចំនួន​២០​នាក់​ទៀត​ មាន​នៅ​ក្នុង​បញ្ជី​ចាប់​ខ្លួន​ដែល​អាជ្ញាធរ​បាន​បិទ​ប្រកាស​នៅ​តាម​ទី​សាធារណៈ ​ដោយ​អាជ្ញាធរ​ចាត់​ទុក​ថា​ជា​«ក្រុម​ឧទ្ទាម​ក្បត់ជាតិ‍» ដែល​មាន​បំណង​ផ្តួល​រំលំ​រដ្ឋាភិបាល​កម្ពុជា។

ក៍ប៉ុន្តែ​នៅ​ក្នុង​លិខិត​របស់​លោក​ ប្រធានាធិបតី​សហរដ្ឋអាមេរិក​ ដូណាល់ ​ត្រាំ​ ដែល​ផ្ញើ​ថ្វាយ​ព្រះមហាក្សត្រ​ខ្មែរ ​សម្តេច​ព្រះ​បរមនាថ នរោត្តម​ សហមុនី​ ក្នុង​ឱកាសពិធី​បុណ្យ​ឯករាជ្យ​ជាតិ​លើក​ទី​៦៦​ លោក​ ត្រាំ​បាន​ បញ្ជាក់​ថា​ សហរដ្ឋ​អាមេរិក​ឈរ​ជាមួយ​នឹង​ពលរដ្ឋ​កម្ពុជា​ដែល​ចង់​បាន​ព្រះ​រាជាណាចក្រ​ ប្រកប​ដោយ​សន្តិភាព​ វិបុលភាព ​លទ្ធិប្រជាធិបតេយ្យ​និង​ អធិបតេយ្យភាព៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG