អង្គការអូតង់មានគម្រោងនឹងពិភាក្សាពិនិត្យឡើងវិញនូវកម្មវិធីយុទ្ធសាស្ត្ររបស់ខ្លួន នៅពេលមេដឹកនាំនៃប្រទេសជាសមាជិកអង្គការនេះ ដែលក្នុងនោះរួមមានប្រធានាធិបតីអាមេរិកលោក Joe Biden ជួបប្រជុំគ្នានៅថ្ងៃច័ន្ទនេះ ក្នុងរាជធានីប្រ៊ុចសែល ប្រទេសប៊ែលហ្ស៊ិក។
អង្គការអូតង់បានធ្វើបច្ចុប្បន្នភាពឯកសារយុទ្ធសាស្ត្ររបស់ខ្លួនកាលពីឆ្នាំ២០១០។ ការគំរាមកំហែងនិងការប្រឈមផ្នែកសន្តិសុខរបស់អង្គការនេះមានការផ្លាស់ប្តូរជាច្រើន ចាប់តាំងពីពេលនោះមក។ នេះបើតាមការបញ្ជាក់របស់លោក Jens Stoltenberg អគ្គលេខាធិការអង្គការអូតង់។
អង្គការអូតង់បានផ្អាកកិច្ចពិភាក្សាផ្លាស់ប្តូរយុទ្ធសាស្រ្តក្នុងអាណត្តិប្រធានាធិបតីអាមេរិកលោក Donald Trump។
លោក Trump មានទំនាក់ទំនងរកាំរកូសជាមួយមេដឹកនាំនៃប្រទេសសមាជិកអង្គការអូតង់ ដោយលោកបានស្នើឲ្យប្រទេសទាំងនោះពង្រីកទំហំថវិកាការពារជាតិរបស់ខ្លួនទៅឲ្យអង្គការនេះ និងបានលើកចម្ងល់អំពីខ្លឹមសារនៃមាត្រា៥របស់អង្គការអូតង់ស្តីពីការការពារគ្នាផងដែរ។
លោក Joe Biden បានមកដល់ រាជធានី ប្រ៊ុចសែល កាលពីថ្ងៃអាទិត្យម្សិលមិញដើម្បីចូលរួមកិច្ចប្រជុំរបស់អង្គការអូតង់ និងកិច្ចប្រជុំកំពូលជាមួយមេដឹកនាំសហភាពអឺរ៉ុបនៅថ្ងៃអង្គារស្អែកនេះ។
កិច្ចពិភាក្សាទាំងនេះនឹងធ្វើឡើងមុនជំនួបកំពូលរបស់លោក Biden ជាមួយប្រធានាធិបតីរុស្ស៊ីលោក Vladimir Putin នៅថ្ងៃពុធ ក្នុងទីក្រុងហ្សឺណែវ ប្រទេសស្វីស៕
