ក្រុងបាងកក៖ លោក រ៉ូស ដាំងលី (Ross Dunkley) ជាតិអូស្រ្តាលីដែលបានបង្កើតកាសែត Myanmar Times ក្នុងឆ្នាំ២០០០ បានត្រូវចាប់ខ្លួនក្នុងទីក្រុងរ៉ង់ហ្គោន (Rangoon) ភា្លមៗបន្ទាប់ពីបានវិលត្រឡប់មកពីបរទេសកាលពីសប្តាហ៍មុន។ មានសេចក្តីរាយការណ៍ពីទំនាស់គ្នាលើការគ្រប់គ្រងកាសែតនោះ។
លោក Dunkley បានកាន់កាប់ហ៊ុន៤៩ភាគរយនៃក្រុមហ៊ុន Myanmar Consolidated Media ដែលគ្រប់គ្រងកាសែតនោះ។
ភាគហ៊ុនដែលនៅសល់កាន់កាប់ដោយលោក Tin Htun Oo ។ សេចក្តីថ្លែងការណ៍កាលពីថ្ងៃច័ន្ទមកពីក្រុមហ៊ុន Post Media ដែលមានទីតាំងក្នុងប្រទេសថៃដែលជាសាខាក្រុមហ៊ុន Myanmar Consolidate បានអំពាវនាវឲ្យដោះលែងលោក Dunkley ជាបន្ទាន់បន្ទាប់ពីអាជ្ញាធរមិនបានធ្វើការចោទប្រកាន់។ គេបានរាយការណ៍ថាលោកបានត្រូវចាប់ខ្លួនពីបទរំលោភទិដ្ឋាការនិងមានថ្នាំញៀន។
លោក Aung Zaw ជានិពន្ធនៃទស្សនាវដ្តី Irrawaddy ជាទស្សនាវដ្តីអំពីប្រទេសភូមាដែលបានបោះពុម្ភផ្សាយក្នុងប្រទេសថៃ។ លោកនិយាយថាការចាប់ខ្លួនអាចមានការទាក់ទិនច្រើនជាមួយការគ្រប់គ្រងលើកាសែតជាងការប្រព្រឹត្តិអំពើខុសឆ្គង។
«អ្វីដែលច្បាស់នោះគឺថាមានទំនាស់គ្នារវាងបណ្ឌិត Tin Htun Oo និងលោក Ross Dunkley ហើយឥឡូវនេះវាបានបង្ហាញថាពួកគេចង់កាន់កាប់កាសែត Myanmar Times ទាំងមូល។ ដូច្នេះនេះជារឿងហេតុ។ ដោយហេតុដូច្នេះហើយបានជាខ្ញុំគិតថាពួកគេនឹងឃុបឃិតដាក់ការចោទប្រកាន់លើលោក ដែលជារឿងមិនធ្វើឲ្យអ្នកណាម្នាក់ភ្ញាក់ផ្អើលទេ» ។
ដៃគូដំបូងរបស់លោក Dunkley នៅក្នុងកាសែតដែលលម្អៀងពួកយោធាគឺលោកSonny Swe ជាកូនប្រុសរបស់អតីតឧត្តមសេនីយ៍ត្រី ថាន់ ស្វេ (Thein Swe)។
ក៏ប៉ុន្តែលោកThein Swe មិនបានទទួលការពេញចិត្តពីមេដឹកនាំកំពូលទេ។ លោក Sony Swe បានត្រូវគេរកឃើញកំហុសពីការប្រព្រឹត្តិអំពើពុករលួយហើយត្រូវបានកាត់ឲ្យជាប់ទោសនៅឆ្នាំ២០០៥។ ភាគហ៊ុនរបស់លោកបានត្រូវប្រគល់ទៅឱ្យលោក Tin Htun Oo។ ភូមាដែលគេស្គាល់ថាជាមីយ៉ានម៉ា បានត្រូវដឹកនាំជាយូរមកហើយដោយពួកយោធាដែលបានត្រួតត្រាដ៏តឹងរ៉ឹងលើបណ្តាញផ្សាយព័ត៌មាននិងសេដ្ឋកិច្ចភាគច្រើនហើយនឹងជីវភាពសាធារណៈ។ សភាលើកដំបូងនៅក្នុងប្រទេសត្រូវបានបោះឆ្នោតកាលពីខែវិច្ឆិការបន្ទាប់ពីអាក់ខានរយៈពេល២២ឆ្នាំ ប៉ុន្តែជាង៨០ភាគរយនៃសមាជិករបស់ពួកគេបានស្ថិតនៅក្នុងកងទ័ព ឬក៏ទាក់ទិនក្នុងកងទ័ព។ ហើយសភាបានជ្រើសរើសអតីតនាយករដ្ឋមន្រ្តី Thein Sein ជាប្រធានាធិបតីថ្មី។
លោក Aung Zaw និយាយថាលោក Dunkley កាលពីដំបូងសង្ឃឹមថាការត្រួតត្រាដ៏តឹងរ៉ឹងលើបណ្តាញផ្សាយព័ត៌មានរបស់ភូមានឹងបានបន្ធូរបន្ថយ។ ក៏ប៉ុន្តែលោកនិយាយទៀតថាការត្រួតត្រាទាំងនោះហើយនឹងនយោបាយរបស់ប្រទេសមានន័យថារបរកាសែតជានិច្ចកាលជាការវិនិយោគទុនប្រកបដោយគ្រោះថ្នាក់។
«លោក Ross គួរតែដឹងថាភូមាជាប្រទេសមានគ្រោះថ្នាក់ខាងនយោបាយសម្រាប់មនុស្សគ្រប់ៗរូប។ លោកគួរដឹងថាតើអ្នកកាសែតប៉ុន្មាននាក់ត្រូវគេចាប់ហើយដាក់គុកនោះ»។
សមាគមជួយអ្នកទោសនយោបាយភូមាប្រាប់ឲ្យដឹងថាមានអ្នកកាសែតនិងសកម្មជនបណ្តាញផ្សាយព័ត៌មានប្រហែល៣០នាក់ស្ថិតនៅក្នុងចំណោមពួកអ្នកទោសនយោបាយជាងពីរពាន់នាក់។ លោក Dunkley ក៏បោះពុម្ភកាសែតភ្នំពេញប៉ុស្តិ៍ក្នុងប្រទេសកម្ពុជាដែរ។ អ្នកកាសែតខ្លះដែលដឹងអំពីកិច្ចប្រតិបត្តិការនេះនិយាយថាមានការភ័យខ្លាចថាការបាត់បង់កាសែតភូមាប្រហែលប៉ះពាល់ថវិកាកាសែតភ្នំពេញប៉ុស្តិ៍។ ក៏ប៉ុន្តែកាសែតភ្នំពេញប៉ុស្តិ៍កាលពីថ្ងៃច័ន្ទប្រាប់ឲ្យដឹងថាក្រុមអ្នកគ្រប់គ្រងសម្តែងការព្រួយកង្វល់មួយដល់សុខមាលភាពរបស់លោក Dunkley តែកាសែតនេះកំពុងដំណើរការជាធម្មតា។
លោក Dunkley ត្រូវបានគេចាត់ទុកជាអ្នកបណ្តាញព័ត៌មានឯករាជ្យនិងអ្នកហ៊ានប្រថុយគ្រោះថ្នាក់ បន្ទាប់ពីការវិនិយោគទុននៅក្នុងឧស្សាហ៍កម្មព័ត៌មានដ៏ក្មេងខ្ចីក្នុងប្រទេសវៀតណាមនៅដើមទសវត្សរ៍១៩៩០។
អង្គការអ្នកសារព័ត៌មានគ្មានព្រំដែនក្នុងឆ្នាំ២០១០ឲ្យលំដាប់ថ្នាក់ប្រទេសភូមាលេខ១៧៤ក្នុងចំណោមប្រទេស១៧៨នៅក្នុងតារាងសេរីភាពសារព័ត៌មានប្រចាំឆ្នាំរបស់ខ្លួន។ ពួកអ្នកវិភាគខាងបណ្តាញផ្សាយព័ត៌មានមួយចំនួនក្នុងប្រទេសតំបន់អាស៊ីអាគ្នេយ៍និយាយថាការចាប់ខ្លួនលោក Dunkley បង្ហាញពីការរឹតបន្តឹងថែមទៀតលើបណ្តាញផ្សាយព័ត៌មានដោយពួកយោធា៕
ប្រែសម្រួលដោយ ជឹង ប៉ូជីន
