ក្រសួងអប់រំចក្រភពអង់គ្លេសបានបញ្ជាដល់សាលារៀនជាង១៥០នៅទូទាំងប្រទេសឱ្យបិទអគារនានាដែលត្រូវកសាងឡើងពីបេតុងប្រភេទ RAAC ដែលជាបេតុងមួយបែបដែលងាយបាក់រលំបាន។
សេចក្តីសម្រេចនេះមានឡើងតែប៉ុន្មានថ្ងៃមុនការចាប់ផ្តើមបវេសនកាលរដូវស្លឹកឈើជ្រុះ បណ្តាលឱ្យមានការរិះគន់ខ្លាំងពីក្រុមឪពុកម្តាយរបស់សិស្ស ក្រុមគ្រូបង្រៀន និងក្រុមអ្នកនយោបាយ។
លោក Nick Gibb រដ្ឋលេខាធិការទទួលបន្ទុកសាលារៀន (Schools Minister) បាននិយាយប្រាប់បណ្តាញព័ត៌មាន BBC កាលពីពេលថ្មីៗនេះថាមេដំបូលមួយបានបាក់កាលពីរដូវក្តៅ នាំឱ្យរដ្ឋាភិបាលអង់គ្លេសពិនិត្យមើលគ្រោះថ្នាក់បណ្តាលមកពីបេតុង RAAC។
ក្នុងរយៈពេលប៉ុន្មានខែចុងក្រោយនេះ គេឃើញមានអគារកសាងដោយបេតុង RAAC បានបាក់រលំ ទាំងនៅតាមសាលារៀននិងកន្លែងឯទៀតៗ។ បេតុងប្រភេទ RAAC ស្រាលហើយត្រូវបានប្រើក្នុងការសាងសង់អគាររហូតដល់ពាក់កណ្តាលទសវត្សរ៍ឆ្នាំ១៩៩០។ បេតុង RAAC អាចមានអាយុកាលដល់ប្រមាណ៣០ឆ្នាំ។
រដ្ឋមន្ត្រីក្រសួងអប់រំអង់គ្លេស (Education Secretary) លោកស្រី Gillian Keegan បានពណ៌នាសេចក្តីសម្រេចនេះរបស់រដ្ឋាភិបាលថា ជា«វិធីសាស្ត្រដោយប្រុងប្រយ័ត្ន»មួយ។
លោកស្រីបានធានាអះអាងដល់សាធារណជនថា សាលារៀនដែលត្រូវប៉ះពាល់ច្រើនបំផុតនៅតែបើកបង្រៀនពីព្រោះនៅទីនោះ បេតុងដែលមានបញ្ហាត្រូវបានរកឃើញថាមានកម្រិតតិច។ ប៉ុន្តែសាលារៀនខ្លះប្រឈមនឹងការបិទទ្វារទាំងស្រុង នាំឱ្យគ្រូបង្រៀននិងក្រុមឪពុកម្តាយសិស្សប្រវេប្រវារកជម្រើសផ្សេងៗទៀត រួមទាំងការបញ្ជូនសិស្សឱ្យទៅរៀននៅសាលារៀនផ្សេងទៀត ឬរហូតដល់ការចាត់ចែងឱ្យសិស្សរៀនពីចម្ងាយដូចដែលមានធ្វើនៅអំឡុងពេលមានការរាតត្បាតជំងឺកូវីដ១៩។
រឿងដែលនាំឱ្យមានការភ្ញាក់ផ្អើលខ្លាំងអំពីសេចក្តីប្រកាសរបស់រដ្ឋាភិបាលគឺថា ពួកគេបានដឹងជាយូរមកហើយអំពីគ្រោះថ្នាក់បណ្តាលមកពីបេតុង RAAC។
ក្នុងពេលកន្លងមក មានសាលារៀនជាង៥០ ដែលមានអគារធ្វើពីបេតុង RAAC ត្រូវបានបិទដោយសារកង្វល់អំពីសុវត្ថិភាព។
កាលពីខែមិថុនា ការិយាល័យសវនកម្មជាតិ បានរាយការណ៍អំពីគ្រោះថ្នាក់ដល់សិស្សនិងគ្រូបង្រៀនបណ្តាលមកពីអគារសាលារៀនស្ថាបនាដោយបេតុង RAAC។ ពួកគេនិយាយយោងដល់លទ្ធភាពនៃការរងរបួសឬការស្លាប់ដោយសារការរលំអគារ។
ព្រឹត្តិការណ៍ទាំងនេះកើតមានឡើងក្រោយកូដកម្ម៦ខែរបស់ក្រុមគ្រូបង្រៀននៅទូទាំងចក្រភពអង់គ្លេស ដោយសារមានការចោទអំពីការផ្តល់ថវិកាជាតិតិចនិងការមិនសូវគិតគូររបស់រដ្ឋាភិបាល។ ពួកអ្នករិះគន់ពីភាគីទាំងអស់ពណ៌នាការបិទសាលារៀនច្រើនកន្លែងបែបនេះថាជាបរាជ័យធំមួយ។
លោក Daniel Kebede អគ្គលេខាធិការសហជីពជាតិខាងការសិក្សាអប់រំបាននិយាយនៅក្នុងសេចក្តីថ្លែងការណ៍មួយថា ស្ថានភាពនេះឆ្លុះបញ្ចាំងឱ្យឃើញពី«អសមត្ថភាពរបស់រដ្ឋាភិបាល...»។ នៅមុនការបោះឆ្នោតដែលត្រូវរំពឹងធ្វើឡើងក្នុងឆ្នាំ២០២៤ លោកនាយករដ្ឋមន្ត្រីអង់គ្លេស Rishi Sunak នឹងត្រូវពិចារណាធ្វើបែបណាដើម្បីឱ្យមានការទុកចិត្តពីសាធារណជន និងទប់ទល់នឹងការចំអកដល់ការប្រឹងប្រែងរបស់លោកក្នុងវិស័យហេដ្ឋារចនាសម្ព័ន្ធនិងវិស័យអប់រំ៕
ព័ត៌មានខ្លះនៅក្នុងសេចក្តីរាយការណ៍នេះ មានប្រភពពីទីភ្នាក់ងារសារព័ត៌មាន AP និង Reuters។
ប្រែសម្រួលដោយលោក ឈឹម សុមេធ
