តើចក្រភពអង់គ្លេសគួរការពារសិទ្ធិនិងសេរីភាពរបស់ប្រជារាស្ត្រហុងកុងដែលមានចែងនៅក្នុងសេចក្តីប្រកាសរួមមួយត្រូវចុះហត្ថលេខាជាមួយរដ្ឋាភិបាលក្រុងប៉េកាំងនៅមុនពួកអង់គ្លេសប្រគល់ដែនដីនេះទៅឱ្យពួកចិនកាលពីឆ្នាំ១៩៩៧ ដោយបញ្ចប់ការគ្រប់គ្រងអាណានិគម១៥៦ឆ្នាំឬទេ?
ឬមួយចក្រភពអង់គ្លេសគួរបន្ថយការត្អូញត្អែររបស់ខ្លួនអំពីការគ្រប់គ្រងតឹងរ៉ឹងរបស់ចិនក្នុងក្រុងហុងកុង ឬអំពីការបំពានរបស់ចិនលើកិច្ចព្រមព្រៀងរួមគ្នា ដើម្បីផ្គាប់ផ្គន់ចិនហើយទទួលអត្ថប្រយោជន៍ខាងពាណិជ្ជកម្ម?
កាលពីឆ្នាំទៅមិញ នៅពេលមានសង្គ្រាមពាណិជ្ជកម្មរវាងរដ្ឋាភិបាលក្រុងប៉េកាំងនិងរដ្ឋាភិបាលក្រុងវ៉ាស៊ីនតោនហើយនៅពេលមានការរឹះគន់ខ្លាំងឡើងៗនៅក្នុងក្រុង Brussels ថាប្រទេសចិនជា «អ្នកប្រជែងមួយខាងយុទ្ធសាស្ត្រ» ចក្រភពអង់គ្លេសបានស្វះស្វែងធ្វើឱ្យមានតុល្យភាពខាងការទូតដោយមិនកាន់ជើងខាងណាមួយទេ។
ក៏ប៉ុន្តែកាលពីពាក់កណ្តាលសប្តាហ៍នេះអង់គ្លេសបានបាត់បង់តុល្យភាពនេះហើយ។
នៅពេលនេះរដ្ឋាភិបាលក្រុងឡុងដ៍និងរដ្ឋាភិបាលក្រុងប៉េកាំងមានជម្លោះខាងការទូតពេញទំហឹងនៅក្រោយមានបាតុកម្មមហាជននៅក្នុងក្រុងហុងកុងប្រឆាំងនឹងច្បាប់មួយដែលនៅពេលនេះបានត្រូវផ្អាក ហើយ ដែលអនុញ្ញាតឱ្យមានការធ្វើបត្យាប័នទៅកាន់ប្រទេសចិនដីគោក។ ក្រុមសកម្មជនលម្អៀងទៅខាងលទ្ធិប្រជាធិបតេយ្យនិយាយថាការធ្វើបត្យាប័ននេះអាចត្រូវប្រើប្រឆាំងនឹងពួកជំទាស់នៅក្នុងអតីតដែនដីអាណានិគមអង់គ្លេសនេះ។
នៅក្នុងកំណើនសង្គ្រាមពាក្យសម្តី ពួកមន្ត្រីអង់គ្លេសនិងចិនបានព្រមានគ្នាទៅវិញទៅមកអំពីផលវិបាកធ្ងន់ធ្ងរ។
ការឈ្លោះប្រកែកគ្នានេះមានឡើងក្រោយលោក Jeremy Hunt រដ្ឋមន្ត្រីការបរទេសអង់គ្លេសបានសុំដល់អាជ្ញាធរចិនឱ្យគោរពតាមសេចក្តីប្រកាសរួមរវាងអង់គ្លេសនិងចិនដែលទាក់ទិននឹងការវិលត្រឡប់របស់ក្រុងហុងកុងមកឋិតនៅក្រោមការត្រួតត្រារបស់ប្រទេសចិនវិញ៕
