ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

គណៈកម្មាធិការ​ព្រឹទ្ធសភា​ប្រេស៊ីល​ផ្តល់​អនុសាសន៍​ឲ្យ​ចោទ​ប្រកាន់​បទព្រហ្មទណ្ឌ​លើ​ប្រធានាធិបតី​អំពី​ជំងឺ​កូវីដ១៩


ស្រមោល​នៃ​ក្រុម​បាតុករ​នៅ​លើ​ទង់ជាតិ​នៃ​ប្រទេស​ប្រេស៊ីល​ក្នុង​អំឡុង​ពេល​ការតវ៉ា​ទាមទារ​ឲ្យ​មាន​ការចោទ​ប្រកាន់​ប្រធានាធិបតី​ប្រេស៊ីល Jair Bolsonaro ក្នុង​ក្រុង Brasilia ប្រទេស​ប្រេស៊ីល កាលពី​ថ្ងៃទី២៤ ខែកក្កដា ឆ្នាំ២០២១។
ស្រមោល​នៃ​ក្រុម​បាតុករ​នៅ​លើ​ទង់ជាតិ​នៃ​ប្រទេស​ប្រេស៊ីល​ក្នុង​អំឡុង​ពេល​ការតវ៉ា​ទាមទារ​ឲ្យ​មាន​ការចោទ​ប្រកាន់​ប្រធានាធិបតី​ប្រេស៊ីល Jair Bolsonaro ក្នុង​ក្រុង Brasilia ប្រទេស​ប្រេស៊ីល កាលពី​ថ្ងៃទី២៤ ខែកក្កដា ឆ្នាំ២០២១។

គណៈ​កម្មាធិការ​ពិសេស​មួយ​របស់​ព្រឹទ្ធសភា​ប្រេស៊ីល​ បាន​ផ្តល់​អនុសាសន៍​ជា​ផ្លូវ​ការ​ថា​ ប្រធានាធិបតី​ប្រេស៊ីល​លោក ​Jair Bolsonaro ​គួរ​ប្រឈម​ការ​ចោទ​ប្រកាន់​ព្រហ្មទណ្ឌ​ទៅ​លើ​ចំណាត់​ការ​របស់​លោក​អំពី​ការ​រាតត្បាត​នៃ​កូវីដ១៩​ ដែល​បាន​សម្លាប់​ប្រជាជន​ប្រេស៊ីល​ជាង​៦​សែន​នាក់​ គឺ​ច្រើន​បំផុត​ទី​២​ នៅ​លើ​ពិភព​លោក​ បន្ទាប់​ពី​សហ​រដ្ឋ​អាមេរិក។​

គណៈ​កម្មាធិការ​នេះ ​បាន​បោះ​ឆ្នោត​ដោយ​មាន​សំឡេង​គាំទ្រ​៧​ ទល់​នឹង​៤​ កាលពី​ថ្ងៃ​អង្គារ​ អនុម័ត​របាយ​ការណ៍កម្រាស់​១,២០០​ទំព័រ​ចងក្រង​ដោយ​សមាជិក​ព្រឹទ្ធសភា​ប្រេស៊ីល​លោក​ Renan Calheiros ​ដែល​បាន​ចោទ​ថា​ លោក​ប្រធានាធិបតី​ Bolsonaro ​បាន​ធ្វើ​សកម្មភាព ​ដូច​ជា​ការ​ជំរុញ​ឲ្យ​មាន​ការ​ប្រើ​ប្រាស់​ឱសថ​ hydroxychloroquine​ដែល​មិន​មាន​ការ​សាក​ល្បង​ត្រឹម​ត្រូវ​សូម្បី​បន្ទាប់​ពី​ថ្នាំ​នេះ​ ត្រូវ​បាន​បង្ហាញ​ថា ​មិន​មាន​ប្រសិទ្ធ​ភាព​ព្យាបាល​ជំងឺ​កូវីដ១៩​ក៏ដោយ​ ហើយ​លោក​ បាន​ពន្យារ​ពេល​ទិញ​វ៉ាក់សាំងកូវីដ១៩​ ជាដើម។​

របាយ​ការណ៍​នោះ​លើក​ឡើង​ថា​ លោក​ Bolsonaro​ ជឿ​ថា ​ការ​អនុញ្ញាត​ឲ្យ​វីរុស​កូវីដ១៩​ឆ្លង​ទូទាំង​ប្រទេស​ប្រេស៊ីល​ នឹង​នាំ​ឱ្យ​មាន​ភាព​ស៊ាំ​ជា​ទូទៅ ហើយ​នៅ​ពេល​ដែល​ពលរដ្ឋជា​ច្រើន​មាន​ភាព​ស៊ាំ​ក្នុង​ខ្លួន​គ្រប់​គ្រាន់​តាម​រយៈ​នៃ​ការ​ឆ្លង​កន្លង​មក​ វា​នឹង​បញ្ឈប់​ការ​ឆ្លង​ជាយថាហេតុ។​

របាយ​ការណ៍​នោះ​ ក៏​បាន​ថ្កោលទោស​ប្រធានាធិបតី​ប្រេស៊ីល​រូប​នេះ​ ដែល​បាន​អះអាង​ដោយ​ខុស​ឆ្គង​ក្នុង​ការ​ផ្សាយ​តាម​បណ្តាញ​សង្គម​កាល​ពី​សប្តាហ៍​មុន​ ដែល​ថា​ ពលរដ្ឋ​ក្នុង​ចក្រភព​អង់គ្លេស​ ដែល​បាន​ចាក់​វ៉ាក់សាំងកូវីដ១៩​គ្រប់ដូស​ហើយ​នោះ​ មាន​ជំងឺ​អេដស៍​លឿន​ជាង​ការ​រំពឹង​ទុក។​

របាយ​ការណ៍​នេះ​ត្រូវ​បាន​ធ្វើ​ឡើង​ ក្រោយ​ការ​ស៊ើប​អង្កេត​រយៈពេល​៦​ខែ​អំពី​ចំណាត់​ការ​របស់​លោក​ Bolsonaro​ ទាក់ទង​ការ​រាតត្បាត​ជំងឺ​កូវីដ១៩​ និង​បាន​អំពាវនាវ​ឲ្យ​រដ្ឋអាជ្ញារ​ចោទ​ប្រកាន់​ប្រធានាធិបតី​រូប​នេះ​នូវ​បទ​ឧក្រិដ្ឋ​ចំនួន​៩​ករណី​ ដែល​រួម​មាន​ ការ​បោក​ប្រាស់​ការ​ញុះញង់​បទ​ឧក្រិដ្ឋ​ និង​ឧក្រិដ្ឋកម្ម​ប្រឆាំង​មនុស្សជាតិ ​ដែល​អាច​នាំ​ឱ្យ​មាន​ការ​ប្តឹង​ប្រឆាំង​រូប​លោក​ដោយ​តុលាការ​ព្រហ្មទណ្ឌ​អន្តរជាតិ​ផង​ដែរ។​ របាយ​ការណ៍​នេះ​ ក៏​បាន​អំពាវ​នាវ​ឲ្យ​ចោទ​ប្រកាន់​ក្រុមហ៊ុន​ចំនួន​២​ និង​បុគ្គល​ចំនួន​៧៧​នាក់​ផ្សេង​ទៀត​ ដែល​ក្នុង​នោះរួម​មាន​អតីត​មន្ត្រី​ និង​មន្ត្រី​ក្នុង​រដ្ឋាភិបាល​បច្ចុប្បន្ន​ និង​សម្ព័ន្ធមិត្ត​របស់​ប្រធានាធិបតី​រូប​នេះ​ និង​៣​នាក់​ក្នុង​ចំណោម​កូន​ប្រុស​របស់​លោក​ដែលម្នាក់​ជា​សមាជិក​ព្រឹទ្ធសភា​ប្រេស៊ីល​ផង​ដែរ។​

លោក​ប្រធានាធិបតី​ Bolsonaro ​ បាន​បដិសេធ​ការ​ស៊ើប​អង្កេត​នេះ​ ដោយ​ហៅ​ថា ​វា​ជា​រឿង​កំប្លែង​បណ្តាល​មកពី​នយោបាយ៕​

ព័ត៌មាន​ខ្លះ​ក្នុង​សេចក្តី​រាយ​ការណ៍​នេះ ​ដក​ស្រង់​ពី​ទីភ្នាក់ងារ​ព័ត៌មាន​ The Associated Press, Reuters និង​ Agence France-Presse។

XS
SM
MD
LG