ប្រធានាធិបតីជាប់ឆ្នោតសហរដ្ឋអាមេរិកលោក Joe Biden មានគម្រោងលាតត្រដាង ចក្ខុវិស័យ«វិជ្ជមាននិងប្រកបដោយសុទិដ្ឋិនិយម»សម្រាប់ប្រទេសនៅក្នុងសុន្ទរកថាស្បថចូលកាន់តំណែងនៅថ្ងៃពុធខាងមុខនេះ ហើយ«ព្យាយាមបង្វែរភាពបាក់បែកនិងការស្អប់ខ្ពើមក្នុងរយៈពេល៤ឆ្នាំ»នៅក្រោមលោកប្រធានាធិបតី Donald Trump ដែលនឹងចប់អាណត្តិ។ នេះបើតាមប្រសាសន៍របស់អ្នកជំនួយការដ៏សំខាន់ម្នាក់របស់លោក Biden កាលពីថ្ងៃអាទិត្យម្សិលមិញ។
លោកស្រី Kate Bedingfield ជានាយិកាផ្នែកទំនាក់ទំនងរបស់លោក Biden បានប្រាប់កម្មវិធី«This Week» នៃបណ្តាញទូរទស្សន៍ ABC ថា មេដឹកនាំថ្មីរបស់សហរដ្ឋអាមេរិក នឹង«ដាក់ចេញមាគ៌ាមួយដែលអំពាវនាវដល់យើងទាំងអស់គ្នាឲ្យធ្វើការជាមួយគ្នា»។
អ្នកស្រីបានមានប្រសាសន៍ទៀតថា៖ «ខ្ញុំគិតថា នេះជាអ្វីដែលប្រជាពលរដ្ឋអាមេរិកាំងនៅទូទាំងប្រទេសចង់បាន។ ពួកគេចង់បានរដ្ឋាភិបាលដែលជាថ្មីម្តងទៀតផ្តោតលើការធ្វើការងារត្រឹមត្រូវឲ្យពួកគេ និងជួយពួកគេនៅក្នុងជីវភាពប្រចាំថ្ងៃ»។
លោក Biden មានគម្រោងស្បថចូលកាន់តំណែងនៅជណ្តើរខាងលិចវិមានសភាពេលថ្ងៃត្រង់នៅក្នុងពិធីនៅថ្ងៃទី២០ ខែមករា ខាងមុខ ដែលត្រូវធ្វើជាប្រវត្តិសាស្ត្រជារៀងរាល់៤ឆ្នាំម្តង។ ទោះជាយ៉ាងណាក៏ដោយ នៅពេលនេះ វាពោរពេញទៅដោយការតានតឹងបន្ទាប់ពីមានការវាយសង្គ្រប់វិមានសភាថ្ងៃទី៦ ខែមករា ដោយពួកអ្នកគាំទ្ររបស់លោកប្រធានាធិបតី Donald Trump រាប់ពាន់នាក់។ លោកប្រធានាធិបតី Trump បានជំរុញឲ្យពួកគេដើរទៅកាន់អគារសភានៅពេលដែលសមាជិកសភាបានជួបប្រជុំដើម្បីប្រកាសបញ្ជាក់ជ័យជម្នះរបស់លោក Biden ជាផ្លូវការ។
រដ្ឋសភាសហរដ្ឋអាមេរិកកាលពីសប្តាហ៍មុនបានប្តឹងទម្លាក់លោកប្រធានាធិបតី Trump ជាលើកទី២ ដោយបានចោទប្រកាន់លោកពីការញុះញង់ឲ្យមានការបះបោរ ហើយព្រឹទ្ធសភាមានគម្រោងចាប់ផ្តើមភ្លាមៗបន្ទាប់ពីលោក Biden ស្បថចូលកាន់តំណែង។ ប្រសិនបើរកឃើញថាមានទោស លោក Trump ជាប្រធានាធិបតីសហរដ្ឋអាមេរិកទី១ ដែលត្រូវប្តឹងចោទប្រកាន់ទម្លាក់ចេញពីតំណែង២ដងនោះ នឹងអាចត្រូវរារាំងមិនឲ្យកាន់តំណែងម្តងទៀតជារៀងរហូត៕
