នៅថ្ងៃព្រហស្បតិ៍នេះ ក្រុមពលរដ្ឋបុរីកីឡា និងសហគមន៍បឹងកក់ មានគ្នាមិនដល់១០នាក់ បានចេញទៅតវ៉ានៅមុខផ្ទះ អ្នកស្រីស៊ុយ សុផាន ដែលពួកគេចោទថា មិនបានផ្តល់សំណងសមស្របចំពោះការបាត់បង់ផ្ទះសម្បែងរបស់ពួកគេ កាលពីឆ្នាំ២០១២។ នេះបើយោងតាមការបញ្ជាក់របស់ក្រុមអ្នកតវ៉ា និងលិខិតដែលធ្លាប់ដាក់ប្តឹងទៅមេដឹកនាំប្រទេសកម្ពុជាសព្វថ្ងៃ។
នៅក្នុងការតវ៉ានៅថ្ងៃព្រហស្បតិ៍ ក្រុមប្រជាពលរដ្ឋដែលមិនទាន់ទទួលបានសំណងពីការបាត់បង់ផ្ទះសម្បែងនោះ បានចោទអ្នកស្រីស៊ុយ សុផាន ថា បានលែងសត្វឆ្កែពីរក្បាល ឲ្យមកប្រឈមនឹងអ្នកតវ៉ា ដែលធ្វើឲ្យស្រ្តីអ្នកតវ៉ាម្នាក់រងរបួស។
អ្នកស្រី ភោគ សុភីន ដែលជាអ្នកដឹកនាំការតវ៉ា បានប្រាប់ VOA នៅមុខផ្ទះអ្នកស្រី ស៊ុយ សុផាន ថា៖
«គាត់ធ្វើគ្រប់វិធីសាស្ត្រដើម្បីធ្វើបាបពួកខ្ញុំ ឆ្កែគាត់ឲ្យខាំ លែងឆ្កែឲ្យខាំ បាញ់ទឹកដាក់ពួកខ្ញុំ មិនឲ្យអង្គុយ។ ធ្វើបាបពួកខ្ញុំ សព្វបែប សព្វយ៉ាងហើយ គាត់មិនព្រមដោះស្រាយឲ្យខ្ញុំទៀត មកគាត់ប្រើហិង្សាអីចឹងដាក់ខ្ញុំ។ គាត់ធ្វើអីមិនកើត គាត់ប្រើសត្វពន្លាត់របស់គាត់មកខាំ ពួកខ្ញុំ ហើយគាត់មិនយកចិត្តទុកដាក់ទេ»។
អ្នកស្រីភោគ សុភីន អះអាងថា អ្នកស្រីបានរស់នៅក្នុងតំបន់បុរីកីឡានេះ តាំងពីឆ្នាំ១៩៩៦មកម្ល៉េះ ហើយផ្ទះអ្នកស្រីត្រូវបានគេឈូសឆាយ ក្នុងឆ្នាំ២០១២ ជាពេលដែលក្រុមហ៊ុនផានអ៊ីមិច របស់អ្នកស្រីស៊ុយ សុផាន ចូលទៅធ្វើការអភិវឌ្ឍន៍ក្នុងតំបន់នោះ។
ពាក្យបណ្តឹងរបស់អ្នកស្រី ភោគ សុភីន ដែលបានដាក់ប្តឹងទៅលោកនាយករដ្ឋមន្ត្រី ហ៊ុន សែន កាលពីខែសីហា ឆ្នាំ២០១៧ បានបញ្ជាក់ឲ្យដឹងថា នៅថ្ងៃទី៣ ខែមករា ឆ្នាំ២០១២ ក្រុមហ៊ុនផានអ៊ីមិច និងអាជ្ញាធរសាលារាជធានីភ្នំពេញ បានឈូសឆាយ ផ្ទះសម្បែងប្រជាសហគមន៍ក្រីក្រជាង៣០០គ្រួសារ ដោយមិនមានសំណងនោះឡើយ។
ក្នុងលិខិតដដែលនោះ អ្នកស្រីបានស្នើសុំឲ្យលោកនាយករដ្ឋមន្ត្រីហ៊ុន សែន អន្តរាគមន៍រកដំណោះស្រាយ ដល់អ្នកស្រី និងអ្នករងគ្រោះដទៃទៀត ព្រោះក្រុមហ៊ុនផានអ៊ីមិច មិនគោរពតាមកិច្ចសន្យាជាមួយលោកនាយករដ្ឋមន្ត្រី ដោយក្រុមហ៊ុននេះ សន្យាថា សង់អគារចំនួន១០ តែក្រុមហ៊ុនសង់បានតែ៨អគារប៉ុណ្ណោះ ដែលធ្វើឲ្យប្រជាពលរដ្ឋជាច្រើនគ្រួសារមិនបានទទួលផ្ទះរស់នៅនៅក្នុងបុរីកីឡា។
លិខិតនោះ បានសរសេរតាមន័យដើមថា៖ «ក្រោយពីមានការតវ៉ាពីប្រជាពលរដ្ឋ សាលារាជធានីភ្នំពេញ បានដោះស្រាយផ្ទះឲ្យប្រជាពលរដ្ឋនៅក្នុងបុរីកីឡា នៅភូមិអណ្តូង នៅជាយក្រុងភ្នំពេញ មានអ្នកខ្លះ បានសំណងជាថវិកាសមរម្យ និងបានចាកចេញពីបុរីកីឡារួចទៅហើយ។ ប៉ុន្តែនាងខ្ញុំ ភោគ សុភីន មិនមានឈ្មោះក្នុងបញ្ជី របស់សាលារាជធានីភ្នំពេញ ដែលផ្តល់ដំណោះស្រាយបែបណានោះទេ»។
អ្នកស្រី ភោគ សុភីន បានបន្ថែមទៀតថា៖
«ខ្ញុំសុំឲ្យយាយផាន់ហ្នឹង ឈូសផ្ទះខ្ញុំ ដោះស្រាយឲ្យខ្ញុំ ហើយបើថា គាត់ប្រគល់ឲ្យសាលារាជធានីភ្នំពេញ ដោះស្រាយទេ សុំឲ្យសាលារាជធានីភ្នំពេញហ្នឹង មើលដល់ពួកខ្ញុំផង ដែលពួកខ្ញុំរងទុក្ខវេទនា ទៅតវ៉ា មកគាត់លែងឆ្កែឲ្យខាំ ហើយប្រើហិង្សាដល់ពួកខ្ញុំសព្វបែបសព្វយ៉ាងនេះ រដ្ឋាភិបាលនេះ។ តើមើលដល់ពួកខ្ញុំ? ហើយសុំអំពាវនាវដល់សម្តេចហ៊ុន សែន មើលរាស្ត្រក្រីក្រផង! ដែលគាត់ជាប់ឆ្នោតនៅអាណត្តិទី៦ហើយ សុំឲ្យមើលរាស្ត្រអ្នកក្រ សុំកុំឲ្យគាត់ប្រើមន្ត្រីថ្នាក់ក្រោម ថ្នាក់ក្រោមធ្វើបាបរាស្ត្រអីចឹង»។
កាលពីថ្ងៃទី៨ ខែធ្នូ ឆ្នាំ២០១៧ អភិបាលរងរាជធានីលោក មាន ចាន់យ៉ាដា បានចេញសេចក្តីជូនដំណឹងលើកទីមួយ ដោយបានបញ្ជាក់ឲ្យដឹងថា មានប្រជាពលរដ្ឋជាង ៩០ភាគរយ ដែលពាក់ព័ន្ធនឹងជម្លោះជាមួយក្រុមហ៊ុន ផានអ៊ីម៉ិច បានព្រមទទួលយកសំណង ហើយនៅមានគ្រួសារមួយចំនួនតូចតែប៉ុណ្ណោះ ដែលមិនទាន់អញ្ជើញមកទទួលសំណង។
សេចក្តីជូនដំណឹងលើកទីមួយនោះ បានផ្តល់ពេលពីរសប្តាហ៍ដល់អ្នកដែលនៅសេសសល់ឲ្យមកទទួលសំណងគោលនយោបាយ។ ក្រោយការចេញសេចក្តីជូនដំណឹងដដែលនោះ ប្រជាពលរដ្ឋដែលនៅសេសសល់ នៅតែមិនព្រមរើចេញពីអគារបុរីកីឡាចាស់ ហើយទោះបីអាជ្ញាធរខណ្ឌ៧ មករា ទុកពេលឲ្យប្រជាពលរដ្ឋទាំងនោះចាកចេញក្នុងរយៈពេលពីរសប្តាហ៍ទៀត ដោយមានសំណងគោលនយោបាយក៏ក្រុមប្រជាពលរដ្ឋដែលចង់បានផ្ទះនៅក្នុងសហគមន៍បុរីកីឡាដដែល មិនព្រមចាកចេញពីផ្ទះ និងទីជម្រកក្នុងអគារចាស់ក្នុងប្លុកបុរីកីឡា។
VOA មិនទាន់អាចសុំការអធិប្បាយពីអ្នកស្រី ស៊ុយ សុផាន បាននៅឡើយទេ នាថ្ងៃព្រហស្បតិ៍នេះ។ VOA ក៏មិនទាន់អាចសុំការអធិប្បាយពីលោកម៉េត មាសក្តី អ្នកនាំពាក្យសាលារាជធានីភ្នំពេញបានដែរ ដោយសារទូរស័ព្ទលោករោទិ៍ តែគ្មានអ្នកទទួល។
ក្នុងការតវ៉ានៅមុខផ្ទះអ្នកស្រីស៊ុយ សុផាន ដែលស្ថិតនៅក្បែរផ្សារដើមគរ ក្នុងរាជធានីភ្នំពេញនេះ គេឃើញស្ត្រីម្នាក់អង្គុយយំ ដោយមានរបួសតូចមួយនៅត្រង់ជើង។ របួសនេះ ត្រូវក្រុមអ្នកតវ៉ា អះអាងថា ជាសកម្មភាពរបស់សត្វឆ្កែចិញ្ចឹមដោយអ្នកស្រីស៊ុយ សុផាន។
អ្នកស្រីភោគ សុភីន ឲ្យដឹងថា រហូតមកដល់ពេលនេះ មានពលរដ្ឋប្រមាណ២០គ្រួសារ ដែលនៅមិនទាន់បានទទួលការដោះស្រាយពីអ្នកស្រី ស៊ុយ សុផាន និងសាលារាជធានីភ្នំពេញ៕
