ប្រធានាធិបតិសហរដ្ឋអាមេរិកលោក Joe Biden បានសន្យាកាលពីថ្ងៃព្រហស្បតិ៍ម្សិលមិញថា សហរដ្ឋអាមេរិកនឹងបង្កើនការចូលរួមឡើងវិញយ៉ាងខ្លាំងនៅជុំវិញពិភពលោក ក្នុងអំឡុងពេលលោកកាន់តំណែងជាប្រធានាធិបតីដើម្បីបញ្ចប់នូវអ្វីដែលលោកហៅថាជា «អតីតកាលប៉ុន្មានឆ្នាំនៃការមិនអើពើ និងការបំពាន» ទៅលើទំនាក់ទំនងការបរទេសដោយអតីតប្រធានាធិបតីលោកDonald Trump។
«សហរដ្ឋអាមេរិកត្រឡប់មកវិញហើយ»។ លោក Biden បានប្រកាសដូច្នេះនៅឯក្រសួងការបរទេសសហរដ្ឋអាមេរិកនៅក្នុងការថ្លែងសុន្ទរកថាលើកដំបូងអំពីគោលនយោបាយការបរទេសក្នុងនាមជាប្រធានាធិបតីរបស់លោក។
លោកបាននិយាយថា៖ «សហរដ្ឋអាមេរិកមិនអាចអវត្តមានលើឆាកអន្តរជាតិបានទេ។ ការទូតគឺជាចំណុចស្នូលនៃគោលនយោបាយការបរទេសរបស់យើង»។
លោកបានបន្តថា៖ «សម្ព័ន្ធមិត្តរបស់សហរដ្ឋអាមេរិក គឺជាទ្រព្យសម្បត្តិដ៏អស្ចារ្យរបស់យើង» ហើយលោកក៏បានព្រមានពីប្រទេសរុស្ស៊ី និងប្រទេសចិនថាជាបញ្ហាដែលសហរដ្ឋអាមេរិកត្រូវដោះស្រាយផងដែរ។
លោក Biden ថ្លែងទៀតថា ពាក្យស្លោក «គិតគូរពីសហរដ្ឋអាមេរិកជាធំ» របស់អតីតប្រធានាធិបតីលោក Donald Trump តែងតែបង្កជម្លោះជាមួយសម្ព័ន្ធមិត្តរបស់សហរដ្ឋអាមេរិក និងធ្វើឲ្យមានចំណាត់ការធូររលុងលើប្រទេសដែលប្រកាន់របបផ្ដាច់ការ។
លោក Biden បាននិយាយថា លោកបានប្រាប់ប្រធានាធិបតីរុស៊្សីលោក Vladimir Putin តាមទូរស័ព្ទកាលពីសប្ដាហ៍មុនថា៖ «ថ្ងៃដែលសហរដ្ឋអាមេរិកងាក»ទៅរករដ្ឋាភិបាលក្រុងម៉ូស្គូបាន «បញ្ចប់ហើយ»។
មេដឹកនាំសហរដ្ឋអាមេរិករូបនេះអំពាវនាវឲ្យលោក Putin ដោះលែងមេដឹកនាំបក្សប្រឆាំងលោក Alexei Navalny ជាបន្ទាន់ «ដោយគ្មានលក្ខខណ្ឌ»។ លោក Navalny ត្រូវបានកាត់ទោសឲ្យជាប់ពន្ធនាគាររយៈពេល ២ឆ្នាំកន្លះ នៅក្នុងសប្ដាហ៍នេះ បន្ទាប់ពីត្រឡប់មកពីប្រទេសអាល្លឹម៉ង់វិញ។ លោក Navalny បានទៅសម្រាកព្យាបាលនៅអាល្លឺម៉ង់ បន្ទាប់ពីត្រូវបានគេដាក់ថ្នាំបំពុលដោយសង្ស័យថាជាស្នាដៃរបស់ភ្នាក់ងាររុស្ស៊ី។
សម្រាប់ប្រទេសចិន លោក Biden បាននិយាយថា៖ «យើងនឹងធ្វើការជាមួយរដ្ឋាភិបាលក្រុងប៉េកាំង នៅពេលមានអត្ថប្រយោជន៍ឲ្យយើងធ្វើដូច្នោះ»។
លោក Biden ក៏បាននិយាយថា លោកនឹងបញ្ចប់ការគាំទ្ររបស់សហរដ្ឋអាមេរិកលើការវាយលុកដោយយោធា ដែលដឹកនាំដោយប្រទេសអារ៉ាប៊ីសាអូឌីត នៅក្នុងប្រទេសយេម៉ែន ដោយហៅការណ៍នេះថាជា «មហន្តរាយផ្នែកមនុស្សធម៌ និងយុទ្ធសាស្ត្រ។ សង្គ្រាមនេះត្រូវតែបញ្ចប់»៕
