មន្ត្រីស៊ើបការណ៍សម្ងាត់ជាន់ខ្ពស់ម្នាក់ និងមន្ត្រីយោធាម្នាក់ទៀត បានឲ្យដឹងនៅថ្ងៃអង្គារថា សមាជិកកងឆ្មាំការពារជាតិសហរដ្ឋអាមេរិកចំនួន ១២ នាក់ ត្រូវបានដកចេញពីបេសកកម្មការពារសន្តិសុខក្នុងពិធីសច្ចាប្រណិធានចូលកាន់តំណែងរបស់ប្រធានាធិបតីជាប់ឆ្នោតលោក Joe Biden បន្ទាប់ពីពួកគេទាំងនោះត្រូវបានរកឃើញថាមានពាក់ព័ន្ធនឹងក្រុមឧទ្ទាមស្តាំនិយម ឬបានបង្ហោះទស្សនៈជ្រុលនិយមនៅលើប្រព័ន្ធអ៊ីនធឺណិត។ មន្រ្តីទាំងពីរនាក់ក៏បានឲ្យដឹងផងដែរថា មិនមានហានិភ័យណាមួយត្រូវបានប៉ុនប៉ងលើប្រធានាធិបតីជាប់ឆ្នោត Joe Biden ទេ។
មន្ត្រីទាំងពីរនាក់ ដែលបានដឹងពីព័ត៌មាននេះ មិនបានបញ្ជាក់ព័ត៌មានលម្អិតអំពីសមាជិកកងឆ្មាំការពារជាតិទាំង១២នាក់នោះទេ។
មន្ត្រីទាំងពីរនាក់នេះបានផ្តល់ព័ត៌មានឲ្យទីភ្នាក់ងារព័ត៌មាន AP ដោយមិនបង្ហាញអត្តសញ្ញាណទេ ដោយសារពួកគេមិនត្រូវបានអនុញ្ញាតឲ្យនិយាយជាសាធារណៈអំពីបញ្ហានេះ។
ការដកសមាជិកកងឆ្មាំការពារជាតិទាំងនេះពីបេសកកម្មសន្តិសុខដ៏ធំមួយរបស់សហរដ្ឋអាមេរិកត្រូវបានធ្វើឡើង បន្ទាប់ពីការិយាល័យសហព័ន្ធផ្នែកស៊ើបអង្កេត (FBI) បានពិនិត្យមើលលើប្រវត្តិរូបរបស់កងឆ្មាំការពារជាតិចំនួន ២ម៉ឺន ៥ពាន់នាក់ ដែលនឹងចូលរួមក្នុងបេសកកម្មការពារសន្តិសុខក្នុងពិធីស្បថចូលកាន់តំណែងរបស់លោក Biden ដែលនឹងធ្វើឡើងនៅថ្ងៃពុធ។
មន្ត្រីការពារជាតិសហរដ្ឋអាមេរិកមានការព្រួយបារម្ភអំពីការវាយប្រហារពីកងកម្លាំងផ្ទៃក្នុង ដែលអាចកើតមានឡើង ឬការវាយប្រហារពីសមាជិកកងសន្តិសុខពិសេស បន្ទាប់ពីកុបកម្មហិង្សាដែលបានកើតឡើងនៅវិមានសភាសហរដ្ឋអាមេរិក កាលពីថ្ងៃទី៦ ខែមករាកន្លងទៅ ដោយក្រុមអ្នកគាំទ្រលោកប្រធានាធិបតី Donald Trump ដែលបានបង្កឲ្យមានការភ្ញាក់ផ្អើលទូទាំងសហរដ្ឋអាមេរិក។
លោកឧត្ដមសេនីយ៍ Daniel Hokanson មេបញ្ជាការកងឆ្មាំការពារជាតិ បានបញ្ជាក់នៅថ្ងៃអង្គារថា សមាជិកកងឆ្មាំការពារជាតិទាំង១២នាក់នោះ ត្រូវបានដកចេញពីបេសកកម្មសន្តិសុខ ហើយត្រូវបានបញ្ជូនទៅមូលដ្ឋានរបស់ពួកគេវិញ។
លោក Hokanson ថា សមាជិក២នាក់ក្នុងចំណោម១២នាក់នោះ ត្រូវបានដកចេញដោយសារការបញ្ចេញមតិមិនសមរម្យ ឬបានផ្ញើសារនានាពាក់ព័ន្ធនឹងពិធីស្បថចូលកាន់តំណែងរបស់ប្រធានាធិបតីថ្មី។ ហើយសមាជិក ១០នាក់ផ្សេងទៀត ត្រូវបានដកចេញដោយសារបញ្ហាចម្បងនានា ដែលអាចពាក់ព័ន្ធនឹងសកម្មភាពឧក្រិដ្ឋកម្មពីអតីតកាល ប៉ុន្តែមិនពាក់ព័ន្ធនឹងពិធីស្បថចូលកាន់តំណែងទេ។
គេនៅមិនទាន់មានព័ត៌មានជាក់លាក់នៅឡើយថាតើសមាជិកកងឆ្មាំការពារជាតិទាំងនេះ នឹងប្រឈមពិន័យអ្វីនោះ នៅពេលពួកគេត្រឡប់ទៅមូលដ្ឋានរបស់ខ្លួនវិញ៕
