ប្រធានាធិបតីអាមេរិកលោក Joe Biden នឹងទទួលជួបព្រះមហាក្សត្រ Abdullah នៃប្រទេសហ៊្សកដានីនៅក្នុងសេតវិមាននៅថ្ងៃច័ន្ទដោយមានរបៀបវារៈសំខាន់ជាច្រើនស្តីពីបញ្ហាក្នុងតំបន់ក៏ដូចជាការបង្ហាញនូវការគាំទ្ររបស់អាមេរិកដល់មេដឹកនាំហ៊្សកដានីបន្ទាប់ពីមានការប្រឈមនឹងការគ្រប់គ្រងរបស់ទ្រង់។
លេខាព័ត៌មានសេតវិមានអ្នកស្រី Jen Psaki បានប្រាប់ក្រុមអ្នកកាសែតថា«វាជាឱកាសមួយក្នុងការពិភាក្សាគ្នាទៅលើការប្រឈមមួយចំនួនដែលកំពុងកើតមានក្នុងតំបន់មជ្ឈិមបូព៌ាក៏ដូចជាការបង្ហាញពីតួនាទីដឹកនាំរបស់ប្រទេសហ៊្សកដានីក្នុងការលើកកម្ពស់សន្តិភាពនិងស្ថិរភាពក្នុងតំបន់។អ្នកនាំពាក្យសេតវិមានរូបនេះបាននិយាយថាប្រទេសហ៊្សកដានី«ជាដៃគូសន្តិសុខនិងសម្ព័ន្ធមិត្តដ៏សំខាន់មួយរបស់សហរដ្ឋអាមេរិក»។
កិច្ចប្រជុំនៅថ្ងៃច័ន្ទរំពឹងថានឹងរួមបញ្ចូលផងដែរនូវការពិភាក្សាអំពីស្ថានភាពក្នុងប្រទេសស៊ីរីដែលជម្លោះរយៈពេលមួយទសវត្សរ៍បានជំរុញឲ្យប្រជាជនស៊ីរីប្រមាណជាង១លាននាក់រត់ភៀសខ្លួនចូលទៅក្នុងប្រទេសហ៊្សកដានីក៏ដូចជាបញ្ហាប្រទេសអ៊ីរ៉ាក់ទីដែលកងទ័ពអាមេរិកបានក្លាយជាគោលដៅនៃការវាយប្រហារដោយពួកសកម្មប្រយុទ្ធដែលមានការជួយគាំទ្រពីប្រទេសអ៊ីរ៉ង់។
ប្រធានបទផ្សេងៗទៀតរួមមានការធ្វើកិច្ចព្រមព្រៀងអំពីនុយក្លេអ៊ែរប្រទេសអ៊ីរ៉ង់ឡើងវិញកិច្ចពិភាក្សាសន្តិភាពអ៊ីស្រាអែលប៉ាឡេស្ទីននិងកិច្ចព្រមព្រៀងAbrahamក្នុងអាណត្តិអតីតប្រធានាធិបតីអាមេរិកលោក Donald Trump ដែលប្រទេសអ៊ីស្រាអែលមានទំនាក់ទំនងការទូតជាប្រក្រតីឡើងវិញជាមួយប្រទេសអារ៉ាប់ចំនួន៤ផងដែរ។
ទស្សនកិច្ចរបស់ព្រះមហាក្សត្រ Abdullah មកសហរដ្ឋអាមេរិកនេះគឺជាទស្សនកិច្ចលើកទីមួយរបស់មេដឹកនាំមជ្ឈិមបូព៌ាមកជួបលោក Joe Biden ដោយផ្ទាល់បន្ទាប់ពីលោកឡើងធ្វើជាប្រធានាធិបតីអាមេរិកកាលពីខែមករាកន្លងទៅ។នាយករដ្ឋមន្ត្រីអ៊ីរ៉ាក់លោក Mustafa al-Kadhimi គ្រោងមកទស្សនកិច្ចសេតវិមាននៅសប្តាហ៍ក្រោយហើយរដ្ឋបាលរបស់លោកBidenកំពុងរៀបចំគម្រោងទស្សនកិច្ចមួយរបស់នាយករដ្ឋមន្ត្រីអ៊ីស្រាអែលលោក Naftali Bennett ផងដែរ៕
ព័ត៌មានខ្លះក្នុងសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន Associated Press និងReuters។
