ប្រទេសឥណ្ឌា និងសហរដ្ឋអាមេរិកស្ថិតនៅក្នុងចំណោមផ្នែកនានារបស់ពិភពលោកដែលការកើនឡើងនូវករណីមេរោគកូរ៉ូណាកំពុងជំរុញឱ្យពួកអាជ្ញាធរដាក់ការរឹតត្បិតឡើងវិញដែលមានន័យថា បញ្ឈប់ការរាលដាលនៃវីរុសនោះ។
ប្រទេសឥណ្ឌាបានរាយការណ៍ពីការកើនឡើងក្នុងរយៈពេល១ថ្ងៃនៅថ្ងៃចន្ទនេះមានជិត២ម៉ឺនករណី។ ប្រទេសនេះស្ថិតនៅពីក្រោយសហរដ្ឋអាមេរិកប្រេស៊ីល និងប្រទេសរុស្ស៊ីក្នុងចំនួនឆ្លងសរុបចាប់តាំងពីការរាតត្បាតបានចាប់ផ្តើមកាលពីចុងឆ្នាំទៅមក។
ផ្នែកនានានៃរដ្ឋអាសាមរបស់ឥណ្ឌាបានដាក់ការរឹតត្បិតឡើងវិញរហូតដល់ថ្ងៃទី១២ ខែកក្កដា ខណៈដែលរដ្ឋ West Bengal បានបន្តការរឹតត្បិតរបស់ខ្លួនរហូតដល់ចុងខែកក្កដា។
ក្នុងសហរដ្ឋអាមេរិក រដ្ឋ Florida រដ្ឋកាលីហ្វ័រញ៉ា រដ្ឋតិចសាស និងរដ្ឋអារីហ្សូណាស្ថិតនៅក្នុងចំណោមបណ្តារដ្ឋដែលបានឃើញការកើនឡើងនូវមេរោគកូរ៉ូណា។
លោក Ron DeSantis អភិបាលរដ្ឋ Florida បានប្រកាសកាលពីថ្ងៃអាទិត្យម្សិលមិញថា លោកនឹងបិទឆ្នេរសមុទ្រនៅក្នុងរដ្ឋរបស់លោកម្តងទៀតដោយបានស្តីបន្ទោសពួកយុវជនក្មេងៗដែលរឹងរុះមិនពាក់ម៉ាស និងអនុវត្តការស្ថិតនៅឆ្ងាយពីគ្នាចំពោះការធ្វើឱ្យកើនឡើងនូវករណីឆ្លងថ្មីនេះ។
អភិបាលរដ្ឋតិចសាស និងកាលីហ្វ័រញ៉ាក៏បានបិទរង្គសាលជាច្រើន ដោយលោក Greg Abbott អភិបាលរដ្ឋតិចសាសនិយាយថា ជំងឺកូវីដ១៩បានក្លាយជាការគ្រោះថ្នាក់បំផុតទើបតែបីបួនសប្តាហ៍កន្លងមកនេះ។
ក្នុងរដ្ឋកាលីហ្វ័ញ៉ា លោកអភិបាលរដ្ឋ Gavin Newsom បានបិទរង្គសាលនៅក្នុងសង្កាត់ចំនួន៧ដែលបានបើកឡើងវិញ ហើយបានជំរុញឱ្យសង្កាត់ចំនួន៨ថែមទៀតបិទដែរ។
នៅទូទាំងប្រទេសមានការឆ្លងជាង៣ម៉ឺន៥ពាន់ករណីក្នុងរយៈពេល៦ថ្ងៃជាប់ៗគ្នា៕
