ដោយហៅការបរិច្ចាគវ៉ាក់សាំងកូវីដ១៩ទៅឲ្យប្រទេសដទៃជារឿងដ៏សំខាន់មួយ លោកប្រធានាធិបតី Joe Biden បានប្រកាសកាលពីថ្ងៃអង្គារថា សហរដ្ឋអាមេរិកបានដឹកជញ្ជូនវ៉ាក់សំាងកូវីដ១៩ជាង១១០លានដូសទៅឲ្យប្រទេសចំនួន៦៥នៅលើពិភពលោក ដែលរងគ្រោះខ្លាំងដោយសារជំងឺកូវីដ១៩នោះ។
លោកប្រធានាធិបតី Biden បានថ្លែងសុន្ទរកថានៅសេតវិមានថា៖ «ការផ្តល់វ៉ាក់សាំងជំងឺកូវីដរបស់អាមេរិកមានចំនួនច្រើនជាងការផ្តល់របស់ប្រទេសចំនួន២៤ ដែលបានផ្តល់វ៉ាក់សាំងទៅឲ្យប្រទេសនានា រួមទាំងការផ្តល់ដោយប្រទេសចិននិងប្រទេសរុស្ស៊ីផងដែរ»។
លោកប្រធានាធិបតីក៏បាននិយាយសង្កត់ធ្ងន់ថា រដ្ឋាភិបាលក្រុងវ៉ាស៊ីនតោនមិនបានទាមទារអ្វី ចំពោះការផ្តល់វ៉ាក់សាំងទៅឲ្យប្រទេសទាំងនោះទេ។
លោកនិយាយថា៖ «ការផ្តល់វ៉ាក់សាំងនេះមិនប្រកាន់បក្សពួក និន្នាការអ្វីឡើយ និងមិនមានចំណងលក្ខខណ្ឌអ្វីឡើយ។ យើងធ្វើការផ្តល់នេះគឺដើម្បីសង្គ្រោះជីវិតមនុស្ស និងបញ្ចប់ជំងឺឆ្លងរាតត្បាតមួយនេះ»។
ឆ្លើយទៅនឹងសំណួររបស់វីអូអេថា តើប្រទេសអ្នកមានប្រាក់ចំណូលខ្ពស់គួរធ្វើដូចសហរដ្ឋអាមេរិកដែរឬយ៉ាងណានោះ លោកប្រធានាធិបតីឆ្លើយថា «ខ្ញុំគិតថា ប្រទេសដែលមានប្រាក់ចំណូលខ្ពស់ទាំងនោះ ដែលអាចមានលទ្ធភាពចាក់វ៉ាក់សាំងឲ្យពលរដ្ឋរបស់ខ្លួន ហើយមានលទ្ធភាពអាចជួយផ្តល់ប្រាក់ ឬវ៉ាក់សាំងកូវីដដល់ប្រទេសក្រីក្រប្រហែល១០០ប្រទេសដែលត្រូវការជំនួយនោះ គួរតែធ្វើដូចអាមេរិកដែរ»។
លោកBidenនិយាយថា ប្រទេសមួយចំនួននៃក្រុមប្រទេស G7 ដែលមានមានឧស្សាហកម្មជឿន លឿន បានសន្យាធ្វើដូចនេះ នៅក្នុងជំនួបកំពូលនាពេលថ្មីៗនៅក្នុងប្រទេសអង់គ្លេស ហើយបានអនុវត្តនូវការសន្យានោះ»។
លោកប្រធានាធិបតីក៏បានបន្ថែមទៀតថា៖ «យើងបានរក្សានូវការបេ្តជ្ញាចិត្តរបស់យើង ហើយយើងធ្វើនូវអ្វីដែលយើងបាននិយាយ។ ជំនួយរបស់យើងរហូតមកដល់ពេលនេះមានទំហំច្រើនជាងជំនួយប្រទេសនានាបូកបញ្ចូលរួមគ្នា»។
វ៉ាក់សាំងជំនួយរបស់អាមេរិកភាគច្រើនត្រូវបានបញ្ជូនទៅឲ្យប្រទេសនានាតាមរយៈកម្មវិធី Covax ចាត់ចែងដោយអង្គការសុខភាពពិភពលោក ក៏ដូចជាតាមរយៈដៃគូក្នុងតំបន់ ដូចជាសហភាពអាហ្វ្រិក និងសហគមន៍ការ៉ាអ៊ីបជាដើម៕
