ភ្ជាប់​ទៅ​គេហទំព័រ​ទាក់ទង

site logo
ព័ត៌មាន​​ថ្មី

នាយក​រដ្ឋមន្ត្រី​អង់គ្លេស​លោក ​Johnson ​ជួប​ប្រធាន​រដ្ឋសភា​អាមេរិក​អ្នកស្រី​ Pelosi


នាយក​រដ្ឋមន្ត្រី​ចក្រភព​អង់គ្លេស​លោក ​Boris Johnson ​ត្រូវ​បាន​ស្វាគមន៍​ដោយ​ប្រធាន​រដ្ឋ​សភា​សហ​រដ្ឋ​អាមេរិក​អ្នក​ស្រី ​Nancy Pelosi ​កាលពី​ថ្ងៃ​ទី២២ ខែកញ្ញា ឆ្នាំ២០២១ នៅ​ឯ​វិមាន​សភា​សហ​រដ្ឋ​អាមេរិក។ (AP Photo/J. Scott Applewhite)

នាយក​រដ្ឋមន្ត្រី​ចក្រភព​អង់គ្លេស​លោក ​Boris Johnson ​បាន​ជួប​ជាមួយ​ប្រធាន​រដ្ឋ​សភា​សហ​រដ្ឋ​អាមេរិក​អ្នក​ស្រី ​Nancy Pelosi ​កាលពី​ថ្ងៃ​ពុធ​នៅ​ឯ​វិមាន​សភា​សហ​រដ្ឋ​អាមេរិក​ដែល​ជា​ផ្នែក​មួយ​នៃ​ការ​ឈប់​សំចត​រយៈ​ពេល​ខ្លី​នៅ​ក្នុង​រដ្ឋធានី​វ៉ាស៊ីនតោន។ ​នៅ​ពេល​ព្រឹក​ថ្ងៃ​នោះ​ លោក​Johnson ​បាន​ជួប​ជាមួយ​សមាជិក​ព្រឹទ្ធ​សភា​សហ​រដ្ឋ​អាមេរិក។​

លោក​នាយក​រដ្ឋមន្ត្រី​ចក្រភព​អង់គ្លេសកាលពី​ថ្ងៃ​អង្គារ​បាន​ជួប​ជាមួយ​លោក​ប្រធានាធិបតី​ Joe Biden ​នៅ​សេតវិមាន​នៅ​ខាង​ក្រៅ​កិច្ចប្រជុំ​មហា​សន្និបាត​អង្គការ​សហ​ប្រជាជាតិ​នៅ​ក្នុង​បូរី​ញូវយ៉ក។​

ក្នុង​ឱកាស​ថតរូប​ជាមួយ​ក្រុម​អ្នក​យក​ព័ត៌មាន អ្នកស្រី ​Pelosi ​បាន​ថ្លែង​ថា​ អ្នក​ស្រី​បាន​ជួប​លោក ​Johnson កាលពី​សប្តាហ៍​មុន​នៅ​ពេលអ្នកស្រី​នៅ​ក្នុង​ទីក្រុង​ឡុងដ៍​ដើម្បី​ចូលរួម​កិច្ច​ប្រជុំ​កំពូល​របស់​មេដឹកនាំ​សភា​របស់​ប្រទេស​ G-7 ។​ អ្នកស្រី​ក៏​បាន​សរសើរ​មេដឹកនាំ​ចក្រភព​អង់គ្លេស​ចំពោះ​ការ​រៀបចំ​សន្និសីទ​កំពូល​អំពី​អាកាសធាតុ​ នៅពេល​ខាង​មុខ​ នៅ​ក្នុង​ទីក្រុង ​Glasglow​ ប្រទេស​ស្កុតលែន ​ពី​ថ្ងៃ​ទី១ដល់​ថ្ងៃ​ទី១២​ខែវិច្ឆិកា ​ហើយ​បាន​និយាយ​ថា ​ ពួកគេ​មាន​បំណង​ពិភាក្សា​អំពី​ការ​ប្រឹងប្រែង​រួម​ប្រឆាំង​អំពើ​ភេរវកម្ម​ និង​បញ្ចប់​ការ​រាតត្បាត​នៃ​ជំងឺ​កូវីដ១៩។​

លោក​នាយក​រដ្ឋមន្ត្រី ​Johnson ​បាន​ប្រាប់​ក្រុម​អ្នក​យក​ព័ត៌មាន​ថា ​ វា​សំខាន់​ណាស់​ដែល​លោក​ទៅ​ការិយាល័យ​របស់​អ្នក​ស្រី ​Pelosi​ពីព្រោះ​ក្នុង​មួយ​ជីវិត​របស់​លោក ​ លោក​បាន​គិត​ថា ​សហ​រដ្ឋ​អាមេរិក​ និង​សភា​សហ​រដ្ឋ​អាមេរិក​តំណាង​ឲ្យ​ឧត្តម​គតិ​នៃ​លទ្ធិ​ប្រជា​ធិបតេយ្យ​ និង​«គោល​ការណ៍​ដែល​ពលរដ្ឋ​គួរ​ជ្រើសរើស​រដ្ឋាភិបាល​របស់​ពួកគេ ​និង​មាន​តែ​ពលរដ្ឋ​ទេ​ដែល​ត្រូវ​ជ្រើសរើស​រដ្ឋាភិបាល​របស់​ខ្លួន»។​

លោក​បាន​ប្រាប់​អ្នក​ស្រី ​Pelosi ​ថា​សហរដ្ឋ​អាមេរិក​អាច​ពឹងពាក់​ការ​គាំទ្រ​របស់​លោក​ និង​ការគាំទ្រ​របស់​ចក្រភព​អង់គ្លេស​ដើម្បី​លើក​ស្ទួយ​គោល​ការណ៍​នេះ។​

ក្នុង​អំឡុង​ដំណើរ​ទស្សនកិច្ច​របស់​អ្នកស្រី​ទៅ​កាន់​ទីក្រុង​ឡុងដ៍​កាលពី​សប្តាហ៍​មុន ​ អ្នក​ស្រី ​Pelosi​ បាន​បញ្ជាក់​ថា ​ ​មោឃភាព​នៃ​កិច្ច​ព្រមព្រៀង​សន្តិភាព​អៀរឡង់​ខាង​ជើង​ដែល​គេ​ហៅ​ថា​ កិច្ច​ព្រមព្រៀង​ថ្ងៃ​សុក្រ​ល្អ ឬ «Good Friday Accords» ​ទំនង​ជា​នឹង​ធ្វើ​ឲ្យ​អន្តរាយ​ដល់​ការ​ចរចា​សម្រាប់​កិច្ច​ព្រមព្រៀង​ពាណិជ្ជកម្ម​ទ្វេភាគី​ជាមួយ​សហ​រដ្ឋ​អាមេរិក​ ក្រោយ​ការ​ចាកចេញ​របស់​អង់គ្លេស​ពី​សហភាព​អឺរ៉ុប​ ឬ ​Brexit។​

រដ្ឋាភិបាល​របស់​លោក ​Johnson ​កំពុង​ស្វះស្វែង​រក​ការ​ចរចា​ឡើង​វិញ​យ៉ាង​ហោចណាស់​ផ្នែក​មួយ​នៃ​កិច្ច​ព្រមព្រៀង​នេះ។​ មេ​ដឹកនាំ​ទាំង​២​មិន​បាន​និយាយ​ឡើង​វិញ​ជាសាធារណៈ​អំពី​ការខ្វែង​គំនិត​គ្នា​ដ៏​សំខាន់​ទេ៕​

(ព័ត៌មានខ្លះ​ក្នុង​សេចក្តី​រាយ​ការណ៍​នេះ​ដក​ស្រង់​ពី​ទីភ្នាក់ងារ​សារ​ព័ត៌មាន AP Reuters និង AFP)

XS
SM
MD
LG