នៅក្នុងការថ្លែងតាមវីដេអូអនឡាញទៅកាន់ក្រុមប្រឹក្សាសិទ្ធិមនុស្សអង្គារសហប្រជាជាតិកាលពីថ្ងៃអង្គារ រដ្ឋមន្ត្រីការបរទេសសហរដ្ឋអាមេរិកលោក Antony Blinken បានព្រមានថា បញ្ហាសិទ្ធិមនុស្សនិងវិបត្តិមនុស្សធម៌ដែលកំពុងប៉ះពាល់ប្រទេសអ៊ុយក្រែននឹងកាន់តែអាក្រក់ជាងមុន ប្រសិនបើប្រធានាធិបតីរុស្ស៊ីលោក Vladimir Putin ទទួលបានជ័យជម្នះនៅក្នុងការផ្ដួលរំលំរដ្ឋាភិបាលដែលជ្រើសរើសតាមបែបប្រជាធិបតេយ្យរបស់ប្រទេសអ៊ុយក្រែន។
លោក Blinken និយាយដូច្នេះថា៖ «ចូរមើលលើតំបន់ Crimea ដែលនៅទីនោះ ការគ្រប់គ្រងរបស់រុស្ស៊ីបានបណ្ដាលឱ្យមានការសម្លាប់ក្រៅប្រព័ន្ធតុលាការ ការបាត់ខ្លួនដោយបង្ខំ ទារុណកម្ម ការឃុំខ្លួនដោយខុសច្បាប់ ការធ្វើទុក្ខបុកម្នេញលើជាតិសាសន៍ភាគតិចនិងអ្នកកាន់សាសនាភាគតិច និងការបង្ក្រាបដ៏ឃោរឃៅលើអ្នកប្រឆាំង។ ...សេចក្ដីរាយការណ៍អំពីការរំលោភបំពានរបស់រុស្ស៊ីលើសិទ្ធិមនុស្សនិងច្បាប់មនុស្សធម៌អន្តរជាតិកំពុងកើនឡើងជាបន្ត»។
ចាប់តាំងពីពេលដែលរុស្ស៊ីបានឈ្លានពានអ៊ុយក្រែនកាលពីប៉ុន្មានថ្ងៃមុនមក លោក Blinken បានកត់សម្គាល់ឃើញថា ការវាយប្រហាររបស់រុស្ស៊ីលើជនស៊ីវិលនិងហេដ្ឋារចនាសម្ព័ន្ធស៊ីវិលបានកើនឡើង។
លោកបានបញ្ជាក់ថា សាលារៀន មន្ទីរពេទ្យ និងអាគារស្នាក់នៅនានាគឺជាគោលដៅនៃការវាយប្រហារ។ លោកបានបន្ថែមថា រុស្ស៊ីបានបំផ្លាញហេដ្ឋារចនាសម្ព័ន្ធសំខាន់ៗដែលផ្ដល់ទឹកបរិភោគ ឧស្ម័ន និងអគ្គិសនីដល់ប្រជាពលរដ្ឋរាប់លាននាក់។
លោក Blinken បានលើកឡើងដូច្នេះថា៖ «ឧត្តមស្នងការសិទ្ធិមនុស្សអង្គការសហប្រជាជាតិបានបញ្ជាក់ថា ការវាយប្រហាររបស់រុស្ស៊ីបានធ្វើឱ្យជនស៊ីវិលយ៉ាងតិចរាប់រយនាក់បាត់បង់ជីវិត ដែលក្នុងនោះមានទាំងកុមារផងដែរ និងធ្វើឱ្យមនុស្សរាប់រយនាក់ទៀតរងរបួស។ អ្នកស្រីឧត្តមស្នងការក៏បាននិយាយផងដែរថា អ្នកស្រីរំពឹងថា តួលេខពិតប្រាកដគឺខ្ពស់ជាងនេះ។ ...អំពើហិង្សារបស់រុស្ស៊ីបានធ្វើឱ្យពលរដ្ឋអ៊ុយក្រែនជាង ៥ សែននាក់ភៀសខ្លួនពីប្រទេសនៅក្នុងរយៈពេលតែពីរបីថ្ងៃប៉ុណ្ណោះ។ កុមារ មនុស្សវ័យចំណាស់ មនុស្សពិការកំពុងធ្វើដំណើរដោយទុក្ខសោកឆ្លងកាត់តំបន់សង្គ្រាម»។
រដ្ឋាភិបាលរុស្ស៊ីបានទទូចកាលពីថ្ងៃអង្គារថា កងទ័ពរបស់រុស្ស៊ីមិនធ្វើការវាយប្រហារណាមួយលើហេដ្ឋារចនាសម្ព័ន្ធស៊ីវិលនិងតំបន់រស់នៅរបស់ប្រជាពលរដ្ឋនោះទេ។
ឧត្តមស្នងការអង្គការសហប្រជាជាតិទទួលបន្ទុកកិច្ចការជនភៀសខ្លួន (UNHCR) កំពុងរៀបចំសម្រាប់ឱ្យពលរដ្ឋអ៊ុយក្រែនរហូតដល់ ៤ លាននាក់ភៀសខ្លួនទៅកាន់ប្រទេសជិតខាងដើម្បីសុវត្ថិភាព។
មន្ត្រីទីភ្នាក់ងារ UNHCR បាននិយាយថា ស្ថានការណ៍នេះនឹងទំនងក្លាយជាវិបត្តិជនភៀសខ្លួនដ៏ធំបំផុតនៅទ្វីបអឺរ៉ុបនៅក្នុងសតវត្សរ៍នេះ។
លោក Blinken បានបញ្ជាក់ថា ការវាយប្រហាររបស់រុស្ស៊ីមិនមែនកើតឡើងតែនៅក្នុងប្រទេសអ៊ុយក្រែនប៉ុណ្ណោះទេ គឺកើតឡើងនៅក្នុងប្រទេសរុស្ស៊ីផ្ទាល់ផងដែរ ដោយរដ្ឋាភិបាលរុស្ស៊ីកំពុងបង្កើនការបង្ក្រាបរបស់ខ្លួននៅក្នុងប្រទេស។
លោកបានបន្តថា អ្នកការពារសិទ្ធិមនុស្ស អ្នកសារព័ត៌មាន អ្នកប្រឆាំងនយោបាយរបស់លោក Putin បានរងការយាយី ការគំរាមកំហែង ការបំពុល និងការដាក់ឃុំឃាំង អស់រយៈពេលជាយូរមកហើយ។
លោក Blinken បានលើកឡើងទៀតថា ឥឡូវនេះ រុស្ស៊ីក៏បានធ្វើទង្វើនេះលើពលរដ្ឋរបស់ខ្លួនដែលតវ៉ាដោយសន្តិវិធីប្រឆាំងនឹងការឈ្លានពានលើអ៊ុយក្រែនផងដែរ។ លោកបានបញ្ជាក់ថា មនុស្សរាប់ពាន់នាក់ត្រូវបានចាប់ខ្លួន ហើយប្រសិនបើនរណាម្នាក់ត្រូវបានអាជ្ញាធររុស្ស៊ីរកឃើញថាបានជួយដល់ប្រទេសក្រៅឬអង្គការបរទេសណាមួយ អ្នកនោះអាចជាប់ពន្ធនាគាររហូតដល់ ២០ ឆ្នាំ៕
ប្រែសម្រួលដោយលោក ឈឹម សុមេធ
