រដ្ឋមន្ត្រីការបរទេសសហរដ្ឋអាមេរិកលោក Antony Blinken កំពុងស្ថិតនៅក្នុងប្រទេសអារ៉ាប៊ីសាអូឌីតដើម្បីពិភាក្សាថ្នាក់តំបន់នៅថ្ងៃចន្ទនេះនិងថ្ងៃអង្គារស្អែកអំពីជំនួយមនុស្សធម៌នៅក្នុងតំបន់ហ្កាហ្សា (Gaza) ផែនទីបង្ហាញផ្លូវក្រោយសង្គ្រាមសម្រាប់ដែនដីប៉ាឡេស្ទីន និងស្ថិរភាពនិងសន្តិសុខនៅក្នុងតំបន់មជ្ឈិមបូព៌ា។
លោក Blinken នឹងចូលរួមនៅក្នុងកិច្ចប្រជុំថ្នាក់រដ្ឋមន្ត្រីរបស់ក្រុមប្រឹក្សាសហប្រតិបត្តិការបណ្ដាប្រទេសអារ៉ាប់ជាប់ឈូងសមុទ្រពែក្ស (GCC) ដែលធ្វើឡើងនៅក្នុងរដ្ឋធានីនៃប្រទេសអារ៉ាប៊ីសាអូឌីត។
កាលពីថ្ងៃអាទិត្យ ក្រសួងការបរទេសអាមេរិកបានប្រកាសថាលោក Blinken នឹងបន្តទស្សនកិច្ចរបស់លោកនៅតំបន់មជ្ឈិមបូព៌ារហូតដល់ថ្ងៃពុធខាងមុខ និងបន្ថែមការឈប់សំចតនៅក្នុងប្រទេសអ៊ីស្រាអែលនិងហ្ស៊កដានីបន្ទាប់ពីធ្វើទស្សនកិច្ចនៅអារ៉ាប៊ីសាអូឌីត។
លោក Blinken នឹងផ្ដោតលើកិច្ចប្រឹងប្រែងនៅក្នុងការសម្រេចឱ្យបាននូវបទឈប់បាញ់នៅក្នុងតំបន់ហ្កាហ្សា ដែលនឹងមានការដោះលែងចំណាប់ខ្មាំងនិងការធានាធ្វើយ៉ាងណាឱ្យជំនួយមនុស្សធម៌ដែលចូលទៅដល់តំបន់ហ្កាហ្សានៅបន្តទៅមុខឬក៏កើនឡើង។ នេះបើតាមការបញ្ជាក់របស់អ្នកនាំពាក្យក្រសួងការបរទេសអាមេរិកលោក Matthew Miller នៅក្នុងសេចក្ដីថ្លែងការណ៍មួយ។
កាលពីថ្ងៃអាទិត្យផងដែរ អ្នកនាំពាក្យផ្នែកសន្តិសុខជាតិនៃសេតវិមានលោក John Kirby បានបញ្ជាក់នៅក្នុងកម្មវិធី «This Week» របស់ទូរទស្សន៍ ABC ថា សហរដ្ឋអាមេរិកកំពុងបន្តជំរុញឱ្យមានបទឈប់បាញ់រយៈពេល ៦ សប្ដាហ៍នៅក្នុងសង្គ្រាមជិត ៧ ខែកន្លងមកក្នុងតំបន់ហ្កាហ្សារវាងអ៊ីស្រាអែលនិងក្រុមសកម្មប្រយុទ្ធហាម៉ាស់ (Hamas)។
ការពិភាក្សាអំពីបទឈប់បាញ់នេះបានបន្តធ្វើអស់រាប់ខែមកហើយ ហើយទោះបីជាមានសញ្ញាម្ដងហើយម្ដងទៀតថាកិច្ចព្រមព្រៀងនេះប្រហែលជាអាចសម្រេចបានក៏ដោយ ក៏លោក Kirby មិនបានផ្ដល់សញ្ញាណាមួយអំពីការវិវឌ្ឍថ្មីនៃការពិភាក្សានេះទេ។
លោក Kirby បាននិយាយថា អ៊ីស្រាអែលបានធានាចំពោះមន្ត្រីសហរដ្ឋអាមេរិកថាខ្លួននឹងមិនបញ្ជូនកងទ័ពជើងគោកចូលទៅក្នុងទីក្រុង Rafah នៅភាគខាងត្បូងតំបន់ហ្កាហ្សាដោយមិនខ្វល់ទាំងស្រុងអំពីក្ដីបារម្ភរបស់សហរដ្ឋអាមេរិកដែលថាការវាយប្រហារដូចនេះនឹងធ្វើឱ្យគ្រោះថ្នាក់ដល់ជីវិតរបស់ជនជាតិប៉ាឡេស្ទីនជាងមួយលាននាក់ដែលកំពុងជ្រកកោននៅទីនោះនោះទេ៕
វេទិកាបញ្ចេញមតិ