ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អាជ្ញាធរ​រកឃើញ​សាកសព​ជនជាតិ​ចិន​៣​នាក់​ ខណៈ​បន្ត​ស្វែង​រក​អ្នក​បាត់​ខ្លួន​ក្នុង​ហេតុការណ៍​លិច​ទូក​នៅ​ដែន​សមុទ្រ​កម្ពុជា


ជនជាតិ​ចិន​ដើរ​លើ​ស្ពាន​នៅ​កោះ​មួយ​ក្នុង​ខេត្ត​ព្រះសីហនុ បន្ទាប់​ពី​ពួកគេ​ត្រូវ​បាន​ជួយស​ង្គ្រោះ​ពី​ហេតុការណ៍​លិច​ទូក កាល​ពី​ថ្ងៃ​ព្រហស្បតិ៍ ទី ២២ ខែកញ្ញា ឆ្នាំ២០២២។ (Preah Sihanouk province Authority Police via AP)
ជនជាតិ​ចិន​ដើរ​លើ​ស្ពាន​នៅ​កោះ​មួយ​ក្នុង​ខេត្ត​ព្រះសីហនុ បន្ទាប់​ពី​ពួកគេ​ត្រូវ​បាន​ជួយស​ង្គ្រោះ​ពី​ហេតុការណ៍​លិច​ទូក កាល​ពី​ថ្ងៃ​ព្រហស្បតិ៍ ទី ២២ ខែកញ្ញា ឆ្នាំ២០២២។ (Preah Sihanouk province Authority Police via AP)

ជនជាតិ​ចិន​ ៣​ នាក់​បាន​ស្លាប់ និង​មួយ​ចំនួន​ទៀត​នៅ​បន្ត​បាត់​ខ្លួន នៅ​ក្នុង​ហេតុការណ៍​លិច​ទូក​ឈើ​មួយ​គ្រឿង​ក្នុង​ដែន​សមុទ្រ​កម្ពុជា កាល​ពី​ថ្ងៃ​ព្រហស្បតិ៍​សប្តាហ៍​មុន។ ទូក​នោះ​ត្រូវបាន​រាយការណ៍​ថា​បានដឹក​ជនជាតិ​ចិន​ចំនួន​ ៤១ ​នាក់​ចូល​មក​ប្រទេស​កម្ពុជា​ដោយ​ខុស​ច្បាប់។ នេះ​បើ​តាម​អភិបាល​រង​ខេត្ត​ព្រះសីហនុ។

អាជ្ញាធរ​ខេត្ត​ព្រះ​សីហនុ​បាន​ឱ្យ​ដឹង​ថា​ គិត​ត្រឹម​រសៀល​ ថ្ងៃ​ទី​ ២៦ ខែ​កញ្ញា ឆ្នាំ ២០២២​ នេះ ជនជាតិ​ចិន​ ៨ នាក់ នៅ​បន្ត​បាត់​ខ្លួន ខណៈ​អាជ្ញាធរ​កម្ពុជា​បាន​ជួយ​សង្គ្រោះ​មនុស្ស​ ២១ ​នាក់។ អាជ្ញាធរ​កម្ពុជា​ក៏​បាន​រក​ឃើញ​សាកសព​ជន​ជាតិ​ ៣ នាក់​ផង​ដែរ។

លោក ឡុង ឌីម៉ង់ អភិបាល​រង​ខេត្ត​ព្រះសីហនុ ប្រាប់​វីអូ​អេនៅថ្ងៃចន្ទ​នេះ​ថា​ អាជ្ញាធរ​វៀតណាម​ក៏​បាន​ជួយ​សង្គ្រោះ​ជនជាតិ​ចិន ​៩​ នាក់ នៅ​ក្នុង​ដែន​ទឹក​របស់​ខ្លួន​ដែល​នៅ​ជាប់​កម្ពុជា។ លោក​ថ្លែង​បន្ត​ថា ​ជនជាតិ​ចិន​ទាំង​នោះ​បាន​ធ្វើ​ដំណើរ​តាម​ទូក​ចូល​មក​កម្ពុជា​ដោយ​ខុស​ច្បាប់ ដោយ​សារ​ពួក​គេ​មិន​មាន​លិខិត​ឆ្លង​ដែន​អ្វី​ឡើយ។

លោក​បាន​ថ្លែង​ថា៖ «ឆ្លង​ដែន​មក​ខុស​ច្បាប់​ហ្នឹង​ឯង គឺ​មក​ហ្នឹង អត់​មាន​ក្រដាស​ស្នាម​មាន​អី​ទេ។ ហើយ​ឆ្លង​មក​អ៊ីចឹង​បាន​ន័យ​ថា​ខុស​ច្បាប់​ហើយ។ មិន​អាច​ឱ្យ​គាត់​ឆ្លង​ទូក​មក​អ៊ីចឹង អត់​មាន​ការ​ផ្តល់​ដំណឹង​ផ្តល់​អី»។

ជនជាតិ​ចិន​ចុះ​ពី​កាណូតមួយ បន្ទាប់​ពី​ត្រូវ​បាន​ជួយ​សង្គ្រោះ​ពី​ហេតុការណ៍​លិចទូក នៅ​កោះ​តាងក្នុង​ខេត្ត​ព្រះសីហនុ កាល​ពី​ថ្ងៃព្រហស្បតិ៍ ទី ២២ ខែកញ្ញា ឆ្នាំ២០២២។ (Preah Sihanouk province Authority Police via AP)
ជនជាតិ​ចិន​ចុះ​ពី​កាណូតមួយ បន្ទាប់​ពី​ត្រូវ​បាន​ជួយ​សង្គ្រោះ​ពី​ហេតុការណ៍​លិចទូក នៅ​កោះ​តាងក្នុង​ខេត្ត​ព្រះសីហនុ កាល​ពី​ថ្ងៃព្រហស្បតិ៍ ទី ២២ ខែកញ្ញា ឆ្នាំ២០២២។ (Preah Sihanouk province Authority Police via AP)
អ្នកស្រី Huang Qian វ័យ ២០ឆ្នាំ មក​ខេត្ត​ហ៊ូណាន ប្រទេស​ចិន កំពុង​សម្រាក​ព្យាបាល​នៅ​មន្ទីរពេទ្យ​មួយ ក្នុង​ខេត្ត​ព្រះសីហនុ ថ្ងៃទី ២៤ ខែកញ្ញា ឆ្នាំ២០២២ បន្ទាប់​ពី​ត្រូវ​បាន​ជួយសង្គ្រោះ​ពី​ហេតុការណ៍​លិចទូក កាល​ពី​ថ្ងៃទី ២២ ខែកញ្ញា ឆ្នាំ២០២២។
អ្នកស្រី Huang Qian វ័យ ២០ឆ្នាំ មក​ខេត្ត​ហ៊ូណាន ប្រទេស​ចិន កំពុង​សម្រាក​ព្យាបាល​នៅ​មន្ទីរពេទ្យ​មួយ ក្នុង​ខេត្ត​ព្រះសីហនុ ថ្ងៃទី ២៤ ខែកញ្ញា ឆ្នាំ២០២២ បន្ទាប់​ពី​ត្រូវ​បាន​ជួយសង្គ្រោះ​ពី​ហេតុការណ៍​លិចទូក កាល​ពី​ថ្ងៃទី ២២ ខែកញ្ញា ឆ្នាំ២០២២។

កាល​ពី​ថ្ងៃទី​ ២២ ខែ​កញ្ញា ឆ្នាំ​ ២០២២ វេលា​ម៉ោង​ ១០:៣០​ នាទី​ព្រឹក ទូក​ឈើ​មួយ​គ្រឿង​ដែល​ដឹក​ជនជាតិ​ចិន​ទាំង​អស់ សរុប​ ៤១ ​នាក់ ដែល​មាន​ស្រី​ ៣​ នាក់ បាន​លិច​ក្នុង​សមុទ្រ​ស្ថិត​នៅ​ចំណុច​មួយ​នៅ​ចន្លោះ​ពយសារឿង និង​កោះតាង ក្នុង​ភូមិ​សាស្រ្ត ខេត្ត​ព្រះសីហនុ។ នេះ​បើ​តាម​អាជ្ញាធរ​ខេត្ត​ព្រះសីហនុ។

លោក ឡុង ឌីម៉ង់ បាន​បញ្ជាក់​ថា ​អាជ្ញាធរ​មិន​ទាន់​ដឹង​ទេ​ថា​ តើ​ពួក​គេចូល​មក​កម្ពុជា​មាន​គោល​បំណង​អ្វី​ឡើយ។

សារព័ត៌មាន​ South China Morning Post ដែល​បាន​សម្ភាសន៍​អ្នក​រស់​រៀន​មួយ​ចំនួន ឲ្យ​ដឹង​ថា​ ជនជាតិ​ចិន​ទាំង​នោះ​មិន​បាន​ដឹង​ថា ​ពួកគេធ្វើ​ដំណើរ​ឆ្ពោះ​មក​កាន់​កម្ពុជា​ឡើយ ខណៈ​ទូរសព្ទ​របស់​ពួក​គេ​ត្រូវ​បាន​រឹប​អូស​យក។ ជន​រងគ្រោះ​បញ្ជាក់​ថា​ ពួក​គេ​ត្រូវ​បាន​អូស​ទាញ​ឱ្យ​ធ្វើ​ដំណើរ​តាម​សមុទ្រ ជាមួយ​ការ​សន្យា​ផ្តល់​ប្រាក់​កម្រៃ​ចាប់​ពី​ ២.៨០០​ ដុល្លារ​ នៅ​ក្នុង​ដំណើរ​នេសាទ​មួយ ដែលមានរយៈពេល​ ២០ ​ថ្ងៃ។

បើ​តាម​សារព័ត៌មាន​ដដែល ទូក​មួយ​គ្រឿង​នេះ​បាន​ចេញ​ដំណើរ​ពី​ខេត្ត​ក្វាងទុង(Guangdong) ​នៃ​ប្រទេស​ចិន កាល​ពី​ថ្ងៃ​ទី​ ១០ ខែ​កញ្ញា ឆ្នាំ​ ២០២២។

វីអូអេ​មិន​ទាន់​អាច​សុំ​ការ​អត្ថាធិប្បាយ​ពី​ស្ថានទូត​ចិន​ប្រចាំ​នៅ​កម្ពុជា តាម​សារ​អ៊ីម៉ែល​បាន​នៅ​ឡើយ​ទេ។ ទោះ​ជាយ៉ាងណា ឯក​អគ្គរដ្ឋ​ទូត​ចិន​ប្រចាំ​នៅ​កម្ពុជា លោក វ៉ាង វិន​ធាន កាល​ពី​ថ្ងៃ​ទី​ ២៤ ខែ​កញ្ញា ឆ្នាំ​ ២០២២ ក៏​បាន​ទៅ​សួរ​សុខ​ទុក្ខ​អ្នក​រស់​រាន​មាន​ជីវិត ដែល​ស្នាក់​នៅ​មន្ទីរពេទ្យ​បង្អែក​ខេត្ត​ព្រះសីហនុ។

លោក កែវ វណ្ណថន អគ្គ​នាយក​រង​នៃ​អគ្គ​នាយក​ដ្ឋាន​អន្តោប្រវេសន៍​នៃ​ក្រសួង​មហាផ្ទៃ ប្រាប់​វីអូអេ​ថា​ ជន​បរទេស​ទាំង​នោះ​មិន​ទាន់​ត្រូវ​បាន​បញ្ជូន​មក​ផ្នែក​អន្តោប្រវេសន៍​នៅ​ឡើយ​ទេ។ លោក​ថ្លែង​បន្ថែម​ថា ​បើ​សិន​ជនជាតិ​ចិន​ទាំង​នោះ​ចូល​មក​កម្ពុជា​ដោយ​ខុស​ច្បាប់ ពួក​គេ​នឹង​ត្រូវ​បណ្តេញ​ចេញ​ទៅ​កាន់​ប្រទេស​កំណើត​វិញ។

លោក​បាន​ថ្លែង​ថា៖ «ហ្នឹង​ហើយ ​បើ​សិន​ជា​គាត់​អត់​មាន​លិខិត​ឆ្លង​ដែន​ យើង​ខ្ញុំ​បណ្តេញ​ចេញ​ហើយ។ ប៉ុន្តែ​ទាល់​តែ​បញ្ជូន​មនុស្ស​ហ្នឹង​មក​សិន បាន​ខាង​ខ្ញុំ​ពិនិត្យ​ហើយ​ហ៊ាន​អះអាង»។

មួយ​រយៈ​ចុងក្រោយ​នេះ មាន​សេចក្តី​រាយការណ៍​ជា​បន្ត​បន្ទាប់​អំពី​ជន​បរទេស​ចូល​មក​កម្ពុជា​ដោយ​ខុស​ច្បាប់ ដើម្បី​ស្វែង​រក​ការងារ ជាមួយ​ការ​សន្យា​ថា​នឹង​បាន​ប្រាក់​ខែ​ខ្ពស់។ ជន​បរទេស​ទាំង​នោះ​ត្រូវ​បាន​បង្ខាំង​ទុក មិន​ឱ្យ​មាន​សេរី​ភាព រង​ការ​ធ្វើ​ទារុណ​កម្ម និង​កេង​ប្រវ័ញ្ច​កម្លាំង​ពលកម្ម ក្នុង​រូបភាព​ជួញដូរ​មនុស្ស​ជាដើម។

គួរ​បញ្ជាក់​ថា ប្រទេស​កម្ពុជា​ក៏​ត្រូវ​បានរាយការណ៍​ថា​ជា​កន្លែង​ប្រើប្រាស់​កម្លាំង​បរទេស​ឲ្យ​ធ្វើ​សកម្មភាព​ខុស​ច្បាប់ ដូច​ជា​ការ​បោក​បញ្ឆោតតាម​បច្ចេកវិទ្យា ​ឬ​ហៅ​ថា​ Scam៕

XS
SM
MD
LG