មន្រ្តីជាន់ខ្ពស់កម្ពុជានិងចក្រភពអង់គ្លេសមានក្តីរំពឹងនៅក្នុងការធ្វើឱ្យទំនាក់ទំនងរវាងប្រទេសទាំងពីរកាន់តែល្អប្រសើរ តាមរយៈកិច្ចសហប្រតិបត្តិការលើវិស័យពាណិជ្ជកម្ម ការអភិវឌ្ឍសេដ្ឋកិច្ច និងការអប់រំ។
ថ្មីៗនេះ រដ្ឋមន្ត្រីចក្រភពអង់គ្លេសទទួលបន្ទុកប៉ាស៊ីហ្វិកអ្នកស្រី Anne-Marie Trevelyan បានធ្វើដំណើរបំពេញទស្សនកិច្ចជាលើកដំបូងមកកម្ពុជា រយៈពេល ២ ថ្ងៃ គឺចាប់ថ្ងៃទី២ដល់ទី ៤ ខែមីនា ឆ្នាំ ២០២៤ ដើម្បីរឹតចំណងទ្វេភាគីរវាងប្រទេសទាំងពីរ។
នៅក្នុងដំណើរទស្សនកិច្ចនេះ អ្នកស្រីបានជួបជជែកជាមួយមន្ត្រីខ្ពស់មួយចំនួនរបស់កម្ពុជា មានដូចជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រដ្ឋមន្ត្រីក្រសួងវប្បធម៌ និងវិចិត្រសិល្បៈ និងរដ្ឋលេខាធិការក្រសួងការបរទេស។ ដំណើរទស្សនកិច្ចរបស់រដ្ឋមន្រ្តីរូបនេះ ស្របពេលដែលលោកនាយករដ្ឋមន្រ្តី ហ៊ុន ម៉ាណែត បានដឹកនាំគណៈប្រតិភូរបស់លោកទៅបំពេញទស្សនកិច្ចនៅប្រទេសអូស្រ្តាលី និងចូលរួមកិច្ចប្រជុំកំពូលពិសេសអាស៊ានអូស្រ្តាលី។
ថ្លែងនៅក្នុងវីដេអូរយៈពេល ២ នាទី ដែលបង្ហោះនៅលើទំព័រហ្វេសប៊ុករបស់ស្ថានទូតអង់គ្លេសប្រចាំនៅកម្ពុជា ក្រោយបញ្ចប់ដំណើរទស្សនកិច្ចនៅកម្ពុជា អ្នកស្រី Anne-Marie Trevelyan ថ្លែងថា អ្នកស្រីបានជជែកជាមួយមន្ត្រីសំខាន់ៗរបស់កម្ពុជា លើបញ្ហាសេដ្ឋកិច្ច កិច្ចការបរទេសរវាងប្រទេសទាំងពីរ បញ្ហាប្រឈម និងបញ្ហាមួយចំនួនពាក់ព័ន្ធនឹងការប្រែប្រួលអាកាសធាតុផងដែរ។
អ្នកស្រីថ្លែងថា៖ «នោះគឺជាឱកាសដ៏មានឯកសិទ្ធិមួយក្នុងការមើលឃើញថា ទំនាក់ទំនងរវាងចក្រភពអង់គ្លេស និងកម្ពុជាកំពុងដំណើរការទៅមុខ។ សម្រាប់ដំណើរបន្ទាប់រវាងប្រទេសទាំងពីរ យើងទន្ទឹមរង់ចាំមើលទំនាក់ទំនងដែលកាន់តែរីកចម្រើន»។
រដ្ឋមន្ត្រីរូបនោះលើកឡើងនៅក្នុងសេចក្តីប្រកាសព័ត៌មានរបស់រដ្ឋាភិបាលអង់គ្លេសថា ក្នុងន័យដើមថា៖ «ទំនាក់ទំនងទ្វេភាគីអង់គ្លេស-កម្ពុជាកំពុងរីកចម្រើនលើវិស័យផ្សេងៗ ហើយយើងប្តេជ្ញាគាំទ្រប្រទេសកម្ពុជាចំពោះដំណាក់កាលបន្ទាប់នៃដំណើរអភិវឌ្ឍន៍របស់ខ្លួន។ ខ្ញុំទន្ទឹងរង់ចាំស្តាប់បន្ថែមទៀតអំពីកិច្ចការងារនៃគម្រោងភាពជាដៃគូវិនិយោគរបស់ចក្រភពអង់គ្លេសកំពុងអនុវត្តសម្រាប់កម្ពុជា និងតួនាទីនៃការអប់រំរបស់ចក្រភពអង់គ្លេសក្នុងការអភិវឌ្ឍទេពកោសល្យនៅទីនេះ។
លោក ជុំ សុន្ទរី អ្នកនាំពាក្យក្រសួងការបរទេសកម្ពុជាប្រាប់វីអូអេនៅថ្ងៃពុធនេះថា ដំណើរទស្សនកិច្ចរបស់អ្នកស្រី Anne-Marie Trevelyan មានគោលដៅសំខាន់លើកកម្ពស់បន្ថែមទៀតនូវទំនាក់ទំនង និងកិច្ចសហប្រតិបត្តិការ ទាំងក្នុងក្របខ័ណ្ឌទ្វេភាគី និងពហុភាគី រវាងប្រទេសទាំងពីរ។ លោកបន្ថែមថា ភាគីទាំងពីរបានកត់សម្គាល់ដោយការពេញចិត្តចំពោះទំនាក់ទំនងជាប្រពៃណីនៃមិត្តភាពដ៏ល្អប្រសើរ និងកិច្ចសហប្រតិបត្តិការប្រកបដោយផ្លែផ្ការវាងកម្ពុជា និងចក្រភពអង់គ្លេស។
លោកបញ្ជាក់តាមប្រព័ន្ធតេឡេក្រាមថា៖ «ថ្នាក់ដឹកនាំទាំងពីរបានគូសបញ្ជាក់អំពីសារៈសំខាន់នៃការអភិវឌ្ឍបន្ថែមទៀតលើវិស័យសំខាន់ៗមួយចំនួនដូចជាពាណិជ្ជកម្ម ការវិនិយោគ ធនធានមនុស្ស ការអភិវឌ្ឍបៃតង និងថាមពលកកើតឡើងវិញ និងបានរំឭកឡើងវិញអំពីខួបទី ៧០ ឆ្នាំនៃទំនាក់ទំនងការទូតរវាងប្រទេសទាំងពីរកាលពីឆ្នាំមុន ដែលភាគីទាំងពីរបានចុះហត្ថលេខាលើអនុស្សរណៈនៃការយោគយល់គ្នាស្តីពីការបង្កើតការពិគ្រោះយោបល់នយោបាយទ្វេភាគីរវាងក្រសួងទាំងពីរ»។
អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន បដិសេធមិនផ្តល់ការអត្ថាធិប្បាយបន្ថែមពាក់ព័ន្ធនឹងជំនួបរវាងរដ្ឋមន្ត្រីទាំងពីរ ដោយឱ្យវីអូអេយោងតាមសេចក្តីប្រកាសព័ត៌មានរបស់ក្រសួងវិញ។
បើតាមសេចក្តីប្រកាសព័ត៌មានរបស់ក្រសួងសេដ្ឋកិច្ច ចុះថ្ងៃទី ៤ ខែកុម្ភៈ ឆ្នាំ ២០២៤ លោក អូន ព័ន្ធមុនីរ័ត្ន និងអ្នកស្រី Anne-Marie Trevelyan បានពិភាក្សាអំពីការកែទម្រង់ ដើម្បីទាក់ទាញវិនិយោគិនបរទេសមកកម្ពុជាបន្ថែមទៀត ដូចជាការចុះបញ្ជីពាណិជ្ជកម្មដែលមានលក្ខណៈសាមញ្ញ និងងាយស្រួល ការកាត់បន្ថយពេលវេលានៃការចុះបញ្ជី ការទទួលបាននូវជំនួយផ្នែកហិរញ្ញវត្ថុ និងដើមទុនសម្រាប់សហគ្រាសធុនតូចនិងមធ្យម និងការគ្រប់គ្រងបំណុលនៅកម្ពុជា ព្រមទាំងគំនិតផ្ដួចផ្ដើមសម្រាប់កិច្ចព្រមព្រៀងពាណិជ្ជកម្មសេរីជាដើម។
បើតាមសេចក្តីប្រកាសព័ត៌មានរបស់រដ្ឋាភិបាលចក្រភពអង់គ្លេស ចុះថ្ងៃទី ៣ ខែមីនា ឆ្នាំ ២០២៤ ពាណិជ្ជកម្មនិងការវិនិយោគរវាងប្រទេសទាំងពីរនៅតែបន្តអភិវឌ្ឍ ដែលត្រូវបានជំរុញដោយគំនិតផ្តួចផ្តើមនានា រួមទាំងប្រព័ន្ធអនុគ្រោះពន្ធពាណិជ្ជកម្មសម្រាប់ប្រទេសកំពុងអភិវឌ្ឍ ជាមួយនឹងពាណិជ្ជកម្មប្រចាំឆ្នាំមានតម្លៃជាង ១.០០០ លានផោន។ អង់គ្លេសថា កម្ពុជាក៏ជាប្រទេសអាទិភាពមួយសម្រាប់កម្មវិធីភាពជាដៃគូវិនិយោគរបស់ចក្រភពអង់គ្លេស។
សេចក្តីប្រកាសព័ត៌មានបញ្ជាក់ថា៖ «ការលើកកម្ពស់លទ្ធភាពទទួលបានការអប់រំសម្រាប់ប្រជាជនកម្ពុជា ជាពិសេសស្ត្រីនិងកុមារ គឺជាអាទិភាពយូរអង្វែងនៅក្នុងទំនាក់ទំនងចក្រភពអង់គ្លេស-កម្ពុជា។ បន្ថែមពីលើកម្មវិធីដែលមានស្រាប់នៅឆ្នាំ ២០២៣ ចក្រភពអង់គ្លេសបានប្តេជ្ញាចិត្តផ្តល់មូលនិធិ ៣០ លានផោន ដើម្បីបង្កើនលទ្ធភាពទទួលបានការអប់រំសម្រាប់ស្ត្រី និងកុមារីនៅទូទាំងអាស៊ីអាគ្នេយ៍»។
ក្រៅពីកិច្ចសហប្រតិបត្តិការផ្នែកពាណិជ្ជកម្ម និងការអប់រំ ភាគីកម្ពុជានិងអង់គ្លេសក៏ខ្នះខ្នែងក្នុងការពង្រឹងទំនាក់ទំនងវប្បធម៌ និងលើកកម្ពស់ការយល់ដឹងទៅវិញទៅមករវាងប្រទេសទាំងពីរ។
បើតាមព័ត៌មានដែលបង្ហោះនៅលើទំព័រហ្វេសប៊ុករបស់ក្រសួងវប្បធម៌ និងវិចិត្រសិល្បៈ ភាគីទាំងពីរពិនិត្យលទ្ធភាពក្នុងការចុះអនុស្សារណៈ:នៃការយោគយល់ (MOU) ស្តីពីការទប់ស្កាត់ចរាចរណ៍វត្ថុបុរាណដោយខុសច្បាប់ ព្រមទាំងជួយសម្របសម្រួលក្នុងការបញ្ជូនអ្នកជំនាញមកជួយអភិរក្សសមុច្ច័យអំពីមាស និងជួយផ្តល់គំនិតយោបល់ក្នុងការរៀបចំដាក់តាំងសមុច្ច័យទាំងនោះឱ្យបានត្រឹមត្រូវតាមបទដ្ឋានបច្ចេកទេស ពោលគឺការរក្សាការពារមិនឱ្យឡើងស្នឹមនិងខូចខាតពីសំណើមក្នុងពេលដាក់តាំងបង្ហាញ។
អនុប្រធានមជ្ឈមណ្ឌលខ្មែរសិក្សាកិច្ចការតំបន់ (CCRS) លោក ឈួន វណ្ណដាសម្បត្តិ ប្រាប់វីអូអេថាដំណើរទស្សនកិច្ចនេះគឺជាដំណើរលើកទី ១ របស់មន្ត្រីជាន់ខ្ពស់ចក្រភពអង់គ្លេសមកកាន់កម្ពុជាក្រោមការដឹកនាំរបស់នាយករដ្ឋមន្ត្រីថ្មីគឺលោក ហ៊ុន ម៉ាណែត។
លោកថា កិច្ចសហប្រតិបត្តិការផ្សេងៗនឹងនាំផលប្រយោជន៍ដល់ប្រទេសទាំងពីរ និងថា ចក្រភពអង់គ្លេសអាចចូលរួមចំណែកដល់កំណើនសេដ្ឋកិច្ចរបស់កម្ពុជាដោយនាំយកការវិនិយោគ និងពាណិជ្ជកម្មរបស់ចក្រភពអង់គ្លេសកាន់តែច្រើន។
លោកបញ្ជាក់ថា៖ «ប៉ុន្តែវាក៏ទាមទារឱ្យប្រទេសកម្ពុជាធ្វើឱ្យប្រសើរឡើងនូវព័ត៌មានដែលអាចទុកចិត្តបានសម្រាប់ការធ្វើពាណិជ្ជកម្ម ដូចជាការណែនាំ ក៏ដូចជាច្បាប់ និងបទប្បញ្ញត្តិនានា ដើម្បីកសាងទំនុកចិត្តដល់អ្នកវិនិយោគ។ លើសពីនេះ ការកែលម្អផ្នែក PR (ទំនាក់ទំនងសាធារណៈ) ក៏ជាគន្លឹះដ៏សំខាន់សម្រាប់កម្ពុជាក្នុងការពិនិត្យមើល ដើម្បីឱ្យមានបរិយាកាសល្អសម្រាប់អ្នកវិនិយោគ»៕
វេទិកាបញ្ចេញមតិ