ម្តាយនិងឪពុកមារបស់ទាហានសហរដ្ឋអាមេរិកម្នាក់មានសុវត្ថិភាពនៅខាងក្រៅតំបន់ហ្កាហ្សាបន្ទាប់ពីបានត្រូវជួយសង្គ្រោះពីការប្រយុទ្ធនៅក្នុងកិច្ចប្រតិបត្តិការសម្ងាត់មួយដែលត្រូវបានសម្របសម្រួលដោយសហរដ្ឋអាមេរិក អ៊ីស្រាអែល អេហ្ស៊ីបនិងប្រទេសផ្សេងទៀត។ នេះបើតាមមន្ត្រីសហរដ្ឋអាមេរិកម្នាក់ដែលបានប្រាប់ទីភ្នាក់ងារសារព័ត៌មាន AP កាលពីថ្ងៃពុធម្សិលមិញ។
វាជាកិច្ចប្រតិបត្តិការមួយដែលគេដឹងឮដែលបានជួយសង្គ្រោះពលរដ្ឋអាមេរិកាំងនិងសមាជិកក្រុមគ្រួសាជិតស្និទ្ធក្នុងអំឡុងពេលនៃការប្រយុទ្ធថ្មើជើងដ៏ប្រល័យអស់ជាច្រើនខែ និងការវាយប្រហារតាមអាកាសរបស់អ៊ីស្រាអែលនៅក្នុងតំបន់ហ្កាហ្សា។ មនុស្សភាគច្រើនដែលបានចេញពីតំបន់ភាគខាងជើងនិងកណ្តាលតំបន់ហ្កាហ្សាកាត់តាមចំណុចឆ្លងកាត់ Rafah ចូលក្នុងប្រទេសអេហ្ស៊ីបបានរត់គេចចេញទៅតំបន់ភាគខាងត្បូងក្នុងប៉ុន្មានសប្តាហ៍មុននៃសង្គ្រាម។ ការរត់គេចចេញពីទឹកដីប៉ាឡេស្ទីនកាត់តាមកន្លែងដែលមានការប្រយុទ្ធគ្នាដ៏ខ្លាំងកាន់តែគ្រោះថ្នាក់និងកាន់តែលំបាកឡើងចាប់តាំងពីពេលនោះមក។
អ្នកស្រី Zahra Sckak អាយុ៤៤ឆ្នាំ បានចាកចេញពីតំបន់ហ្កាហ្សានៅថ្ងៃបុណ្យចូលឆ្នាំថ្មី រួមជាមួយបងប្អូនប្រុសថ្លៃរបស់អ្នកស្រីឈ្មោះ Farid Sukaik ជាពលរដ្ឋអាមេរិកាំង។ នេះបើតាមមន្ត្រីសហរដ្ឋអាមេរិកដែលបានប្រាប់ទីភ្នាក់ងារសារព័ត៌មាន AP។ មន្ត្រីរូបនោះបានថ្លែងក្នុងលក្ខខណ្ឌមិនបញ្ចេញឈ្មោះដើម្បីបញ្ជាក់ពីការជួយសង្គ្រោះនេះដែលបានរក្សាការសម្ងាត់ដោយមូលហេតុសន្តិសុខ។
លោក Abedalla Sckak ដែលជាស្វាមីរបស់អ្នកស្រី Sckak ត្រូវបានគេបាញ់កាលពីដំបូងនៅក្នុងសង្គ្រាមរវាងអ៊ីស្រាអែលនិងក្រុមហាម៉ាស់ នៅពេលដែលក្រុមគ្រួសារបានរត់គេចចេញពីអគារមួយកន្លែងដែលរងការវាយប្រហារពីការវាយប្រហារតាមអាកាស។ លោកបានស្លាប់ប៉ុន្មានថ្ងៃក្រោយមក។ កូនប្រុសម្នាក់ក្នុងចំណោមកូនប្រុស ៣ នាក់របស់អ្នកស្រីមានឈ្មោះ Ragi A. Sckak អាយុ២៤ឆ្នាំ បានធ្វើជាទាហានថ្មើជើងនៅក្នុងកងទ័ពសហរដ្ឋអាមេរិក។
កិច្ចប្រតិបត្តិការសម្ងាត់នេះមានការទាក់ទិននឹងទាហានអ៊ីស្រាអែលនិងមន្ត្រីអ៊ីស្រាអែលក្នុងមូលដ្ឋាន ដែលត្រួតពិនិត្យតំបន់ហ្កាហ្សានិងតំបន់ West Bank ដែលត្រួតត្រាដោយអ៊ីស្រាអែល។ នេះបើតាមមន្ត្រីម្នាក់របស់សហរដ្ឋអាមេរិក។ មិនមានការចង្អុលបង្ហាញថា មន្ត្រីអាមេរិកាំងពាក់ព័ន្ធកិច្ចប្រតិបត្តិការក្នុងតំបន់ហ្កាហ្សាទេ៕
វេទិកាបញ្ចេញមតិ