ស្របពេលដែលរដ្ឋបាលរបស់លោក Biden កំពុងព្យាយាមរកមធ្យោបាយដោះស្រាយ ភាពតានតឹងនិងអស្ថិរភាពដែលកំពុងកើនឡើងខ្លាំងក្នុងតំបន់មជ្ឈិមបូព៌ានោះ រដ្ឋមន្ត្រីការបរទេសអាមេរិក លោក Antony Blinken នឹងធ្វើដំណើរទៅកាន់តំបន់នេះជាលើកទី ៤ នៅចុងសប្តាហ៍នេះនៅក្នុងរយៈពេល ៣ ខែកន្លងទៅនេះ ដែលជាដំណើរមួយ ដែលត្រូវបានរំពឹងទុកថានឹងផ្តោតការពិភាក្សាភាគច្រើនបំផុតទៅលើការបារម្ភដែលថា សង្រ្គាមដែលកំពុងកើតឡើងរវាងប្រទេសអ៊ីស្រាអែលនិងក្រុមហាម៉ាស់ អាចក្លាយជាជម្លោះរីករាលដាលដ៏ធំមួយ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP ។
រដ្ឋបាលរបស់លោក Biden ធ្លាប់គិតថាវាមិនអាចក្លាយជារឿងធំដុំអ្វីទេ ដែលសង្គ្រាមក្នុងតំបន់មជ្ឈិមបូព៌ានេះនឹងក្លាយជាជម្លោះរីករាលដាលនោះ បន្ទាប់ពីអ៊ីស្រាអែលបានឆ្លើយតបភ្លាមៗទៅនឹងការវាយប្រហារដ៏ប្រល័យរបស់ក្រុមហាម៉ាស់លើប្រទេសអ៊ីស្រាអែល កាលពីថ្ងៃទី ៧ ខែតុលាមក។ ប៉ុន្តែអស់រយៈពេល ២ ខែកន្លះកន្លងទៅ លទ្ធភាពនៃការរីករាលដាលនៃសង្រ្គាមមួយនេះទៅក្នុងតំបន់កំពុងតែមានសញ្ញាកើនខ្លាំងឡើងៗ។
ក្រសួងការបរទេសសហរដ្ឋអាមេរិកនិយាយថា លោក Blinken នឹងធ្វើដំណើរទៅកាន់ប្រទេសតួកគី ក្រិក ហ៊្សកហ្ស៊ី កាតា អេមីរ៉ាតអារ៉ាប់រួម អារ៉ាប់ប៊ីសាអូឌីត អ៊ីស្រាអែល តំបន់ West Bank និងប្រទេសអេហ្ស៊ីបផងដែរ។
រដ្ឋមន្ត្រីការពារជាតិអ៊ីស្រាអែលកាលពីថ្ងៃព្រហស្បតិ៍ម្សិលមិញបានប្រកាសពីផែនការរបស់ប្រទេសខ្លួន សម្រាប់ដំណាក់កាលថ្មីនៅក្នុងសង្គ្រាមដែលកំពុងកើតឡើងក្នុងតំបន់ហ្កាហ្សា ដែលរួមមានយុទ្ធសាស្ត្រលើគោលដៅបន្ថែមជាច្រើនទៀត នៅក្នុងតំបន់ហ្កាហ្សាភាគខាងជើង។
រដ្ឋមន្ត្រីការពារជាតិអ៊ីស្រាអែលលោក Yoav Gallant និយាយថា យុទ្ធសាស្ត្រនេះត្រូវបានកំណត់ ដែលរួមមានការវាយឆ្មក់ចូល ការបំផ្លាញរូងក្រោមដី ការវាយប្រហារតាមអាកាសនិងថ្មើរជើង ក៏ដូចជាប្រតិបត្តិការដោយកងកម្លាំងពិសេសផងដែរ។
ការប្រកាសនេះកើតមានឡើង ខណៈពេលដែលមានសម្ពាធអន្តរជាតិកាន់តែខ្លាំងឡើង ដែលរួមមានពីសហរដ្ឋអាមេរិកផងដែរ ឱ្យអ៊ីស្រាអែលលៃលកបន្ធូរដៃក្នុងការប្រយុទ្ធដ៏ខ្លាំងរបស់ខ្លួន៕
វេទិកាបញ្ចេញមតិ