ភ្ជាប់​ទៅ​គេហទំព័រ​ទាក់ទង

Bush ធ្វើ​ដំណើរ​ទៅ​ New Orleans ដើម្បី​ប្រារព្ធ​ខួប​ទី១០​នៃ​ព្យុះ​ Katirna


អតីត​ប្រធានាធិបតី​អាមេរិក George W. Bush និង​លោក Mitch Landrieu ​អភិបាល​ក្រុង New Orleans (រូប​ឆ្វេង) និយាយ​ទៅ​កាន់​សិស្សានុសិស្ស​នៅ​វិទ្យាល័យ Warren Easton Charter មួយ​ថ្ងៃ​មុន​ខួប​ទី​១០​នៃ​ព្យុះ Katrina នៅ​ក្នុង​ក្រុង New Orleans កាលពី​ថ្ងៃទី២៨ ខែសីហា ឆ្នាំ២០១៥។

កាល​ពី​ថ្ងៃ​សុក្រ​លោក​អតីត​ប្រធានាធិបតី​ស.រ.អា. ​George W. Bush ​បានអញ្ជើញ​ទៅ​កាន់​ក្រុង​ New Orleans ដែល​ជា​កន្លែង​កើត​ហេតុ​មាន​ចំណុច​ខ្សោយ​បំផុត​នៃ​រយៈពេល​ដែល​លោក​បាន​កាន់តំណែង​ប្រធានាធិបតី ដើម្បី​សរសើរដល់ការ​រើប​ឡើង​វិញ​នៃ​តំបន់​នោះ​ពី​មហន្តរាយ​ធម្មជាតិ​អស់​សោហ៊ុយ​ច្រើន​បំផុត​ក្នុង​ប្រវត្តិសាស្ត្រស.រ.អា.នៅ​ខួប​ឆ្នាំ​ទី​១០​នៃ​ខ្យល់​ព្យុះ​ Hurricane Katrina។​

លោក Bush បាន​អញ្ជើញ​ទៅ​ទស្សនាវិទ្យាល័យ Warren Easton ដែល​ជា​វិទ្យាល័យ​លោក​បាន​ទៅ​មើល​នៅ​ខួប​ឆ្នាំ​ទី​មួយ​នៃ​ខ្យល់​ព្យុះ​ជា​មហន្តរាយនោះ។​លោក​អតីត​ប្រធានាធិបតី​រូប​នេះ​បាន​ត្រូវ​អម​ដំណើរ​ដោយ​ភរិយា​លោក​គឺ​លោកស្រី​ Laura ដែល​មូលនិធិ​បណ្ណាល័យ​របស់​លោក​ស្រី​បានជួយ​កសាង​ជា​ថ្មីសាលារៀន​សាធារណៈ​ចាស់​ជាង​នេះ​នៅ​ក្នុង​ក្រុង New Orleans។​

លោក និង​លោកស្រី​ Bush បាន​ជួប​ជាមួយ​ពួក​សិស្សានុសិស្ស​នៅ​ក្នុង​កន្លែង​ហាត់​ប្រាណ​នៃ​សាលារៀន​នោះ​ដែល​នៅទី​នោះ​លោក និង​លោកស្រី​បាន​ទទួល​ការ​អបអរសាទរ​ពី​សំណាក់​លោក Mitch Landrieu អភិបាល​ក្រុង​ New Orleans និង​លោកស្រី​ Kathleen Blanco អតីត​អភិបាល​រដ្ឋ​ Louisiana ដែល​បាន​កាន់​តំណែង​នេះ​នៅ​ពេល​មាន​ខ្យល់​ព្យុះ​ Katrina។​

លោក Bush បាន​ថ្លែង​សុន្ទរកថា​ទៅ​កាន់​ហ្វូង​មនុស្ស​នៅ​ក្នុង​វិទ្យាល័យ​ Easton ដោយ​លោក​បាន​ដកស្រង់​ពាក្យ​សម្តី​គ្រូ​បង្រៀន​ក្នុង​ស្រុក​ម្នាក់​ដែល​បាន​និយាយ​ជម្រាប​លោក​ថា «យើង​បង្រៀនសិស្ស​របស់​យើង​ឱ្យ​ឆាប់​ងើប​ឡើង​វិញ»៕

XS
SM
MD
LG