លោក Joe Biden នឹងក្លាយជាប្រធានាធិបតីថ្មីរបស់សហរដ្ឋអាមេរិកនៅថ្ងៃពុធនេះ ដោយអ្នកស្រី Kamala Harris នឹងក្លាយជាស្ត្រីទី១ដែលនឹងធ្វើជាអនុប្រធានាធិបតីអាមេរិក នៅពេលដែលអ្នកទាំងពីរត្រូវស្បថចូលកាន់តំណែងនៅក្នុងពិធីមួយនៅថ្ងៃត្រង់ថ្ងៃពុធម៉ោងនៅរដ្ឋធានីវ៉ាស៊ីនតោន ដែលត្រូវនឹងម៉ោង១២យប់ថ្ងៃពុធរំលងអធ្រាត្រចូលថ្ងៃព្រហស្បតិ៍ម៉ោងនៅប្រទេសកម្ពុជា។ ពិធីនេះ ត្រូវបានកាត់បន្ថយទំហំដែលបណ្តាលមកពីការរាតត្បាតនៃជំងឺកូវីដ១៩។
មិនមានមនុស្សរាប់សែននាក់ចូលរួមនៅទីលាន National Mall ទល់មុខវិមានសភាដូចសព្វដងទេ។ ជំនួសវិញ ទង់តំណាងឲ្យរដ្ឋនិងដែនដីរបស់សហរដ្ឋអាមេរិកចំនួន២០០.០០០ ត្រូវបានដោតតំណាងឲ្យអ្នកដែលមិនអាចចូលរួមនៅក្នុងទីកន្លែងទាំងនោះ។
មុនពេលចូលកាន់តំណែង លោក Biden បានបង្ហាញសារពីសាមគ្គីភាពអាមេរិក ជាពិសេសពីភាពចាំបាច់រួបរួមគ្នានិងប្រឈមបញ្ហាដែលបណ្តាលមកពីជំងឺរាតត្បាតដែលបានសម្លាប់មនុស្សប្រមាណ ៤០០.០០០នាក់ នៅសហរដ្ឋអាមេរិក និងបណ្តាលឱ្យមានការលំបាកខាងសេដ្ឋកិច្ចដល់ប្រជាពលរដ្ឋជាច្រើន។
លោក Biden បានមានប្រសាសន៍កាលពីយប់ថ្ងៃអង្គារ នៅពេលដែលលោកនិងអ្នកស្រី Harris ដឹកនាំពិធីរំឭកវិញ្ញាណក្ខន្ធនៅខាងមុខវិមានបូជនីយដ្ឋាន Lincoln សម្រាប់អ្នកដែលបានស្លាប់ថា៖ «ដើម្បីព្យាបាលស្នាមរបួសនេះ យើងត្រូវតែចងចាំ។ ជួលកាលវាមានការលំបាកក្នុងការចងចាំ ក៏ប៉ុន្តែ នេះជារបៀបដែលយើងផ្សះផ្សា»។ ភ្លើងចំនួន៤០០ ត្រូវបានតែងលម្អនៅជុំវិញស្រះទឹក Reflecting Pool។
លោក Biden ក្រោយមក បានសន្យា «ចាប់ធ្វើការងារភ្លាម» ក្រោយពីស្បថចូលកាន់តំណែងដោយមានប្រសាសន៍ថា៖ «យើងមិនមានពេលវលាដើម្បីខ្ជះខ្ជាយសូម្បី១វិនាទីទេ នៅពេលដែលនិយាយពីការដោះស្រាយវិបត្តិដែលយើងប្រឈមជាប្រទេសមួយនោះ»។
នៅត្រឹមពេលដែលពិធីចាប់ផ្តើម ប្រធានាធិបតីចេញពីតំណែងលោក Donald Trump គ្រោងនឹងចេញរួចហើយពីសេតវិមានឆ្ពោះទៅកាន់កន្លែងលំហែកាយរបស់លោកនៅរដ្ឋ Florida។ លោក Trump ជាមេដឹកនាំសហរដ្ឋអាមេរិកលើកទី១ ដែលមិនចូលរួមពិធីស្បថចូលកាន់តំណែងរបស់អ្នកកាន់តំណែងជំនួសលោកនៅក្នុងរយៈពេលជាង១៥០ឆ្នាំនេះ។
អនុប្រធានាធិបតីចេញពីតំណែងលោក Mike Pence ត្រូវគេរំពឹងថា នឹងចូលរួមពីធីនេះ ហើយអ្នកចូលរួមផ្សេងទៀតមាន អតីតប្រធានាធិបតី Barack Obama និងលោកស្រី Michelle ភរិយារបស់លោក អតីតប្រធានាធិបតីលោក George W. Bush និងលោកស្រី Laura ភរិយារបស់លោក និងអតីតប្រធានាធិបតី Bill Clinton និងភរិយារបស់លោក គឺអតីតរដ្ឋមន្ត្រីការបរទេស អ្នកស្រី Hillary Clinton៕
