លោក John Hickenlooper អតីតអភិបាលរដ្ឋ Colorado និងលោក Jay Inslee អភិបាលរដ្ឋ Washington គឺជាសមាជិកគណបក្សប្រជាធិបតេយ្យពីរនាក់ថ្មីទៀត ដែលប្រកាសចូលរួមប្រកួតឈរឈ្មោះជាបេក្ខជនប្រធានាធិបតីសម្រាប់ការបោះឆ្នោតឆ្នាំ ២០២០ ខាងមុខនេះ។
ប៉ុន្តែ សមាជិកគណបក្សប្រជាធិបតេយ្យភាគច្រើននៅតែឆ្ងល់អំពីបុរសម្នាក់ដែលមិនទាន់ហក់ចូលក្នុងការប្រកួតនេះនៅឡើយ ដែលនោះគឺអតីតអនុប្រធានាធិបតីអាមេរិកលោក Joe Biden។
ឥឡូវនេះអ្នកប្រកាសចូលរួមប្រកួតឈរឈ្មោះជាបេក្ខជនប្រធានាធិបតីខាងគណបក្សប្រជាធិបតេយ្យមានចំនួន១២នាក់ហើយ។ ចំណែកឯលោក Biden និងសមាជិកគណបក្សប្រជាធិបតេយ្យមួយចំនួនទៀតកំពុងពិចារណាថា តើនឹងប្រកាសចូលរួមឬក៏យ៉ាងណានៅក្នុងរយៈពេលប៉ុន្មានសប្ដាហ៍ខាងមុខ ឬក៏ប៉ុន្មានខែខាងមុខនេះ។
លោក Sherrod Brown សមាជិកព្រឹទ្ធសភាខាងគណបក្សប្រជាធិបតេយ្យប្រចាំរដ្ឋ Ohio និងលោក Beto O'Rourke អតីតសមាជិករដ្ឋសភាខាងគណបក្សប្រជាធិបតេយ្យប្រចាំរដ្ឋ Texas គឺស្ថិតក្នុងចំណោមអ្នកដែលកំពុងពិចារណាចូលរួមឈរឈ្មោះបោះឆ្នោតប្រធានាធិបតីនៅឆ្នាំ ២០២០ ខាងមុខនេះ។
បេក្ខជនដែលអាចទៅរួចមួយចំនួនទៀត ដែលបានប្រកាសមិនចូលរួមមានដូចជាលោក Eric Holder អតីតរដ្ឋមន្ត្រីក្រសួងយុត្តិធម៌ លោក Michael Bloomberg អតីតអភិបាលក្រុង New York លោក Jeff Merkley សមាជិកព្រឹទ្ធសភាប្រចាំរដ្ឋ Oregon និងអ្នកស្រី Hillary Clinton បេក្ខជនប្រធានាធិបតីអាមេរិកឆ្នាំ ២០១៦។
ចំណែកឯលោក Biden វិញ កាលពីសប្ដាហ៍មុន លោក «ជិត» ឈានដល់ការសម្រេចចិត្តចូលរួមប្រកួតឈរឈ្មោះជាបេក្ខជនប្រធានាធិបតី ដោយលោកបាននិយាយថា មានការ «ឯកភាពគ្នា» ក្នុងក្រុមគ្រួសាររបស់លោកដែលគាំទ្រលោកឲ្យចូលរួមប្រកួតឈរឈ្មោះជាប្រធានាធិបតីជាលើកទី ៣៕
