ការសម្រេចទៅមុខខ្លះត្រូវបានធ្វើឡើងស្តីពីការឈប់បាញ់គ្នានៅតំបន់ហ្កាហ្សាក្នុងរយៈពេលមួយខែកន្លះកន្លងមកនេះ ក៏ប៉ុន្តែ ឥឡូវនេះទាំងអ៊ីស្រាអែលនិងក្រុមហាម៉ាស់ត្រូវតែបង្ហាញនូវ«ឆន្ទៈនយោបាយ»ដើម្បីធ្វើឱ្យបានសម្រេចនូវកិច្ចព្រមព្រៀងនោះ។ នេះបើតាមរដ្ឋមន្ត្រីការបរទេសសហរដ្ឋអាមេរិក លោក Antony Blinken។
លោក Blinken បានថ្លែងក្នុងសន្និសីទកាសែតរួមគ្នាមួយ ជាមួយរដ្ឋមន្ត្រីការបរទេសអេហ្ស៊ីប លោក Badr Abdelatty ថា«ខ្ញុំគិតថាមានកិច្ចព្រមព្រៀងមួយដែលមាន១៨ កថាខ័ណ្ឌ។ ១៥កថាខ័ណ្ឌនៃកថាខ័ណ្ឌទាំងនោះត្រូវបានព្រមព្រៀងគ្នា។ ក៏ប៉ុន្តែ បញ្ហាដែលនៅសេសសល់ចាំបាច់ត្រូវតែដោះស្រាយ»។
លោក Abdelatty បានប្រាប់ពួកអ្នកយកព័ត៌មានតាមរយៈអ្នកបកប្រែថា ក្រុមហាម៉ាស់បានបញ្ជាក់នូវការតាំងចិត្តដ៏ពេញទំហឹងរបស់ខ្លួន ដល់កិច្ចព្រមព្រៀងឈប់បាញ់គ្នាដែលបានធ្វើឡើងនៅថ្ងៃទី២៧ ខែឧសភា និងការធ្វើវិសោធនកម្មដែលបានធ្វើឡើងនៅថ្ងៃទី២ ខែកក្កដា។
កាលពីថ្ងៃពុធម្សិលមិញ លោក Blinken និងលោក Abdelatty បានធ្វើការចរចាដែលក្នុងនោះពួកអស់លោកបានពិភាក្សាពីតម្រូវការបន្ទាន់សម្រាប់ការឈប់បាញ់គ្នាទាំងនៅក្នុងតំបន់ហ្កាហ្សា និងនៅប្រទេសស៊ូដង់។
ក្នុងខណៈស្ថិតនៅក្នុងរដ្ឋធានីគែរ លោក Blinken ក៏បានធ្វើការចរចាជាមួយប្រធានាធិបតីអេហ្ស៊ីបលោក Abdel Fattah el-Sissi ផងដែរ។
ការចរចាអស់រាប់សិបខែជាមួយពួកមន្ត្រីសហរដ្ឋអាមេរិក អេហ្ស៊ីបនិងកាតាដែលបានសម្របសម្រួលនៅមិនទាន់ធ្វើឱ្យមានកិច្ចព្រមព្រៀងសមរម្យមួយដល់អ៊ីស្រាអែល និងក្រុមហាម៉ាស់នៅឡើយទេ។ ការចរចាបានផ្តោតលើចំណុចសំខាន់មួយ ដែលរួមមានការឈប់បាញ់គ្នា ហើយនិងការដោះលែងចំណាប់ខ្មាំងដែលត្រូវបានឃុំឃាំងដោយពួកសកម្មប្រយុទ្ធហាម៉ាស់នៅក្នុងតំបន់ហ្កាហ្សានៅឡើយ។
សហរដ្ឋអាមេរិកមិនបានផ្តល់ពេលវេលាសម្រាប់សំណើមួយដែលត្រូវពិនិត្យមើលឡើងវិញ ថ្វីបើពួកមន្ត្រីបាននិយាយថា សំណើនោះនឹងត្រូវបានបង្ហាញនៅពេលឆាប់ៗ នេះ។
សហរដ្ឋអាមេរិក នឹងបន្តធ្វើការជាមួយប្រទេសនានាក្នុងតំបន់ ជាពិសេស អេហ្ស៊ីបនិងកាតា ចំពោះខ្លឹមសារនៃសំណើនោះ ដើម្បីធ្វើឱ្យប្រាកដថា វាអាចនាំឱ្យអ៊ីស្រាអែលនិងក្រុមហាម៉ាស់ឈានដល់«កិច្ចព្រមព្រៀងផ្តាច់ព្រាត់មួយ»។ នេះបើតាមក្រសួងការបរទេសសហរដ្ឋអាមេរិក៕
