សម្តេចប៉ាប Francis បានអំពាវនាវដល់ប្រជារាស្ត្របូស្ន៊ី (Bosnia) ឱ្យស្វះស្វែងរកសន្តិភាពនិងភាពសុខដុមរមនាខាងពូជសាសន៍និងខាងសាសនាប្រកបដោយចីរភាពដើម្បីពុះពារឧបសគ្គនៃការបែកបាក់គ្នាយ៉ាងខ្លាំងបណ្តាលមកពីសង្គ្រាមក្នុងតំបន់បាល់កង់ (Balkan) កាលពីទសវត្សរ៍ឆ្នាំ១៩៩០។
នៅក្នុងពីធីសូត្រធម៌មួយសម្រាប់មនុស្សប្រមាណ៦ម៉ឺន៥ពាន់នាក់ កាលពីថ្ងៃសៅរ៍នៅក្នុងកីឡាដ្ឋានក្រុង Sarajevo ដែលជានិមិត្តរូបនៃភាពប្លែកៗគ្នាខាងពូជសាសន៍និងខាងសាសនានៅក្នុងអតីតប្រទេសយូហ្គោស្លាវី (Yugoslavia) សម្តេចបានរំឮកអំពីទុក្ខវេទនាដែលប្រជារាស្ត្របូស្ន៊ីបានជួបប្រទះ ដូចជាជំរុំជនភៀសខ្លួន ផ្ទះសំបែង និងរោងចក្រដែលបានត្រូវបំផ្លាញ មនុស្សខ្ចាត់ព្រាត់ពីផ្ទះសំបែង និងជីវិតដែលមានការបែកខ្ញែក ហើយព្រះអង្គបានមានបន្ទូលថា «មិនត្រូវមានសង្គ្រាមទៀតទេ»។
នៅក្នុងសន្និសីទកាសែតរួមគ្នាមួយជាមួយប្រធាន Serb នៃគណៈប្រធានាធិបតីដែលមានសមាជិកបីនាក់នៃប្រទេសបូស្ន៊ី គឺលោក Mladen Ivanic សម្តេចប៉ាបបានមានបន្ទូលថា «សន្តិភាពនិងភាពចុះសម្រុងគ្នារវាងជនអំបូរ Croat អំបូឬ Serb និងបូស្ន៊ី ព្រមទាំងការផ្តើមគំនិតដើម្បីពង្រីកសន្តិភាព និងភាពសុខដុមរមនានេះថែមទៀត...ក្នុងចំណោមក្រុមអ្នកកាន់សាសនាមូស្លីម ពួក Hebrews និងក្រុមអ្នកគោរពគ្រឹស្តសាសនាមានសារៈសំខាន់ដែលហួសពីការគិតទុកទៅទៀត»៕
