ភ្ជាប់​ទៅ​គេហទំព័រ​ទាក់ទង

ភ្លើង​ឆេះ​ព្រៃ​នៅ​រដ្ឋ California ​គំរាមកំហែង​ដល់​លំនៅដ្ឋាន​និង​តម្រូវ​ឲ្យ​បិទ​មហាវិថី​មួយ​ចំនួន


ទិដ្ឋភាព​តាម​យន្តហោះ​បង្ហាញ​ពី​ការ​ឆេះ​ព្រៃ​ជាច្រើន​ដែល​បាន​កើត​ឡើង​នៅ​ល្ងាច​ថ្ងៃ​សុក្រ​នៅ​តាម​មហាវិថី 101​​ ភាគ​ខាង​ត្បូង​នៃ​ក្រុង Carpinteria។

អាជ្ញាធរ​និយាយ​ថា ភ្លើង​ឆេះ​ព្រៃ​ក្នុង​ល្បឿន​ដ៏​លឿន​កាល​ពី​ព្រឹកថ្ងៃ​សៅរ៍​នៅ​ភាគ​ខាង​ត្បូង​រដ្ឋ California បាន​គំរាមកំហែង​ដល់​លំនៅដ្ឋាន​ប្រជាជន​យ៉ាង​ច្រើន ​ហើយ​ប្រជាជន​នៅ​ក្នុង​តំបន់​នោះ​ត្រូវ​បាន​ជម្លៀស​ចេញ។ មហាវិថី​មួយ​ចំនួន​ក៏​ត្រូវ​បាន​បិទ​ផង​ដែរ។​

ប្រព័ន្ធ​ផ្សព្វផ្សាយ​ក្នុង​តំបន់​បាន​រាយការណ៍​ថា ក្រុម​មន្រ្តី​ពន្លត់​អគ្គិភ័យ​ក្នុង​តំបន់ Ventura បាន​និយាយ​ថា ភ្លើង​ឆេះ​ព្រៃ​នៅ​ក្បែរ​កោះ Solimar បាន​រាលដាល​ដល់​ផ្ទៃ​ដី​ចំនួន​៣៦៥​ហិចតា កាល​ពី​ព្រឹក​ថ្ងៃ​សៅរ៍ ដោយ​បាន​គំរាមកំហែង​ដល់​លំនៅដ្ឋាន​ចំនួន​៣០​ខ្នង និង​តម្រូវ​ឲ្យ​បិទ​មហាវិថី​ឆ្នេរ​ប៉ាស៊ីហ្វិក​ និង U.S. Highway 101 ​រាប់​គីឡូម៉ែត្រ។​

យោង​តាម​សេចក្តី​រាយការណ៍​របស់​សារព័ត៌មាន The Los Angeles Times កាល​ពី​ថ្ងៃ​សៅរ៍ ឧបទ្ទវហេតុ​ភ្លើង​ឆេះ​ព្រៃ​នេះ​ក៏​បាន​បញ្ឈប់​ចរាចរណ៍​ផ្លូវ​រថភ្លើង​នៅ​ក្នុង​តំបន់​ផង​ដែរ។​

លោក Mike Lindbery ស្នង​ការ​មន្រ្តី​ពន្លត់​អគ្គិភ័យ​ក្នុង​តំបន់ Ventura បាន​ថ្លែង​ប្រាប់​អ្នក​សារព័ត៌មាន​ថា អណ្តាត​ភ្លើង​បាន​ឆាបឆេះ​លើ​ផ្ទៃដី​ប្រហែល​១០០​ហិចតា​ក្បែរ​កោះ Solimar នៅ​វេលា​ម៉ោង​១១យប់​ ថ្ងៃ​សុក្រ​ ម៉ោង​នៅ​ក្នុង​រដ្ឋ California។ ក្រុម​មន្រ្តី​បាន​ថ្លែង​ថា ក្នុង​រយៈពេល​១​ម៉ោង​ វា​បាន​ឆេះ​រាលដាល​ដល់ផ្ទៃ​ដី​ចំនួន​៣៦៥​ហិចតា។

រដ្ឋ California​ បាន​ទទួល​រង​ផល​ប៉ះពាល់​ពី​គ្រោះ​រាំងស្ងួត​កាល​ពី​៤​ឆ្នាំ​មុន។​
គេ​រំពឹង​ថា បាតុភូត​ El Nino ​ខ្លាំងក្លា ដែល​ជាលក្ខខណ្ឌ​ធាតុអាកាស​ក្តៅ​នឹង​ឡើង​ដល់​កម្រិត​កំពូល​នៅ​ក្នុង​រយៈពេល​ប៉ុន្មាន​ខែ​ដំបូង​នៅ​ឆ្នាំ​ក្រោយ​នេះ ហើយ​នឹង​នាំ​ភ្លៀង​ខ្លាំង​ដល់​រដ្ឋ California នេះ​ផង​ដែរ។

កាល​ពី​សប្តាហ៍​មុន ក្រុម​មន្រ្តី​របស់​រដ្ឋ​បាន​ព្រមាន​អំពី​កម្រិត​ភ្លៀង​ធ្លាក់​ខ្លាំង​នៅ​ក្នុង​តំបន់​មួយ​ចំនួន​ដែល​ផលដំណាំ​នៅ​ក្នុង​តំបន់​នោះ​បាន​ក្រៀម​ស្វិត​ដោយ​សារ​គ្រោះ​រាំងស្ងួត​ ឬ​ឆេះអស់​ដោយសារ​អគ្គិភ័យ​ ថា​អាច​នឹង​ប្រឈម​នឹង​លំហូរ​ដីល្បាប់​ ឬ​ការ​បាក់​ដី៕​

XS
SM
MD
LG