ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

លោក Biden អតីតអនុប្រធានាធិបតីអាមេរិកបាននាំមុខក្នុងការប្រកួតប្រជែងបឋមខាងគណបក្សប្រជាធិបតេយ្យ


Biden Surges Into Lead in Democratic Primary Race
សូម​រង់ចាំ

No media source currently available

0:00 0:03:14 0:00
ទាញ​យក​ពី​តំណភ្ជាប់​ដើម

លោក Joe Biden អតីត​អនុ​ប្រធានា​ធិបតី​សហរដ្ឋ​អាមេរិក បាន​នាំ​មុខ​​នៅ​ក្នុង​ការ​ប្រកួត​ប្រជែង​បេក្ខជន​ប្រធានា​ធិបតី​ខាង​គណបក្ស​ប្រជាធិប​​តេយ្យ។

លោក Joe Biden អតីត​អនុ​ប្រធានា​ធិបតី​សហរដ្ឋ​អាមេរិក បាន​នាំ​មុខនៅ​ក្នុង​ការ​ប្រកួត​ប្រជែង​បេក្ខជន​ប្រធានា​ធិបតី​ខាង​គណបក្ស​ប្រជាធិបតេយ្យ។ នេះ​តាម​ការស្ទង់​មតិ​ថ្មី​ដែល​បាន​ចេញផ្សាយ​ចាប់​តាំង​ពី​ការ​ប្រកាសឈរ​ឈ្មោះ​ជា​ផ្លូវ​ការ​របស់​លោក​កាល​ពី​សប្តាហ៍មុន។ លោក Biden កំពុង​តទល់​ដោយ​ផ្ទាល់ជាមួយ​ប្រធានា​ធិបតី​ដូណាល់ ​ត្រាំ​នៅ​ក្នុង​យុទ្ធនាការឃោសនា​ប្រធា​នាធិបតី​មុន​ដំបូង​របស់​លោក។​

លោក Joe Biden អតីត​អនុប្រធានា​ធិបតី​សហរដ្ឋ​អាមេរិក បាន​ទទួល​បដិសណ្ឋា​រកិច្ច​ដ៏កក់ក្តៅ​មួយ​កាលពី​ថ្ងៃ​ចន្ទ​នៅឯ​យុទ្ធនាការ​ឃោសនា​បោះឆ្នោត​លើក​ដំបូង​របស់​លោក​ក្នុង​ទីក្រុង Pittsburg រដ្ឋ Pennsylvania។

ហើយ​លោក Biden ប្រាកដ​ណាស់​ថា ​លោក ​នឹង​ដៅ​លើ​អ្វីដែល​លោក​និយាយ​ថា គឺ​លោក​ដូណាល់ ​ត្រាំ ប្រធានា​ធិបតី​ដែល​នាំឲ្យ​មាន​ការបែកបាក់។ លោក Biden បាន​និយាយ​ថា៖ «យើង​ត្រូវតែ​ធ្វើ​ឲ្យ​ពួកគេ​ដឹង​ថា តើ​យើង​ជា​នរណា។ យើង​ជាអ្នក​ប្រជា​ធិបតេយ្យនិង​ជាអ្នកឯករាជ្យ​ដែល​មាន​ទស្សនៈដូចគ្នាត្រូវតែ​ជ្រើសរើស​ក្តី​សង្ឃឹម​ជា​ជាង​ការ​ភ័យខ្លាច ​សាមគ្គីភាព​ជាជាងការ​ភ័យ​ខ្លាច ​ហើយ​ប្រហែល​សំខាន់​បំផុតគឺ​ការ​ពិត​ជាជាង​ការភូតកុហក»។

ពួក​អ្នក​គាំទ្រ​លោក Biden បាន​ចេញ​ទៅ​មុនគេ​ដើម្បី​ចូលរួម​យុទ្ធនាការ​ឃោសនា​នោះ ​រួមទាំង​អ្នក​ស្រី Marsha Williams។ អ្នកស្រី​និយាយ​ថា៖ «ខ្ញុំ​គិត​ថា លោក Joe Biden ជា​មនុស្ស​ម្នាក់​ដែល​មាន​បទ​ពិសោធន៍ ហើយ​ខ្ញុំ​គិត​ថា លោក​ជា​មនុស្ស​ល្អ​និងមាន​ការ​ស្មោះ​ត្រង់។ ហើយការណ៍នេះមានន័យ​យ៉ាង​ខ្លាំង​បំផុត​សម្រាប់​ខ្ញុំ»។

​ប្រធានា​ធិបតី​ត្រាំ ​ក៏​មានការ​មមាញឹក​អំពី​យុទ្ធនាការ​ឃោសនា​បោះឆ្នោត​ដែរ។ នៅឯការ​ប្រជុំ​មហាជន​មួយ​ក្នុង​រដ្ឋ Wisconsin លោក​ត្រាំ បាន​ចាប់​ផ្តើម​វាយ​ប្រ​ហារខ្លាំង​ៗ​ប្រឆាំង​នឹង​ពួក​គណបក្ស​ប្រជាធិបតេយ្យ។ ប្រធានា​ធិបតី​ត្រាំ​បាន​ថ្លែង​ថា៖ «ពួក​ប្រជា ធិបតេយ្យ​នៅពេល​ឥឡូវនេះ​ជា​គណបក្ស​ដែល​យក​ពន្ធដារ​ខ្ពស់ មាន​ឧក្រិដ្ឋកម្ម​ច្រើន​ក្នុង​ប្រទេស បើក​ចំហរ​ព្រំដែន គាំទ្រ​ការ​ពន្លូត​កូន​និង​បោក​បញ្ឆោត។ ពួក​សាធារណរដ្ឋ​ជា​គណបក្ស​សម្រាប់​ពលរដ្ឋ​អាមេរិកាំង​ទាំងអស់។ នេះ​ជា​ការ​ពិត។ ហើយ​នេះជា​សុភវិនិច្ឆ័យ»។

ប្រធានា​ធិបតី​ត្រាំ បាន​រិះគន់​លោក Biden​ នៅ​លើ​ប្រព័ន្ធ Twitter ហើយ​ដូចជា​សង្កត់​ពី​អាយុ​របស់​លោក Biden ទោះបី​លោក​ទាំង២​មាន​អាយុ៧០​ឆ្នាំ​ប្លាយដូច​គ្នាក៏ដោយ។​ប្រធានា​ធិបតី​ត្រាំ​បាន​ថ្លែង​ថា៖ «ខ្ញុំនៅ​ក្មេង ​មាន​ភាពរហ័ស​រហួន មើល​លោក Joe ចុះ។ ខ្ញុំមិនដឹង​អំពី​លោក Joe ទេ។​ ខ្ញុំ​មិន​ដឹង​ពី​លោក​ទេ។​ ខ្ញុំមិន​ដឹង​ទេ»។

លោក Biden នៅ​ពេល​បច្ចុប្បន្ន​នេះ​កំពុង​នាំមុខ​គូ​ប្រជែង​១៩​នាក់ផ្សេងទៀត​ខាងគណ បក្ស​ប្រជា​ធិបតេយ្យ ​ដោយសមាជិក​ព្រឹទ្ធសភា​រដ្ឋ Vermont លោក Bernie Sanders នៅ​បន្ទាប់​លោក។

លោក Sanders ស្ថិត​នៅ​ក្នុង​ចំណោម​អ្នក​ប្រជាធិបតេយ្យ​ដែល​ជជែក​ឲ្យ​ហេតុផល​ថា ​ប្រទេស​អាមេរិក ចាំបាច់​ធ្វើ​ការ​ផ្លាស់ប្តូរ​ទាំងស្រុង។ សមាជិក​ព្រឹទ្ធ​សភា Bernie Sanders និយាយ​ថា៖ «​កិច្ចការ​របស់​យើង ​មិន​ត្រឹម​តែ​កាន់កាប់​សេតវិមាន​ទេ។ យើង​ត្រូវតែ​ផ្លាស់​ប្តូរ​សេដ្ឋកិច្ច​និង​រដ្ឋាភិបាល​របស់​ប្រទេស​នេះ»។

លោក ​Matt Dallek បាន​និយាយថា រហូតមក​ទល់​ពេល​នេះ គូ​ប្រកួត​ប្រជែង​ខាង​គណ បក្ស​ប្រជា​ធិបតេយ្យរបស់​លោក Biden មិន​បាន​បង្ហាញការ​ភិត​ភ័យ​ដល់​ការនាំ​មុខ​របស់​លោក​ទេ។ លោកMatt Dallek នៃ​សាកល​វិទ្យាល័យ George Washington និយាយ​ថា៖ «ការ​ប្រកួត​ប្រជែង​នេះ ​នៅមាន​ភាពវែង​ឆ្ងាយ​តទៅ​ទៀត។ ហើយដូចជា​លោក អ្នក​ដឹង​ហើយ​ថា ​ចំពោះ​លោក Biden វា​នៅ​ឆាប់​ពេក​ចំពោះ​ការស្ទង់​មតិ​ថា លោក បាន​ទទួល​ការគាំទ្រ​ទៅ​ដល់​កម្រិត​ហ្នឹង គឺ​អាច​ត្រឹម​តែបាន​និយាយ​ថា​កេរ្តិ៍​ឈ្មោះ​របស់​លោកល្អនិង​មាន​ការ​ស្រឡាញ់​ចូលចិត្ត​លោក​ប៉ុណ្ណោះ»។

ពួក​គណបក្ស​ប្រជា​ធិបតេយ្យ ​អាច​ជ្រើសរើស​បេក្ខជនម្នាក់​មក​ពី​បេក្ខជន​ដែល​មានបទ​ពិសោធន៍​និងជាតិ​សាសន៍​ចម្រុះ​សម្រាប់​ឆ្នាំ​២០២០​ដែល​រួមមានអ្នក​ប្រកួត​ប្រជែង​ភេទ​ស្រី​និង​ជន​ជាតិ​ភាគ​តិច។

លោក Bill Sweeney ជា​អ្នក​ជំនាញ ​និយាយថា ក៏ប៉ុន្តែ ​គណបក្ស​ប្រជាធិបតេយ្យ ​ក៏​កំពុងស្វែងរក​បេក្ខជន​ខ្លាំង​ម្នាក់ដើម្បី​ប្រកួត​ជាមួយ​លោក​ត្រាំ​ដែរ។ លោក Sweeney នៃ​សាកល​វិទ្យាល័យ American University និយាយ​ថា៖ «​យើង ​មាន​បេក្ខជន​ប្រកួត​ប្រជែង​ចម្រុះសាសន៍ច្រើនជាទីបំផុត​នៅ​ក្នុង​ប្រវត្តិ​សាស្រ្ត​របស់​ប្រ​ទេស​យើង ​ហើយ​អ្នក​បោះឆ្នោត​គណបក្ស​ប្រជាធិបតេយ្យ ​មាន​បេក្ខជន​ជាច្រើន​ដើម្បី​ជ្រើស​រើស។​សំណួរ​ផ្សេង​ទៀត​ដែល​ពួក​គណបក្ស​ប្រជា​ធិបតេយ្យ ​នឹង​ត្រូវ​ពិនិត្យ​មើលនៅពេល​ដែល​បេក្ខជន​ប្រកួត​ប្រជែង​ក្នុងការ​បោះឆ្នោត​បឋម​គឺ​ថា ​តើ​បេក្ខ​ជននោះ ​អាច​ផ្តួល​ប្រធានា​ធិបតី​ត្រាំ​នៅ​ឆ្នាំ​២០២០​ដែរឬទេ?»។

រហូតមក​ទល់​ពេល​នេះ ​ពួក​អ្នក​បោះឆ្នោត​ខាង​គណបក្ស​ប្រជាធិបតេយ្យ​ជា​ច្រើន​ដែល​សួរ​សំណួរ​នោះ ទំនង​ជា​ចូល​ចិត្ត​លោក​ Biden ជាង ហើយ​ពួក​អ្នក​វិភាគ ​និយាយ​ថា ​នេះ​ជាហេតុផល​ដ៏​សំខាន់​មួយសម្រាប់ការកើន​ឡើង​ការគាំទ្រលោកនៅ​ក្នុងការ​ស្ទង់​មតិ​នោះ៕

ប្រែ​សម្រួលដោយ​ជឹង ​ប៉ូជីន

XS
SM
MD
LG