ចក្រភពអង់គ្លេសនឹងក្លាយជាប្រទេសទីមួយនៅក្នុងការចាប់ផ្តើមប្រើវ៉ាក់សាំងបង្ការជំងឺកូវីដ១៩ ដែលផលិតរួមគ្នាដោយក្រុមហ៊ុន Pfizer និងក្រុមហ៊ុន BioNTech។ នេះបើយោងតាមការប្រកាសរបស់រដ្ឋាភិបាលកាលពីថ្ងៃអាទិត្យម្សិលមិញ។
ក្រសួងសុខាភិបាលចក្រភពអង់គ្លេសបានបញ្ជាក់ថា វ៉ាក់សាំងកូវីដ១៩ ដំបូងនឹងត្រូវចែកចាយទៅឲ្យបុគ្គលិកសុខាភិបាល និងពលរដ្ឋចក្រភពអង់គ្លេសដែលមានអាយុជាង ៨០ ឆ្នាំ ដោយចាប់ផ្តើមនៅថ្ងៃអង្គារស្អែក។
វ៉ាក់សាំងប្រហែល ៨ សែនដូស ត្រូវគេរំពឹងថានឹងត្រូវបានចាក់ឲ្យពលរដ្ឋក្នុងសប្តាហ៍ទីមួយ។
កាលពីថ្ងៃសុក្រ ប្រទេសបារ៉ែនបានក្លាយជាប្រទេសទី ២ បន្ទាប់ពីចក្រភពអង់គ្លេស នៅក្នុងការអនុញ្ញាតឲ្យមានការប្រើក្នុងគ្រាបន្ទាន់នូវវ៉ាក់សាំងកូវីដ១៩ ដែលផលិតរួមគ្នាដោយក្រុមហ៊ុន Pfizer និងក្រុមហ៊ុន BioNTech នេះ។
ការប្រឈមនៅក្នុងការចែកចាយវ៉ាក់សាំងនេះគឺធ្វើយ៉ាងណាត្រូវរក្សាវ៉ាក់សាំងក្នុងសីតុណ្ហភាពត្រជាក់គ្រប់គ្រាន់។ វ៉ាក់សាំងនេះត្រូវរក្សាទុកក្នុងសីតុណ្ហភាពប្រហែល -៧០ អង្សារសេ៕
