កាលពីថ្ងៃសៅរ៍មនុស្សរាប់ម៉ឺននាក់បានប្រមូលផ្តុំគ្នានៅក្នុងកន្លែងបញ្ចុះសពមួយនៅជិតក្រុង Srebrenica នៃប្រទេសបូស្ន៊ី (Bosnia) ដើម្បីប្រារព្ធខួប២០ឆ្នាំនៃអំពើឃោរឃៅដ៏អាក្រក់បំផុតក្នុងទ្វីបអឺរ៉ុបចាប់តាំងពីសង្គ្រាមលោកលើកទីពីរមក។
ពិធីនេះបានប្រព្រឹត្តទៅមុនការបញ្ចុះសពជនរងគ្រោះ១៣៦នាក់ដែលត្រូវបានគេស្គាល់អត្តសញ្ញាណកាលពីពេលថ្មីៗនេះនៅជិតផ្នូរសពជនរងគ្រោះជាង៦ពាន់នាក់ដែលបានត្រូវបញ្ចុះរួចស្រេចហើយនៅក្នុងកន្លែងបញ្ចុះសព Potocari នៅខាងក្រៅក្រុង Srebrenica។
តុលាការអន្តរជាតិពីរបានហៅការសម្លាប់បុរស និងកុមារាកាន់សាសនាអ៊ីស្លាម៨ពាន់នាក់ដោយក្រុម Serbe របស់បូស្ន៊ីថា ជាការសម្លាប់ប្រល័យពូជសាសន៍។ជនជាតិ Serbe ច្រើននាក់បានជំទាស់នឹងពាក្យនេះ។
កាលពីថ្ងៃទី១១ ខែកក្កដា ឆ្នាំ១៩៩៥ ក្រុមទាហាន Serbe របស់បូស្ន៊ីបានវាយយកបានក្រុង Srebrenica ដែលត្រូវបានការពារដោយក្រុមទាហានហូឡង់នៃក្រុមយោធាអ.ស.ប. ហើយបានធ្វើការសម្លាប់រង្គាល។ ពួក Serbe បានកប់សាកសពជនរងគ្រោះនៅក្នុងផ្នូរសព រួមមានសាកសពច្រើននៅជុំវិញក្រុង Srebrenica នៅក្នុងកិច្ចខិតខំប្រឹងប្រែងមួយដើម្បីលាក់បាំងទំហំនៃឧក្រិដ្ឋកម្មរបស់ពួកគេ។
លោកអតីតប្រធានាធិបតីស.រ.អា. Bill Clinton និងឥស្សរជនពិភពលោកឯទៀតៗបានចូលរួមក្នុងពិធីនេះ ហើយបានដាក់ផ្កានៅឯកន្លែងអនុស្សាវរីយ៍នោះផងដែរ។
លោកនាយករដ្ឋមន្ត្រី Alexander Vucic នៃប្រទេស Serbia បានចូលទៅក្នុងកន្លែងបញ្ចុះសពនោះដើម្បីដាក់ផ្កា ក៏ប៉ុន្តែមនុស្សរាប់ពាន់នាក់បានស្រែកហ៊ូរ និងបានហួចសម្តែងការមិនពេញចិត្តនឹងលោក។ មនុស្សខ្លះទៀតបានគ្រវែងវត្ថុរឹងដាក់លោក។ លោក Vicic និងឆ្មាំរបស់លោកត្រូវបង្ខំឱ្យចាកចេញពីទីនោះ។
រដ្ឋបាល Clinton បានរៀបចំឱ្យមានកិច្ចព្រមព្រៀងក្រុង Dayton ដែលបានបញ្ចប់សង្គ្រាមនោះទាំងស្រុងដែលបានកើតមានឡើងពីឆ្នាំ១៩៩២ដល់ឆ្នាំ១៩៩៥បណ្តាលឱ្យមនុស្សប្រមាណ១សែននាក់បាត់បង់ជីវិត៕
