រថយន្តដឹកទំនិញមួយគ្រឿងបានបើកទៅបុកអ្នកថ្មើរជើងនៅខាងក្រៅវិហារសាសនាឥស្លាមមួយក្នុងទីក្រុងឡុងដ៍ កាលពីព្រឹកថ្ងៃច័ន្ទ ដែលបានបណ្តាលឲ្យមនុស្ស១០នាក់រងរបួស នៅក្នុងហេតុការណ៍ដែលលោកស្រីនាយករដ្ឋមន្ត្រីអង់គ្លេស Theresa May បានហៅថា ជាការវាយប្រហារ«ដ៏គួរឲ្យស្អប់ខ្ពើម»ទៅលើអ្នកកាន់សាសនាឥស្លាម។
រថយន្តនោះបានបត់យ៉ាងលឿនទៅរកហ្វូងមនុស្សមួយក្រុម ក្រោយពាក់កណ្តាលអាធ្រាត្របន្តិច ខណៈដែលអ្នកថ្មើរជើងទាំងនោះចាកចេញពីកន្លែងបន់ស្រន់ Muslim Welfare House និងវិហារ Finsbury Park ដែលនៅក្បែរនោះ នៅប៉ែកខាងជើងទីក្រុង ឡុងដ៍ ដែលជាវិហារដ៏ធំបំផុតមួយនៅអង់គ្លេស។
មនុស្សម្នាក់ស្លាប់នៅនឹងកន្លែង ប៉ុន្តែគេនៅមិនទាន់ច្បាស់នៅឡើយទេ ថាបុរសម្នាក់នោះស្លាប់ដោយសារការវាយប្រហារនោះឬយ៉ាងណា។
ប៉ូលិសនឹងវាយតម្លៃទៅលើសន្តិសុខរបស់វិហារសាសនាឥស្លាមនោះ និងផ្តល់ធនធានបន្ថែមដែលចាំបាច់សម្រាប់ប្រារព្ធការបញ្ចប់ពិធីរ៉ាម៉ាដន។ នេះបើយោងតាមការប្រកាសរបស់លោកស្រី May។
លោកស្រីបានថ្លែងសុន្ទរកថាតាមកញ្ចក់ទូរទស្សន៍ថា «នេះគឺជាការវាយប្រហារទៅលើអ្នកកាន់សាសនាឥស្លាមក្បែរកន្លែងសក្ការៈបូជារបស់ពួកគេ។ ហើយដូចអំពើភេរវកម្មដទៃទៀតដែរ ទោះក្នុងទម្រង់ណាក៏ដោយ អំពើនេះមានគោលបំណងដូចៗគ្នា។ វាធ្វើឲ្យយើងបែកបាក់គ្នា ហើយបំបែកសាមគ្គីភាពរបស់យើង និងភាពជាពលរដ្ឋនៅក្នុងប្រទេសនេះ។ យើងនឹងមិនឲ្យវាកើតឡើងនោះទេ»។
លោក Sadiq Khan អភិបាលក្រុងឡុងដ៏ បានហៅហេតុការណ៍នេះ ថាជា«ការវាយប្រហារភេរវកម្មដ៏អាក្រក់ទៅលើទីក្រុងរបស់យើង»។
អាជ្ញាធរនិយាយថា ប៉ូលិសបានចាប់ខ្លួនអ្នកបើករថយន្តដឹកទំនិញអាយុ៤៨ឆ្នាំនោះ ដែលត្រូវបានចាប់ខ្លួនដោយសាធារណជននៅនឹងកន្លែងកើតហេតុ៕
