លោកនាយករដ្ឋមន្ត្រីអង់គ្លេស David Cameron បាននិយាយថាលោកនឹងបង្កើតរដ្ឋាភិបាលថ្មីមួយនៅក្រោយគណបក្សអភិរក្សនិយមរបស់លោកបានឈ្នះឆ្នោតទទួលសំឡេងគាំទ្រភាគច្រើននៅក្នុងការបោះឆ្នោតសភាកាលពីថ្ងៃព្រហស្បតិ៍ដែលជាការផ្ទុយពីការស្ទង់មតិនៅមុនការបោះឆ្នោតដែលថាគណបក្សនេះឈ្នះឆ្នោតតែបន្តិច។
លោក Cameron នឹងកាន់តំណែងជានាយករដ្ឋមន្ត្រីសម្រាប់អាណតិ្ត៥ឆ្នាំទៀតហើយគណបក្សអភិរក្សនិយមរបស់លោកនឹងកាន់កាប់អសនៈ៣២៦ក្នុងបណ្តាកៅអីទាំងអស់៦៥០ក្នុងសភា House of Commons។ លទ្ធផលនៃការបោះឆ្នោតនេះបាននាំឱ្យមានការចុះចេញពីតំណែងនៃក្រុមមេដឹកនាំគណបក្សប្រឆាំងដោយរួមមានទាំងលោក Ed Miliband នៃគណបក្សការងារដែលជាគណបក្សលំដាប់ទីពីរផងដែរ។
ថ្លែងនៅក្រោយលោកបានចូលគាល់ព្រះមហាក្សត្រិយានី Elizabeth នៅវាំង Buckingham លោក Cameron បានប្តេជ្ញាថានឹងគ្រប់គ្រងជាគណបក្សរបស់ «ប្រទេសជាតិតែមួយ និងព្រះរាជាណាចក្ររួបរួមមួយ» ហើយលោកបានសន្យាថានឹងអនុញ្ញាតឱ្យមានការបោះឆ្នោតប្រជាមតិមួយអំពីថាតើប្រទេសអង់គ្លេសគួរឋិតនៅក្នុងប្លុកពាណិជ្ជកម្មសហភាពអឺរ៉ុបដែលមានប្រទេសជាតិ២៨ជាសមាជិកដែរឬទេ។ ក្រុមអ្នកវិភាគបណ្តាញផ្សាយព័ត៌មានបាននិយាយស្មានៗថាជម្រើសមួយបែបនេះអាចដាក់ឱ្យក្រុមអ្នកបោះឆ្នោតអង់គ្លេសធ្វើការសម្រេចចិត្តក្នុងរយៈពេលពីរឆ្នាំទៀត៕