ប្រធានាធិបតីសហរដ្ឋអាមេរិក លោក Joe Biden កាលពីថ្ងៃសុក្រ ចង់បញ្ចុះបញ្ចូលមេដឹកនាំប្រទេសនៃតំបន់អាស៊ីអាគ្នេយ៍ ឱ្យបង្ហាញការប្រឆាំងបន្ថែមទៀតចំពោះការឈ្លានពានរបស់រុស្ស៊ីលើប្រទេសអ៊ុយក្រែន។ ក៏ប៉ុន្តែសង្គ្រាមនេះគឺជាបញ្ហាដ៏ស្មុគស្មាញមួយសម្រាប់ប្រទេសជាច្រើនដែលជាសមាជិកទាំង ១០ របស់អាស៊ាន ដែលមានទំនាក់ទំនងជិតស្និទ្ធជាមួយរដ្ឋាភិបាលរុស្ស៊ី។
លោក Biden បានទទួលស្វាគមន៍បណ្ដាមេដឹកនាំប្រទេសជាសមាជិកនៃសមាគមប្រជាជាតិអាស៊ីអាគ្នេយ៍មកកាន់សេតវិមានកាលពីល្ងាចថ្ងៃព្រហស្បតិ៍ ដោយបានទទួលទានអាហារពេលល្ងាចរួមគ្នា ដើម្បីបើកកិច្ចប្រជុំកំពូលរយៈពេលពីរថ្ងៃ។ នេះគឺជាកិច្ចប្រជុំលើកដំបូងបង្អស់រវាងសហរដ្ឋអាមេរិកនិងបណ្ដាមេដឹកនាំអាស៊ាន ដែលត្រូវបានធ្វើឡើងនៅរដ្ឋធានីវ៉ាស៊ីនតោន ក្នុងប្រវត្តិសាស្ត្ររយៈពេល ៤៥ ឆ្នាំមកនេះ។
សេតវិមានក៏កំពុងព្យាយាមបង្ហាញថា រដ្ឋាភិបាលសហរដ្ឋអាមេរិកកំពុងបង្កើនការប្រាស្រ័យទាក់ទងរបស់ខ្លួនជាមួយតំបន់ប៉ាស៊ីហ្វិក បើទោះបីជារដ្ឋបាលលោក Biden កំពុងយកចិត្តទុកដាក់ខ្លាំងលើសង្គ្រាមនៅអ៊ុយក្រែនក៏ដោយ។ សហរដ្ឋអាមេរិកបានប្រកាសថា សហរដ្ឋអាមេរិកនឹងប្ដេជ្ញាផ្តល់ទឹកប្រាក់ចំនួន ១៥០ លានដុល្លារសម្រាប់គម្រោងថ្មីនានាដើម្បីពង្រឹងវិស័យហេដ្ឋរចនាសម្ព័ន្ធ សុខាភិបាលសាធារណៈ ចរាចរណ៍ដែនសមុទ្រ និងការប្រែប្រួលអាកាសធាតុនៅក្នុងតំបន់អាស៊ីអាគ្នេយ៍។
លោក Biden ដឹងថា ការសម្រេចឱ្យបាននូវការស្រុះស្រួលគ្នារវាងបណ្ដាមេដឹកនាំអាស៊ានទាំងអស់ពាក់ព័ន្ធនឹងសកម្មភាពឈ្លានពានរបស់រុស្ស៊ី អាចជាកិច្ចការដ៏លំបាក។
អ្នកស្រី Jen Psaki អ្នកនាំពាក្យសេតវិមាន បានថ្លែងកាលពីថ្ងៃព្រហស្បតិ៍ថា អ៊ុយក្រែនអាចជាផ្នែកមួយនៃរបៀបវារៈសម្រាប់កិច្ចប្រជុំជាមួយមេដឹកនាំអាស៊ាន ប៉ុន្តែអ្នកស្រីមិនអាចសន្និដ្ឋានបានទេថាតើកិច្ចប្រជុំនេះនឹងលើកយកការឈ្លានពានរបស់រុស្ស៊ីមកពិភាក្សាដើម្បីបញ្ចប់កិច្ចប្រជុំនេះឬយ៉ាងណានោះទេ។
អ្នកស្រី Psaki បានថ្លែងថា៖ «ខ្ញុំនឹងនិយាយថា ប្រទេសជាសមាជិកអាស៊ានមួយចំនួន បានក្លាយជាដៃគូដ៏សំខាន់ក្នុងការប្រឆាំងនឹងសកម្មភាពគឃ្លើនរបស់រុស្ស៊ី និងនៅក្នុងការចូលរួមនិងគាំទ្រការដាក់ទណ្ឌកម្ម និងគោរពតាមលក្ខខណ្ឌទណ្ឌកម្មទាំងនោះ»។
ប្រទេសជាសមាជិកអាស៊ានខ្លះ រួមមានវៀតណាម មីយ៉ាន់ម៉ា និងឡាវ បានពឹងផ្អែកលើរុស្ស៊ីសម្រាប់សព្វាវុធយោធា ក្នុងរយៈពេលជាច្រើនឆ្នាំមកហើយ។ លើកលែងតែប្រទេសសិង្ហបុរី ដែលបានដាក់ទណ្ឌកម្មដោយផ្ទាល់លើរុស្ស៊ី បណ្តាប្រទេសផ្សេងទៀតដែលជាសមាជិកអាស៊ាននេះ បានគេចវេសមិនរិះគន់ប្រធានាធិបតីរុស្ស៊ីលោក Vladimir Putin ឬកាត់ទោសសង្គ្រាមដែលបង្កឡើងដោយរុស្ស៊ីឡើយ៕
