អ្នកស្រី Yevhenia Serheiva ចែករំលែករូបថតពីអ្នកជិតខាងរបស់អ្នកស្រីនៅក្រុង Bucha តំបន់ក្រុងកៀវ ប្រទេសអ៊ុយក្រែន។
អ្នកស្រីរៀបរាប់ថា៖ «នៅពេលភ្លើងឆាបឆេះ ក្រុមអ្នកពន្លត់អគ្គីភ័យមិនបានមកទេ។ អគារនេះលែងមានតទៅទៀតហើយ។ របងត្រូវបាក់បែក ហើយរថក្រោះធ្លាប់បើកឆ្លងកាត់ទីនេះ»។
ជាមួយនឹងស្វាមី និងកូនស្រីឈ្មោះ Solomiia អាយុ ៥ឆ្នាំ អ្នកស្រីបានចាកចេញពីក្រុង Bucha កាលពីថ្ងៃទី២០ ខែកុម្ភៈ ហើយគ្រួសាររបស់អ្នកស្រីមានគម្រោងដើរលេងវិស្សមកាលរយៈពេលខ្លីនៅក្រុងប៊ុយដាប៉ែស ប្រទេសហុងគ្រី។
អ្នកស្រី Yevhenia Serheiva ថ្លែងថា៖ «យើងបានដើរលេងជុំវិញក្រុងប៊ុយដាប៉ែសរយៈពេល ៤ថ្ងៃ។ បន្ទាប់មក ក្តីរីករាយលែងមានតទៅទៀត។ ខ្ញុំបានធ្វើការដោយស្ម័គ្រចិត្តនៅក្រុងប៊ុយដាប៉ែស អស់ពេលកន្លងមកនេះ។ យើងបានរស់នៅទីនោះអស់រយៈពេលពីរខែ បន្ទាប់មកយើងបានផ្លាស់មកក្រុងសូហ្វីយ៉ា ដើម្បីចូលរួមជាមួយមិត្តភក្តិរបស់យើង»។
អ្នកស្រី Serheieva ធ្វើការដោយស្ម័គ្រចិត្តនៅមជ្ឈមណ្ឌលមួយឈ្មោះថា Mother Ukraine ក្នុងក្រុងសូហ្វីយ៉ា ប្រទេសប៊ុលការី។ អ្នកស្រី Olena Koceva ប្រធានមជ្ឈមណ្ឌល Mother Ukraine និយាយថា ជនភៀសខ្លួនភាគច្រើន ដែលមកប៊ុលការី នាពេលថ្មីៗនេះគឺមកពីតំបន់រងការកាន់កាប់ដោយរុស្ស៊ីនៅអ៊ុយក្រែន ហើយពួកគេមិនមានអ្វីទាំងអស់។
អ្នកស្រី Olena Koceva ថ្លែងថា៖ «មនុស្សជាច្រើនមកពីក្រុង Mariupol ក្រុង Melitopol និងក្រុង Berdyansk។ ពលរដ្ឋបានចេញពីតំបន់គ្រប់គ្រងដោយរុស្ស៊ី បន្ទាប់ពីធ្វើដំណើរដ៏លំបាក និងយូរអង្វែងមួយ»។
កាលពីខែមីនា រដ្ឋាភិបាលប៊ុលហ្គារីបានឲ្យពលរដ្ឋអ៊ុយក្រែនដែលបាត់បង់ទីលំនៅ ស្នាក់នៅបណ្តោះអាសន្នតាមសណ្ឋាគារនានា។ ពួកគេក៏ទទួលបានជំនួយឧបត្ថម្ភផ្នែកថ្នាំសង្កូវ ការអប់រំ និងសេវាកម្មសង្គមផ្សេងៗផងដែរ។
សង្គមវិទូលោក Ognyan Minchev ប្រធានវិទ្យាស្ថានសម្រាប់ការសិក្សាតំបន់និងអន្តរជាតិនៅប៊ុលហ្គារី និយាយថា បើទោះបីជាមានមនោសញ្ចេតនាគាំទ្ររុស្ស៊ីនៅប៊ុលហ្គារីក៏ដោយ មនុស្សភាគច្រើនបានជួយបំពេញតម្រូវការរបស់ជនភៀសខ្លួនអ៊ុយក្រែន។
លោកថ្លែងថា៖ «ជនភៀសខ្លួនភាគច្រើនគឺ ស្រ្តីដែលមានកូនក្នុងបន្ទុក។ ដូច្នេះ អ្នកមិនអាចបង្ហាញភាពគំរោះគំរើយដាក់ស្រ្តី និងកុមារនោះទេ ប្រសិនបើអ្នកជាមនុស្សធម្មតា»។
ពលរដ្ឋប៊ុលហ្គារីបានធ្វើការបរិច្ចាគទៅកាន់មជ្ឈមណ្ឌល Mother Ukraine ផងដែរ។
អ្នកស្រី Olena Koceva ប្រធានមជ្ឈមណ្ឌល Mother Ukraine ថ្លែងថា៖ «ខ្ញុំដឹងគុណពលរដ្ឋប៊ុលហ្គារីរបស់យើង។ អ្នកជួយពួកយើងគឺមានពលរដ្ឋសាមញ្ញ អង្គភាពផ្នែកផ្លូវច្បាប់ និងក្រុមហ៊ុននានា ដែលផ្តល់អាហារ ឬលុយ ឬបញ្ជូនលុយចូលក្នុងគណនីរបស់យើង។ យើងបានបញ្ជូនជំនួយមនុស្សធម៌ជាង ៥០តោនទៅកាន់អ៊ុយក្រែន ដែលភាគច្រើនត្រូវបានផ្តល់ឲ្យដោយពលរដ្ឋប៊ុលហ្គារី។
យ៉ាងណាក្តី អ្នកស្រី Koceva និយាយថា ទំហំជំនួយកំពុងតែធ្លាក់ចុះសន្សឹមៗអស់រយៈពេលកន្លងមកនេះ។
អ្នកស្រី Yevheniia Serheieva ថ្លែងថា៖ «មានជំនួយ និងការបរិច្ចាគតិចជាងមុន។ មនុស្សមានការហត់នឿយនឹងសង្រ្គាមហើយ»។
គិតមកត្រឹមខែកញ្ញា ពលរដ្ឋអ៊ុយក្រែនចំនួន ១៣៦.០០០នាក់បានចុះឈ្មោះដើម្បីទទួលបានការការពារបណ្តោះអាសន្ន ហើយជិត ៥៧.០០០នាក់ បន្តស្នាក់នៅក្នុងប្រទេសប៊ុលហ្គារី។ នេះបើយោងតាមទីភ្នាក់ងារជនភៀសខ្លួនអ.ស.ប ហៅកាត់ថា UNHCR។
ពួកគេភាគច្រើនកំពុងត្រូវបានឲ្យស្នាក់នៅតាមសណ្ឋាគារ ជាផ្នែកមួយនៃកម្មវិធីផ្តល់មូលនីធិដោយរដ្ឋាភិបាលប៊ុលហ្គារី និងសហភាពអឺរ៉ុប ដែលនឹងបន្តរហូតដល់ចុងខែតុលាឆ្នាំនេះ៕
ប្រែសម្រួលដោយលោក ណឹម សុភ័ក្រ្តបញ្ញា
ពលរដ្ឋប៊ុលហ្គារីស្វែងរកវិធីថ្មី ដើម្បីផ្តល់ជំនួយដល់ជនភៀសខ្លួនអ៊ុយក្រែន
ក្រុងសូហ្វ៊ីយ៉ា ប្រទេសប៊ុលហ្គារី —
