ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក Biden និង​លោក​ Putin​ ចាប់​ផ្តើម​​ពិភាក្សា​​គ្នា​នៅ​ទីក្រុង​ហ្សឺណែវ​


លោក​ប្រធានាធិបតីរុស្ស៊ី​ Vladimir Putin ចាប់​ដៃ​ជាមួយ​លោក​ប្រធានាធិបតី​អាមេរិក​ Joe Biden នៅ​មុន​កិច្ចប្រជុំ​នៅ​វិមាន Villa la Grange ក្នុង​ទីក្រុង​ហ្សឺណែវ ប្រទេស​ស្វ៊ីស នៅ​ថ្ងៃ​ពុធ​​ទី​១៦ ខែ​មិថុនា ឆ្នាំ​២០២១ នេះ។

លោក​ប្រធានាធិបតី​អាមេរិក​ Joe Biden ​និង​លោក​ប្រធានាធិបតីរុស្ស៊ី​ Vladimir Putin ទើបបាន​ចាប់​ផ្តើម​ការ​ពិភាក្សា​គ្នា​នៅ​ថ្ងៃ​ពុធ​នេះ​នៅ​ទីក្រុង​ហ្សឺណែវ ​ដោយ​ភាគី​ទាំងពីរ​បង្ហាញ​ពីការ​រំពឹង​តិចតួច​ចំពោះ​កិច្ច​ព្រម​ព្រៀង​សំខាន់ៗ។​

មន្រ្តី​សហ​រដ្ឋអាមេរិក​និង​រុស្ស៊ី​បាន​និយាយ​ថា​ទំនង​ជា​នឹង​មាន​ការ​ពិភាក្សារយៈ​ពេល​ពី​៤​ទៅ​៥​ម៉ោង។​របៀបវារៈ​នៃ​កិច្ច​ពិភាក្សារួម​មាន​ជំនួប​វគ្គ​ដំបូង​របស់​មេដឹកនាំ​ទាំង​ពីរ​ដោយ​មាន​រដ្ឋមន្ត្រី​ការ​បរទេស​អាមេរិក​លោក ​Antony Blinken ​និង​រដ្ឋមន្ត្រី​ការ​បរទេស​រុស្ស៊ី​លោក​Sergei Lavrov ចូលរួម​ដែរ​ហើយ​បន្ទាប់​មក​នឹង​មាន​ក្រុម​ពិភាក្សា​បន្ថែម​ទៀត។

មន្ត្រី​ជាន់ខ្ពស់​ក្នុង​រដ្ឋបាល​លោក​Biden​ម្នាក់​បាន​ប្រាប់​អ្នក​សារ​ព័ត៌មាន​ពេល​ធ្វើ​ដំណើរ​ទៅ​កាន់​ទីក្រុង​ហ្សឺណែវ​ថា​លទ្ធផល​ដ៏មាន​សក្តានុពល​មួយ​សម្រាប់​ការ​ពិភាក្សា​ថ្ងៃ​ពុធ​នេះ​គឺ​ការ​អនុញ្ញាត​ឲ្យ​ឯកអគ្គរដ្ឋទូត​របស់​ប្រទេស​នីមួយៗ​ទៅ​បំពេញ​ការងារ​ឡើង​វិញ។​

ឯកអគ្គ​រដ្ឋទូត​សហរដ្ឋ​អាមេរិក​លោក​ John Sullivan ​និង​ឯក​អគ្គរដ្ឋទូត​រុស្ស៊ី​លោក​Anatoly​Antonov ​បាន​វិល​ត្រឡប់​ទៅ​មាតុភូមិ​វិញ​នៅ​ដើម​ឆ្នាំ​នេះ​ចំ​ពេល​ដែល​ទំនាក់​ទំនង​រវាង​សហ​រដ្ឋ​អាមេរិក​និង​រុស្ស៊ី​កាន់តែ​អាក្រក់។​ឯកអគ្គរដ្ឋទូត​ទាំង​ពីរ​គ្រោង​នឹង​ទៅ​ក្រុង​ហ្សឺណែវ​នៅ​ថ្ងៃពុធ​នេះ។​

មន្ត្រី​រដ្ឋបាល​ជាន់ខ្ពស់​របស់​សហ​រដ្ឋ​អាមេរិក​បាន​និយាយ​ថា​គោលដៅ​របស់​លោក ​Biden​រួមមានវិស័យ​ដែល​សហរដ្ឋ​អាមេរិក​និង​រុស្ស៊ី​អាច​ធ្វើការ​ជាមួយ​គ្នា​និង​បញ្ជាក់​ពីផល​ប្រយោជន៍​ជាតិ​ដ៏​សំខាន់​របស់​សហ​រដ្ឋ​អាមេរិក​និង​ថា​«សកម្មភាព​របស់​រុស្ស៊ីប្រឆាំង​នឹង​ផល​ប្រយោជន៍​ទាំងនោះ​នឹង​ត្រូវ​ឆ្លើយ​តប»​ហើយនឹង​បង្ហាញ​«ចក្ខុវិស័យ​របស់​លោក​សម្រាប់​គុណតម្លៃ​របស់​អាមេរិក​និង​អាទិភាព​ជាតិ​របស់​យើង»។​

ការ​ប្រជុំ​នេះធ្វើ​ឡើង​ក្នុង​រយៈ​ពេល​ប៉ុន្មាន​ម៉ោង​ចុងក្រោយ​នៃ​ដំណើរ​ទស្សនកិច្ច​លើក​ដំបូង​របស់​លោក​Biden​នៅ​បរទេស​ក្នុង​នាម​ជា​ប្រធានាធិបតី។​ក្នុង​អំឡុង​ពេល​មួយ​សប្តាហ៍​កន្លង​មកនេះ​លោក​បាន​ចូលរួម​ក្នុង​កិច្ច​ប្រជុំ​កំពូល ​G-7 ដែល​មាន​ប្រទេស​កាណាដា​បារាំង ​អាល្លឺម៉ង់​ អ៊ីតាលី​ជប៉ុន ចក្រភព​អង់គ្លេស​និង​អាមេរិក​និង​បាន​ជួប​ពិភាក្សា​ជាមួយ​មេដឹកនាំ​អង្គការ​អូតង់និង​សហគមន៍​អ៊ឺរ៉ុប​ដោយ​ព្យាយាម​ជំរុញ​ទំនាក់​ទំនង​ជាមួយ​សម្ព័ន្ធមិត្ត​និង​ពិគ្រោះ​យោបល់​ជាមួយ​ពួក​គេ​អំពី​កិច្ច​ពិភាក្សា​រវាង​សហ​រដ្ឋ​អាមេរិក​និង​រុស្ស៊ី៕

XS
SM
MD
LG