អ្នកបោះឆ្នោតនៅរដ្ឋកាលីហ្វ័រញ៉ាភាគខាងលិចសហរដ្ឋអាមេរិក បានច្រានចោលកិច្ចប្រឹងប្រែងដកអភិបាលរដ្ឋមកពីគណបក្សប្រជាធិបតេយ្យ គឺលោក Gavin Newsom ចេញពីតំណែង។
អ្នកបោះឆ្នោតប្រមាណ ៧០% បានបោះឆ្នោតច្រើនលើសលុប«បដិសេធ»ការបញ្ចប់អាណត្តិរបស់លោក Newsom ដោយមានជាង ៣០% ប៉ុណ្ណោះ បានបោះឆ្នោត«យល់ព្រម»។ នេះបើយោងតាមតួលេខដែលចេញផ្សាយភ្លាមៗ បន្ទាប់ពីការបោះឆ្នោតបានបិទនៅក្នុងរដ្ឋដ៏ធំមួយនេះ កាលពីយប់ថ្ងៃអង្គារ។
បណ្តាញព័ត៌មាន AP, CNN និង NBC News សុទ្ធតែបានព្យាករជាមុនថា កិច្ចប្រឹងប្រែងបោះឆ្នោតដកអភិបាលរដ្ឋនេះ នឹងបរាជ័យ។
ថ្លែងទៅកាន់អ្នកយកព័ត៌មាននៅព្រឹកថ្ងៃពុធនេះ ខណៈលទ្ធផលបង្ហាញថា លោកទទួលបានជ័យជម្នះនោះ លោក Newsom បាននិយាយថា លោករីករាយ និងដឹងគុណប្រជាពលរដ្ឋរដ្ឋកាលីហ្វ័រញ៉ារាប់លាននាក់ ដែលបានប្រើសិទ្ធិជាមូលដ្ឋានរបស់ខ្លួនក្នុងការបោះឆ្នោត។
ការបោះឆ្នោតឡើងវិញនេះ ត្រូវបានផ្តើមឡើងដោយសារសមាជិកគណបក្សសាធារណរដ្ឋ ខឹងនឹងច្បាប់តឹងរ៉ឹងរបស់លោក Newsom ទប់ស្កាត់ជំងឺកូវីដ១៩ នៅក្នុងអំឡុងពេលមានការរាតត្បាត រួមមានការបិទសាសារៀន និងការរឹតត្បឹតលើអាជីវកម្មខ្នាតតូច ដូចជាបារ និងភោជនីយដ្ឋាន។ អ្នករៀបចំទទួលបានហត្ថលេខាគ្រប់គ្រាន់ពីអ្នកបោះឆ្នោតដែលបានចុះឈ្មោះដើម្បីបង្ខំឲ្យមានការបោះឆ្នោតឡើងវិញនេះ។
ការស្ទង់មតិអ្នកបោះឆ្នោតប៉ុន្មានថ្ងៃមុនការបោះឆ្នោតកាលពីថ្ងៃអង្គារបានបង្ហាញថា លោក Larry Elder ដែលជាអ្នករៀបចំកម្មវិធីពិភាក្សាតាមវិទ្យុអភិរក្សនិយម គឺជាបេក្ខជនឈានមុខគេក្នុងចំណោមបេក្ខជនជាង៤០នាក់ដែលអាចបន្តអាណត្តិរបស់លោក Newsom ដែលចប់នៅឆ្នាំក្រោយ។
លោក Elder ឈ្នះអ្នកប្រកួតប្រជែងដទៃទៀតយ៉ាងងាយស្រួល ដោយទទួលបានសំឡេងគាំទ្រជិត ៤៥% ដែលឆ្លើយសំណួរថា តើអ្នកបោះឆ្នោតចង់ឱ្យអ្នកណាជំនួសលោក Newsom បើបោះឆ្នោតឡើងវិញ។
លោក Newsom បានប្រៀបធៀបការបោះឆ្នោតឡើងវិញនេះ និងជាពិសេសវត្តមានរបស់លោក Elder នៅលើសន្លឹកឆ្នោត ទៅនឹងការប្រឹងប្រែងរបស់លោកអតីតប្រធានាធិបតី Donald Trump ដែលមិនមានប្រជាប្រិយភាពទាល់តែសោះក្នុងចំណោមគណបក្សប្រជាធិបតេយ្យ។ លោកបាននិយាយថា៖ «យើងបានយកឈ្នះលោក Donald Trump។ យើងមិនបានយកឈ្នះ Trump និយមទេ។ Trump និយម នៅតែមានជីវិតនៅទូទាំងប្រទេសនេះ»៕
ព័ត៌មានខ្លះក្នុងសេចក្តីរាយការណ៍នេះ ដកស្រង់ពីទីភ្នាក់ងារសារព័ត៌មាន Reuters និង The Associated Press។