ភ្ជាប់​ទៅ​គេហទំព័រ​ទាក់ទង

គ្រោះ​ភ្លើង​ឆេះ​ព្រៃ​នៅ​រដ្ឋ កាលីហ្វ័រញ៉ា បង្ខំ​ឲ្យ​មាន​ការ​ជម្លៀស​ខ្លួន​ពលរដ្ឋ​បន្ថែម​ទៀត


អ្នក​ពន្លត់​អគ្គិភ័យ​ព្យាយាម​ពន្លត់​អណ្តាត​ភ្លើង ខណៈ​ដែល​វា​កំពុង​ឆាបឆេះ​លើ​ផ្ទះ​ប្រជាជន​នៅ​លើ​ផ្លូវ Shepherd Mesa Road ក្នុង​ក្រុង Carpinteria រដ្ឋ California កាលពី​ថ្ងៃទី១០ ខែធ្នូ ឆ្នាំ២០១៧។

សង្កាត់ Santa Barbara ក្នុង​រដ្ឋ កាលីហ្វ័រញ៉ា សហរដ្ឋអាមេរិក បាន​បញ្ជា​ឲ្យ​ប្រជាពលរដ្ឋ​ជម្លៀស​ខ្លួន​ចេញ​ពី​សង្កាត់​នេះ​កាល​ពី​ព្រឹក​ថ្ងៃ​អាទិត្យ ខណៈ​ដែល​គ្រោះភ្លើង​ឆេះព្រៃ​ដ៏​ធំ​បំផុត​ដែល​កំពុង​ឆាបឆេះ​នៅ​ក្នុង​រដ្ឋ​នេះ បាន​គំរាមកំហែង​ដល់​បណ្តា​ក្រុង​នៅ​តាម​ឆ្នេរ​សមុទ្រ​យ៉ាង​ច្រើន។ ​

ប្រជាពលរដ្ឋ​អាមេរិក​ដែល​រស់នៅ​ក្នុង​ក្រុង Carpinteria និង​ក្រុង Montecito ត្រូវ​បាន​បញ្ជា​ឲ្យ​រត់​ភៀស​ខ្លួន​កាល​ពី​ព្រឹក​ថ្ងៃ​អាទិត្យ ខណៈ​ដែល​គ្រោះ​ភ្លើង​ឆេះ​ព្រៃ​ឈ្មោះ Thomas បាន​ឆេះរាលដាល​កាន់​តែ​ខ្លាំង​ដល់​ទីក្រុង Santa Barbaraដែល​ស្ថិត​នៅ​ចម្ងាយ​ប្រមាណ​១៦០​គីឡូម៉ែត្រ​ប៉ែក​ខាង​លិច​ទីក្រុង Los Angeles។ ​

មនុស្ស​ជាង​៨ម៉ឺន​៨ពាន់​នាក់​ត្រូវ​ជម្លៀស​ខ្លួន​ចេញ ដោយ​សារ​តែ​គ្រោះ​ភ្លើង​ឆេះ​ព្រៃ Thomas ដែល​ទីភ្នាក់ងារ​ពន្លត់​អគ្គិភ័យ​នៃ​រដ្ឋ​នេះ​បាន​និយាយ​ថា ពួកគេ​អាច​ពន្លត់​ភ្លើង​នេះ​បាន​១៥ភាគរយ​ត្រឹម​យប់​ថ្ងៃ​សៅរ៍។

គ្រោះ​ភ្លើង​ឆេះ​ព្រៃ​ជិត​៦​បាន​ឆេះ​នៅ​ទូទាំង​តំបន់ Southern California កាល​ពី​សប្តាហ៍​មុន ដែល​ឆាបឆេះ​លើ​ផ្ទៃ​ដី​ទំហំ​ជាង​៦៧០​គីឡូម៉ែត្រ​ការ៉េ​ចាប់​តាំង​ពី​ថ្ងៃ​ចន្ទ​មក។ គ្រោះ​ភ្លើង​ឆេះ​ព្រៃ​ថ្មីកើតឡើង​ជា​បន្ត​បន្ទាប់​ដោយ​សារ​តែអាកាសធាតុ​ស្ងួត ហើយ​ចេះ​តែ​រីក​រាលដាលទៅ​ប៉ែក​ខាង​លិច​ដោយសារ​ខ្យល់ Santa Ana ដែល​គេ​រំពឹង​ថា នឹង​កើនឡើង​ដល់​៨០​គីឡូម៉ែត្រ​ក្នុង​មួយ​ម៉ោង​នៅ​ថ្ងៃ​អាទិត្យក្នុង​សហរដ្ឋអាមេរិក។ ​

លោក​ប្រធានាធិបតី ដូណាល់ ត្រាំ បាន​ឆ្លើយតប​ទៅ​នឹង​គ្រោះ​ភ្លើង​ឆេះ​ព្រៃ​នេះ​កាល​ពី​ថ្ងៃ​សុក្រ ដោយ​ចេញ​សេចក្តីប្រកាស​សហព័ន្ធ​មួយ​ដាក់​រដ្ឋ កាលីហ្វ័រញ៉ា ឲ្យ​ស្ថិត​ក្រោម​ស្ថានភាព​អាសន្ន ដើម្បី​ត្រួសត្រាយ​ផ្លូវ​សម្រាប់​ទីភ្នាក់ងារ​សហព័ន្ធ​ឲ្យ​ជួយសម្របសម្រួល​ដល់​កិច្ចខិតខំប្រឹងប្រែងជួយ​សង្គ្រោះ៕

XS
SM
MD
LG