ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

លោក​ Biden​ ជួប​​​សម្ដេច​ប៉ាប​និង​ពិភាក្សា​ជាមួយ​សម្ព័ន្ធមិត្ត​ដើម្បី​កម្ចាត់​ក្រុម​ភេរវកម្ម​រដ្ឋ​ឥស្លាម


រដ្ឋមន្ត្រី​ការ​បរទេស​​សហ​រដ្ឋអាមេរិក​លោក​ Antony Blinken ​ជួប​ជាមួយ​សម្ដេច​ប៉ាប​ Francis​ នៅ​បុរី​វ៉ាទីកង់​ កាល​ពី​​ថ្ងៃ​ច័ន្ទ​ទី​២៨ ខែ​មិថុនា ឆ្នាំ​២០២១ ក្នុង​អំឡុង​ទស្សនកិច្ច​នៅ​ទ្វីប​អឺរ៉ុប​ក្នុង​សប្តាហ៍​នេះ។

រដ្ឋមន្ត្រី​ការ​បរទេសសហ​រដ្ឋអាមេរិក​លោក​ Antony Blinken ​បាន​ជួប​ជាមួយ​សម្ដេច​ប៉ាប​ Francis​ និង​មន្ត្រី​ផ្សេងៗ​ទៀត​នៅ​បុរី​វ៉ាទីកង់​ដើម្បី​ពិភាក្សា​អំពី​បញ្ហា​អាកាសធាតុ​សិទ្ធិ​មនុស្ស ការ​ជួញ​ដូរ​មនុស្ស​និង​បញ្ហា​ផ្សេងៗ​ជា​ច្រើន​ទៀត។​

ដំណើរ​ទស្សនកិច្ច​នេះ​កើត​ឡើង​មុនជំនួប​នៅ​ខែ​តុលា​រវាង​សម្ដេច​ប៉ាប​និង​លោក​ប្រធានាធិបតី​Joe Biden​ដែល​ជា​អ្នក​កាន់​សាសនា​កាតូលិក​ទី​ពីរ​ដែល​បាន​ដឹក​នាំ​សហរដ្ឋ​អាមេរិក។​

នៅ​ថ្ងៃ​ចន្ទ​ដែរ​ លោក​ Blinken​ និង​រដ្ឋ​មន្ត្រី​ការ​បរទេស​អ៊ីតាលី​លោក​ Luigi Di Daio​ សហ​ប្រធាន​នៃ​កិច្ច​ប្រជុំ​ស្ដី​ពី​សម្ព័ន្ធ​សកល​ដើម្បី​កម្ចាត់​ក្រុម​រដ្ឋ​ឥស្លាម​ (ISIS) ​ដែល​មន្ត្រី​ក្រសួង​ការ​បរទេស​សហរដ្ឋ​អាមេរិក​បានឲ្យ​ដឹង​ថា​រដ្ឋមន្ត្រី​ទាំង​ពីរ​នឹង​ពិភាក្សា​អំពី​ការ​រក្សា​សម្ពាធ​លើ​ក្រុម​សកម្ម​ប្រយុទ្ធ​នៅ​ក្នុង​ប្រទេស​អ៊ីរ៉ាក់​និង​ប្រទេស​ស៊ីរី​ខណៈធ្វើការ​ដើម្បី​ប្រឆាំង​នឹង​សាខា​ផ្សេង​ទៀត​របស់​ក្រុម​នេះនៅ​លើ​ពិភព​លោក។​

លោក​ Partrick Worman​ នាយក​ស្ដីទី​នៃ​ការិយាល័យ​តំណាង​ពិសេស​សហ​រដ្ឋ​អាមេរិក​ដើម្បី​កម្ចាត់​ក្រុម​រដ្ឋ​ឥស្លាម​បាន​ប្រាប់​អ្នក​សារ​ព័ត៌មាន​ថាការផ្ដោត​ពិសេស​មួយ​នៃ​កិច្ច​ប្រជុំ​នេះ​គឺ​«បញ្ហា​ដែល​ពួក​រដ្ឋ​ឥស្លាម​បង្ក​ឡើងក្នុង​ទ្វីប​អាហ្រ្វិក»​ជា​ពិសេស​នៅ​អាហ្វ្រិក​ខាង​លិច​និង​តំបន់ ​Sahel។​

សហរដ្ឋ​អាមេរិក​បាន​ចាប់​ផ្ដើម​កិច្ច​ប្រឹង​ប្រែង​ចម្រុះ​មាន​គោលដៅ​កម្ចាត់​ក្រុម​ភេរវកម្ម​រដ្ឋ​ឥស្លាម​នៅ​ក្នុង​ឆ្នាំ​២០១៤​បន្ទាប់​ពី​ក្រុម​នេះ​បាន​ដណ្ដើម​កាន់កាប់​មួយ​ផ្នែក​ធំ​នៃ​ភាគខាង​ជើង​ប្រទេស​ស៊ីរី​និង​អ៊ីរ៉ាក់ ​ហើយ​កាល​ពី​ឆ្នាំ​២០១៩ ​បាន​ប្រកាស​ថា ក្រុមភេរវកម្ម​នេះ​ត្រូវ​បាន​បណ្ដេញ​ចេញ​ពី​តំបន់ដែល​ពួក​នេះ​កាន់​កាប់​ចុង​ក្រោយ។​

លោក ​Worman​ បាន​ប្រាប់​អ្នក​សារ​ព័ត៌មាន​ថា៖ «ក្រុម​រដ្ឋឥស្លាម​នៅ​តែ​ជា​សត្រូវ​ដ៏​គួរ​ព្រួយ​បារម្ភ។ មាន​កិច្ចការ​ជា​ច្រើន​ត្រូវ​ធ្វើ​នៅ​ក្នុង​ប្រទេស​អ៊ីរ៉ាក់​និង​ស៊ីរីកន្លែង​ដែល​ក្រុម​រដ្ឋឥស្លាម​បន្ត​វាយ​ប្រហារ​និង​សាប​ព្រោះ​ការ​ភ័យ​ខ្លាច​ដល់​ប្រជាជន​ក្នុង​ស្រុក»។​

លោក ​Worman ​បាន​និយាយ​ថា​ក្រុម​សម្ព័ន្ធ​មិត្ត​កំពុង​ធ្វើ​ការ​ជាមួយ​រដ្ឋាភិបាល​អ៊ីរ៉ាក់​ដើម្បី​កម្ចាត់​ទីតាំង​និង​ជម្រក​របស់​ក្រុម​រដ្ឋ​ឥស្លាម​កាត់ផ្ដាច់​ប្រព័ន្ធ​ផ្សព្វផ្សាយ​ហិរញ្ញវត្ថុ ​និង​បណ្ដាញ។​

លោក​ Blinken​ កំពុង​ធ្វើ​ទស្សនកិច្ច​ទៅ​កាន់​ប្រទេស​ជា​ច្រើន​នៅ​ក្នុង​តំបន់​អឺរ៉ុប​ដែល​ថ្ងៃនៅ​អង្គារ​លោក​នឹង​ទៅ​ដល់​ទីក្រុង ​Matera ​ប្រទេស​អ៊ីតាលី​សម្រាប់ជំនួប​កំពូល​រដ្ឋមន្ត្រី​ការ​បរទេស​របស់​បណ្ដា​ប្រទេស​G20។​របៀប​វារ:សម្រាប់​ការ​ពិភាក្សា​នោះ​រួម​មាន​ការ​រាតត្បាត​នៃ​ជំងឺ​កូវីដ​១៩​វិបត្តិ​នៃ​ការ​ប្រែ​ប្រួល​អាកាស​ធាតុ​និង​ការ​ងើប​ឡើង​វិញ​នៃ​សេដ្ឋកិច្ច​ប្រកប​ដោយ​សមធម៌៕

XS
SM
MD
LG