ប្រធានាធិបតីសហរដ្ឋអាមេរិកលោក Joe Biden បានទៅដល់ប្រទសបារាំងហើយកាលពីថ្ងៃពុធនេះ ដើម្បីចូលរួមក្នុងទិវារម្លឹកខួបទី៨០ឆ្នាំនៃការវាយលុកចូលក្នុងតំបន់ Normandy ក្នុងប្រទេសបារាំង ក្នុងសម័យសង្គ្រាមលោកលើកទី២ ដោយលោក Biden នឹងមានគម្រោងប្រើប្រាស់ឱកាសនោះ ដើម្បីបញ្ជាក់ឡើងវិញពីភាពចាំបាច់ដ៏រឹងមាំមួយនៃសម្ព័ន្ធភាពឆ្លងមហាសមុទ្រអាត្លង់ទិក នៅចំពោះមុខនៃសង្គ្រាមឈ្លានពានរបស់រុស្ស៊ីនៅក្នុងប្រទេសអ៊ុយក្រែន។
លោកBiden នឹងជួបជាមួយប្រធាធិបតីអ៊ុយក្រែន និងក្រុមទាហានជើងចាស់អាមេរិកាំង ដែលនៅរស់រានមានជីវិត នៅក្នុងការវាយប្រហារឡើងច្រាំងក្នុងឆ្នាំ១៩៤៤។ នេះបើតាមការបញ្ជាក់របស់ទីប្រឹក្សាសន្តិសុខជាតិសហរដ្ឋអាមេរិកលោក Jake Sullivan។ លោកបន្តទៀតថា លោកBiden ក៏នឹងប្រើប្រាស់ព្រឹត្តិការណ៍នោះ ដើម្បី«និយាយពីការធ្វើពលិកម្មរបស់ក្រុមវីរជននិងក្រុមទាហានជើងចាស់ទាំងនោះកាលពី៨០ឆ្នាំកន្លងទៅ ដោយភ្ចាប់ទិដ្ឋភាពសង្គ្រាមក្នុងទ្វីបអឺរ៉ុបនាពេលបច្ចុប្បន្ននេះ និងពីកាតព្វកិច្ចរបស់យើងយ៉ាងដូចម្តេចខ្លះ ក្នុងការបន្តបេសកកម្មរបស់ពួកគេក្នុងការប្រយុទ្ធដើម្បីសេរីភាព»។
លោកSullivan ដែលបានថ្លែងប្រាប់ក្រុមអ្នកសារព័ត៌មាននៅលើយន្តហោះប្រធានាធិបតីAir Force One នៅតាមផ្លូវទៅកាន់ប្រទេសបារាំងនោះថា លោក Biden ក៏នឹងថ្លែងសុន្ទរកថាមួយនៅថ្ងៃស្អែកនេះនៅក្នុងតំបន់ Normandy ដែលនិយាយពីការប្រយុទ្ធដែលកើតមានឡើងរវាងអំណាចផ្តាច់ការនិងសេរីភាព ខណៈសម្លឹងមើលពីលើទីចំណោតកម្ពស់៣០ម៉ែត្រ ដែលក្រុមទាហានល្បាតត្រូវរត់គេចលូនពីគ្រាប់កាំភ្លើងរបស់សត្រូវ ដើម្បីយកឈ្នះក្នុងសមរភូមិប្រយុទ្ធ ដែលនាំទៅដល់ការរំដោះបានប្រទេសបារាំងទាំងស្រុង និងការបរាជ័យសាបសូន្យរបស់ក្រុមណាហ្ស៊ីអាល្លឺម៉ង់ផងដែរ។
លោកBiden ក៏នឹងធ្វើទស្សនកិច្ចផ្លូវរដ្ឋមួយ ដែលរៀបចំឡើងដោយប្រធានាធិបតីបារាំង លោក Emmanuel Macron ផងដែរ បន្ថែមពីលើការជួបទល់មុខគ្នាជាមួយប្រធានាធិបតីអ៊ុយក្រែនលោក Volodymyr Zelenskyy ដែលត្រូវបានអញ្ជើញឱ្យចូលរួមនៅក្នុងពិធីរម្លឹកខួបលើកទី៨០នៃសមរភូមិផ្តាច់ព្រ័តមួយនេះ ដែលឈានទៅបញ្ចប់សង្គ្រាមលោកលើកទី២នោះ៕
អ្នកស្រី Patsy Widakuswara ផ្តល់ព័ត៌មានបន្ថែមពីសេតវិមាន
