ភ្ជាប់​ទៅ​គេហទំព័រ​ទាក់ទង

អង្គការ​សិទ្ធិ​មនុស្ស​ជំរុញ​តុលាការ​ឲ្យ​កាត់ទោស​ដោយយុត្តិធម៌​ដល់​រឿង​ក្តី​លោក​ម៉ម សុណង់ដូ

  • គង់ សុឋានរិទ្ធ

លោក​ម៉ម សុណង់ដូ
ភ្នំពេញ៖ មជ្ឈមណ្ឌល​សិទ្ធិមនុស្ស​បាន​ជំរុញ​នៅ​ថ្ងៃ​ច​ន្ទ​នេះ​ឲ្យ​អាជ្ញាធរ​កម្ពុជា​ធានា​កាត់ទោស​លោក ម៉ម សុ​ណង់​ដូ ប្រកបដោយ​យុត្តិធម៌​ខណៈពេលដែល​មេធាវី​របស់លោក​ម៉ម សុ​ណង់​ដូ មិនសូវមាន​សង្ឃឹម​ពី​ជ័យជម្នះ។
សាលាដំបូង​រាជធានី​ភ្នំពេញ នឹង​កាត់ទោស​លោក ម៉ម សុ​ណង​ដូ នាយក​វិទ្យុ​សំបុ​ក្រ​ឃ្មុំ និង​ជា​ប្រធាន​សមាគម​អ្នកប្រជាធិបតេយ្យ​នៅ​ថ្ងៃ​អង្គារ​ទី១១ ខែកញ្ញា។
នៅក្នុង​សេចក្ដី​ថ្លៃ​ង​ការណ៍​មួយថ្ងៃ​មុន​ការកាត់ទោស​នេះ មជ្ឈមណ្ឌល​សិទ្ធិមនុស្ស​កម្ពុជា​បាន​លើកឡើងថា លោក​ម៉ម សុ​ណង់​ដូ ទទួលរង​ការចោទប្រកាន់ «ក្លែងក្លាយ និង​ប្រកបដោយ​ចរិត​នយោបាយ»។
លោក​ម៉ម សុ​ណង់​ដូ អាយុ៧០ ឆ្នាំ ដែល​បាន​ស្ថិត​ជា​គោលដៅ​របស់​រដ្ឋាភិបាល​ត្រូវបាន​ចាប់ខ្លួន​នៅផ្ទះ​របស់លោក​ក្នុង​ក្រុងភ្នំពេញ​កាលពី​ពាក់កណ្តាល​ខែកក្កដា បន្ទាប់ពី​លោកនាយក​រដ្ឋមន្ដ្រី​ហ៊ុន សែន ប្រកាស​ស្វែងរក​ចាប់ខ្លួន​លោក​ជា​សាធារណៈ។
សកម្មជន​ប្រជាធិបតេយ្យ​រូបនេះ​ត្រូវ​ចោទប្រកាន់​ពីបទ​ញុះញង់​ប្រជាពលរដ្ឋ​ឲ្យ​ប្រើប្រាស់​អាវុធ​ខុសច្បាប់ ការ​ចោទ​ទាក់ទង​នឹង​ការ​ប្រឆាំងនឹង​អាជ្ញាធរ​ស្របច្បាប់​និង​ការផ្តួចផ្តើម​គំនិត​ប្រឆាំងនឹង​រាជការ​សាធារណៈ បន្ទាប់ពី​រដ្ឋាភិបាល​បាន​បង្ក្រាប​យ៉ាង​ហិង្សា​លើ​ជម្លោះដីធ្លី​មួយ​ក្នុង​ខេត្តក្រចេះ​កាលពី​ខែឧសភា ដែល​ការ​បង្ក្រាប​នោះ​ ក្រុម​សមត្ថកិច្ច​រដ្ឋាភិបាល​បាន​បាញ់សម្លាប់​ក្មេងស្រី​អាយុ ១៤ឆ្នាំ​ម្នាក់។
លោក អ៊ូ វីរៈ នាយក​មជ្ឈមណ្ឌល​សិទ្ធិមនុស្ស​កម្ពុជា​មានប្រសាសន៍​ថា ការចាប់ខ្លួន​និង​ការចោទប្រកាន់​លើ​លោក​ម៉ម សុ​ណង់​ដូ គ្រាន់តែ​ជា​រឿង​ដែល​បង្វែងដាន​លើ​ឃាតកម្ម​កុមារី​នោះ​ហើយ​ឆ្លៀតពេល​ធ្វើការ​គាប​សង្កត់​លើ​សកម្មជន​សិទ្ធិមនុស្ស។
«ដូច្នេះ​យើង​យល់ថា​នេះ​ជា​រឿង​ដែល​រដ្ឋាភិបាល​គួរ​យកចិត្តទុកដាក់​ហើយ​យើង​សង្ឃឹមថា​សវនាការ​ស្អែក​នេះ​នឹង​រក​យុត្តិធម៌​ជូន​លោក​ម៉ម សុ​ណង់​ដូ ផង​ហើយក៏​អាច​ជំរុញ​ឲ្យ​មានការ​កែលម្អ​ប្រព័ន្ធ​តុលាការ​ផងដែរ»។
លោក​ផៃ ស៊ី​ផាន រដ្ឋលេខាធិការ​និង​ជា​អ្នកនាំពាក្យ​ទីស្តីការគណរដ្ឋមន្ដ្រី​មានប្រសាសន៍​តប​ថា ការ​អំពាវ​របស់​មជ្ឈមណ្ឌល​សិទ្ធិមនុស្ស​កម្ពុជា​គឺជា​ជួយ​លើកទឹកចិត្ត​មួយ​ចូលរួមចំណែក​ជាមួយ​រាជរដ្ឋាភិបាល​ដែល​ចង់​ឃើញថា ការវិនិច្ឆ័យ​លើ​លោក​ម៉ម សុ​ណង់​ដូ ឈរលើ​ផលប្រយោជន៍​យុត្តិធម៌។ ប៉ុន្តែ​លោក​មានប្រសាសន៍ថា រដ្ឋាភិបាល​មិនមាន​អំណាច​លើ​អធិបតេយ្យ​របស់​តុលាការ​នោះទេ។
«រាជរដ្ឋាភិបាល​មិនមាន​អ្វីដែល​ពាក់​ព័ន្ធដែល​ធ្វើ​ឲ្យ​មាន​ឧបសគ្គ​ដល់​ការវិនិច្ឆ័យ​របស់​តុលាការ​នោះទេ។ ដូច្នេះ​តុលាការ​មាន​អធិបតេយ្យភាព មាន​ឯករាជ្យភាព​ក្នុង​កិច្ច​សម្រេច​ក្តី​វិ​ន​ច្ឆ័​យ​នេះ»។
តុលាការ​កោះហៅ​បុគ្គល​ចំនួន៤០​នាក់​ឲ្យ​ចូលធ្វើ​សាក្សី​ក្នុងការ​កាត់ទោស​លោក​ម៉ម សុ​ណង់​ដូ។ ការណ៍​នេះ​ត្រូវគេ​មើលឃើញថា គឺជា​ចំនួន​ស​ក្សី​ដ៏​សម្បើម។ ដោយឡែក​មេធាវី​របស់​លោក​ម៉ម សុ​ណង់​ដូ គឺ​លោក​សុខ សំអឿន មា​នស​ក្សី​ត្រឹមតែ​ប្រាំ​នាក់​តែប៉ុណ្ណោះ។
លោក​សុខ សំអឿន មានប្រសាសន៍ថា លោក​មាន​សង្ឃឹម​ខ្លះៗ​តែប៉ុណ្ណោះ ហើយ​លោក​ពឹង​លើ​ការវិនិច្ឆ័យ​នៃ​អ្នកដឹកនាំ​នយោបាយ​ក្នុង​អំណាចរដ្ឋាភិបាល។
«សង្ឃឹមតិចៗដែរ។ សង្ឃឹមថា​ថ្នាក់ដឹកនាំ​ពេលដែល​ស្តាប់​សវនាការ​រួចហើយ​ដឹង​ការពិត​យ៉ាងណា​អាច​សម្រេច​ដោយ​យុត្តិធម៌»។
យ៉ាង​ណា​ក៏ដោយ​លោក​សុខ សំអឿន អះអាងថា មិនមាន​ភស្តុតាង​ដែល​បង្ហាញ​ពី​កំហុស​កូនក្តី​របស់លោក​ទាក់ទង​នឹង​ការចោទប្រកាន់​ពី​បទ​បង្កើត​ឲ្យ​មាន​តំបន់​អបគមន៍​នោះ​ទេ៕
XS
SM
MD
LG