ប្រធានាធិបតីសហរដ្ឋអាមេរិក លោក Joe Biden បានទៅដល់ប្រទេសជប៉ុននៅថ្ងៃព្រហស្បតិ៍នេះ ដើម្បីចូលរួមក្នុងសន្និសីទកំពូលពួកមេដឹកនាំក្រុមប្រទេសដែលមានឧស្សាហកម្មរីកចម្រើនទាំង ៧ (G7) ដែលគេរំពឹងថា នឹងផ្តោតលើការទប់ទល់នឹងការអនុវត្តសេដ្ឋកិច្ចរបស់ប្រទេសចិន និងការគាំទ្រដល់អ៊ុយក្រែនក្នុងការប្រយុទ្ធប្រឆាំងនឹងការលុកលុយដោយរុស្ស៊ី។
លោក Biden បានទៅជួបទាហានអាមេរិក និងជប៉ុនជាង ៤០០ នាក់នៅឯមូលដ្ឋានកងទាហានម៉ារីន Iwakuni ក្នុងរយៈពេលដ៏ខ្លីមួយ ក្រោយយន្តហោះលោកបានចុះចត។
បន្ទាប់មក លោកបានជួបជាមួយនាយករដ្ឋមន្ត្រីជប៉ុនលោក Fumio Kishida នៅទីក្រុង Hiroshima ដែលជាកន្លែងធ្វើការចរចានៃប្រទេស G7។
លោក Biden បាននិយាយប្រាប់លោក Kishida ថា សហរដ្ឋអាមេរិកនិងជប៉ុន «ឈរជាមួយគ្នាដើម្បីគុណតម្លៃដូចគ្នា» រួមមានការគាំទ្រអ៊ុយក្រែននិងឱ្យរុស្ស៊ីទទួលខុសត្រូវចំពោះសង្គ្រាមឈ្លានពានរបស់ខ្លួន។ លោក Biden ក៏បានគូសបញ្ជាក់ការប្តេជ្ញាដល់ការមិនរីកសាយអាវុធនុយក្លេអ៊ែរ និង«ធ្វើឱ្យប្រាកដប្រជាអំពីតំបន់ឥណ្ឌូ-ប៉ាស៊ីហ្វិកមានភាពសេរីនិងបើកចំហ»។
លោក Biden បានមានប្រសាសន៍ថា៖ «លោកនាយករដ្ឋមន្ត្រី លទ្ធផលផ្តាច់ព្រ័ត្រគឺថា នៅពេលប្រទេសយើងឈរជាមួយគ្នា យើងខ្លាំងជាងមុន ហើយខ្ញុំមានជំនឿថា ពិភពលោកទាំងមូលនឹងមានសុវត្ថិភាពជាងមុន នៅពេលណាយើងឈរជាមួយគ្នា»។
សន្និសីទកំពូលក្រុមប្រទេស G7 ក៏មានការចូលរួមដែរពីសំណាក់មេដឹកនាំប្រទេសកាណាដា បារាំង អាល្លឺម៉ង់ អ៊ីតាលី ចក្រភពអង់គ្លេស និងសហភាពអឺរ៉ុប។
លោក Kishida ក៏បានអញ្ជើញប្រទេសមិនមែនជាសមាជិកមួយក្រុមឱ្យចូលរួមក្នុងសន្និសីទកំពូលនេះ ជាផ្នែកមួយនៃកិច្ចប្រឹងប្រែងពង្រឹងទំនាក់ទំនងជាមួយភាគខាងត្បូងសាកលនៃពិភពលោក Global South។ ប្រទេសទាំងនោះមាន រួមប្រទេសអូស្ត្រាលី ប្រេស៊ីល កូម៉ូរ៉ូស ប្រជុំកោះ Cook ឥណ្ឌា ឥណ្ឌូណេស៊ី កូរ៉េខាងត្បូង អ៊ុយក្រែននិងប្រទេសវៀតណាម។
គេរំពឹងថា ក្រុមមេដឹកនាំនៃប្រទេសទាំងនេះនឹងពិភាក្សាគ្នាអំពីការប្រើដោយប្រទេសចិននូវការរឹតត្បិតលើពាណិជ្ជកម្មនិងលើវិនិយោគទុន និងការធ្វើពហិការនិងការដាក់ទណ្ឌកម្ម។ សកម្មភាពដែលក្រុមប្រទេស G7 អាចធ្វើ មានរួមការគ្រប់គ្រងការដឹកជញ្ជូនទំនិញទៅលក់នៅប្រទេសក្រៅនិងការរឹតត្បិតលើវិនិយោគទុននៃប្រទេសទាំងនេះក្នុងប្រទេសចិន៕
