ប្រធានាធិបតីសហរដ្ឋអាមេរិកលោក Joe Biden បាននិយាយថាលោកមិនជឿថាមេដឹកនាំចិនមានផែនការធ្វើការវាយប្រហារក្នុងពេលឆាប់ៗនេះទៅលើកោះតៃវ៉ាន់នោះឡើយ ប៉ុន្តែលោកថារដ្ឋាភិបាលក្រុងប៉េកាំងនៅតែតាំងចិត្តថែរក្សាសន្តិភាពនៅច្រកសមុទ្រតៃវ៉ាន់។
ប្រធានាធិបតីសហរដ្ឋអាមេរិកលោក Joe Biden ដែលបានថ្លែងប្រាប់សន្និសីទសារព័ត៌ មានមួយ ក្រោយជំនួបរយៈពេលប្រមាណ៣ម៉ោងកន្លះជាមួយប្រធានាធិបតីចិនលោកXi Jinping នៅក្នុងសណ្ឋាគារនៅមាត់សមុទ្រនៅលើកោះបាលីថាសហរដ្ឋអាមេរិកនឹងធ្វើការប្រកួតដ៏ខ្លាំងជាមួយចិននៅលើឆាកអន្តរជាតិ«ប៉ុន្តែខ្ញុំមិនសម្លឹងទៅរកការបង្កើតឱ្យមានជម្លោះនោះឡើយ។ ខ្ញុំសម្លឹងទៅរកការគ្រប់គ្រងការប្រកួតប្រជែងនេះដោយភាពទទួលខុសត្រូវ»។
ភាពតានតឹងជុំវិញកោះតៃវ៉ាន់បានកើតមានឡើងក្នុងប៉ុន្មានខែថ្មីៗនេះ ដោយរដ្ឋាភិ បាលក្រុងប៉េកាំងបានបញ្ជូនយន្តហោះចម្បាំងរបស់ខ្លួនទៅជិតដែនអាកាសរបស់កោះ តៃវ៉ាន់និងបានបាញ់កាំជ្រួចមីស៊ីលទៅលើដែនទឹកជិតកោះនេះដើម្បីជាការតវ៉ាប្រឆាំងនឹងដំណើរទស្សនកិច្ចរបស់ប្រធានរដ្ឋសភាអាមេរិកលោកស្រី Nancy Pelosi កាលពីខែសីហាកន្លងទៅ។
ក្រសួងការបរទេសចិនបានបញ្ជាក់ថាលោក Xi បានស្នើទៅលោក Biden ឱ្យគោរពនូវការសន្យារបស់លោកដែលថាសហរដ្ឋអាមេរិកនឹងមិនគាំទ្រការប្រកាសឯករាជ្យរបស់កោះតៃវ៉ាន់នោះឡើយហើយសហរដ្ឋអាមេរិកក៏មិនត្រូវមានបំណងប្រើប្រាស់កោះតៃវ៉ាន់ជាឧបករណ៍ដើម្បីទប់ទល់ជាមួយចិននោះឡើយ។
ខ្លឹមសារនៃលទ្ធផលនៃកិច្ចប្រជុំរបស់មេដឹកនាំសហរដ្ឋអាមេរិកនិងចិនដែលផ្សព្វផ្សាយដោយចិននោះបានបញ្ជាក់ថា«នេះជាគោលបំណងរួមរបស់ប្រជាជនចិនដើម្បីការពារឯកភាពជាតិនិងបូរណភាពទឹកដីរបស់ចិន។ អ្នកដែលចង់បំបែកតៃវ៉ាន់ចេញពីប្រទេសចិននោះ គឺជាការប្រឆាំងទៅនឹងផលប្រយោជន៍ជាតិចិន។ ប្រជាពលរដ្ឋចិននឹងមិនយល់ស្របនេះឡើយ»។
បណ្តាដៃគូពាណិជ្ជកម្មនៃរដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងប៉េកាំងមានការបារម្ភថាភាពតានតឹងនិងការដាក់បម្រាមទៅលើការនាំចេញថ្មីរបស់អាមេរិកលើបន្ទះលោហធាតុ semiconductor អាចនឹងបង្ខំដល់ប្រទេសនានាត្រូវជ្រើសរើសនៅខាងប្រទេសណាមួយ។ លោក Biden បានព្យាយាមធ្វើការធានាដល់ប្រទេសចិន ដោយនិយាយថាបើទោះបីជាមានភាពតានតឹងជុំវិញច្រកសមុទ្រតៃវ៉ាន់និងបញ្ហាផ្សេង ៗមួយចំនួនក៏ដោយ ក៏រដ្ឋាភិបាលក្រុងវ៉ាស៊ីនតោននៅតែមានការតាំងចិត្តលើដំណោះស្រាយការទូត។
លោក Biden បានបញ្ជាក់ថា«ខ្ញុំជឿជាក់ថាយើងមិនត្រូវមានសង្គ្រាមត្រជាក់ថ្មីមួយជា មួយប្រទេសចិននោះឡើយ»។ ខ្ញុំបានគូសបញ្ជាក់យ៉ាងច្បាស់ហើយថា យើងចង់ដោះ ស្រាយនូវបញ្ហាច្រកសមុទ្រតៃវ៉ាន់ដោយសន្តិវិធី»។ អស់រយៈពេលជាច្រើនឆ្នាំកន្លងទៅនេះ សហរដ្ឋអាមេរិកបានផ្តល់ជំនួយយោធាដែលមានទឹកប្រាក់រាប់ពាន់លានដុល្លារទៅឱ្យកោះតៃវ៉ាន់ដើម្បីការពារខ្លួន បើទោះបីជាខ្លួនទទួលស្គាល់នូវការគ្រប់ គ្រងរបស់ចិន ចំពោះអ្វីដែលគេស្គាល់ក្នុងសហរដ្ឋអាមេរិកថាជានយោបាយយុទ្ធសាស្ត្រដែលគ្មានភាពច្បាស់លាស់នោះ»។
មន្ត្រីកោះតៃវ៉ាន់បានគាំទ្រលើជំនួបរវាងលោក Biden និងលោក Xi ។ កាលពីថ្ងៃចន្ទ ក្រសួងការបរទេសកោះតៃវ៉ាន់បង្ហាញនូវការគាំទ្ររបស់ខ្លួនដែលលោក Biden បានប្រើប្រាស់នូវកិច្ចប្រជុំនេះក្នុងការលើកឡើងវិញជាសាធារណៈពីការតាំងចិត្តរបស់រដ្ឋាភិបាលក្រុងវ៉ាស៊ីនតោនលើសន្តិសុខរបស់កោះតៃវ៉ាន់នោះ។
លោក Biden និយាយថាជំនួបពិភាក្សារបស់លោកជាមួយប្រធានាធិបតីចិន មានលក្ខណៈបើកចំហនិងច្បាស់លាស់ហើយថាមេដឹកនាំទាំងពីរ បានពិភាក្សាទៅលើគោលបំណងនិងអាទិភាពនៃប្រទេសរបស់គេ ទៅលើបញ្ហាជាច្រើន។
លោក Biden បាននិយាយទៀតថាលោកបានណែនាំដល់មន្ត្រីអាមេរិកជាន់ខ្ពស់ជាច្រើននាក់ ដើម្បីជួបប្រជុំជាមួយសមភាគីរបស់គេក្នុងពេលឆាប់ៗខាងមុខនេះ។ មេដឹកនាំទាំងពីរក៏បានឯកភាពផងដែរថារដ្ឋមន្ត្រីការបរទេសសហរដ្ឋអាមេរិកលោក Anthony Blinken នឹងធ្វើដំណើរទស្សនកិច្ចទៅកាន់ប្រទេសចិនដើម្បីពិនិត្យមើលលើការពិភាក្សាគ្នាបន្ត៕
